മുന്‍ മുഖ്യമന്ത്രി വി.എസ് അച്യുതാനന്ദന്‍റെ മകന്‍ ഡോ.വി.എ. അരുണ്‍കുമാറിന് ഐഎച്ച്ആര്‍ഡി ഡയറക്ടറുടെ ചുമതല വഹിക്കാനുള്ള യോഗ്യതകളില്ലെന്ന് ഓള്‍ ഇന്ത്യ കൗണ്‍സില്‍ ഫോര്‍ ടെക്നിക്കല്‍ എഡ്യൂക്കേഷന്‍. അരുണ്‍കുമാറിന്‍റെ നിയമനം ചോദ്യം ചെയ്ത് ഡോ. വിനു തോമസ് നല്‍കിയ ഹര്‍ജിയില്‍ എ.ഐ.സി.ടി.ഇ സ്റ്റാന്‍ഡിങ് കൗണ്‍സില്‍ ഹൈക്കോടതിയില്‍ സമര്‍പ്പിച്ച സത്യവാങ്മൂലത്തിലാണ് ഇക്കാര്യം വ്യക്തമാക്കിയിരിക്കുന്നത്.
സാങ്കേതിക സ്ഥാപനങ്ങളുടെ ഡയറക്ടര്‍/പ്രിന്‍സിപ്പല്‍ നിയമനത്തിന് വേണ്ട വിദ്യാഭ്യാസ യോഗ്യതയും പ്രവൃത്തി പരിചയവും സംബന്ധിച്ച് 2010, 2019 വര്‍ഷങ്ങളില്‍ എ.ഐ.സി.ടി.ഇ ഉത്തരവുകള്‍ ഇറക്കിയിട്ടുണ്ട്. ഇതില്‍ നിഷ്കര്‍ഷിച്ചിരിക്കുന്ന യോഗ്യതയും പ്രവൃത്തി പരിചയവും അരുണ്‍കുമാറിനില്ല. അതിനാല്‍ ഹര്‍ജിയില്‍ ഉചിതമായ തീര്‍പ്പുണ്ടാക്കണമെന്നും എ.ഐ.സി.ടി.ഇ വ്യക്തമാക്കി.