കാസർഗോഡ് കാഞ്ഞങ്ങാട് സ്വകാര്യ ആശുപത്രിയിലെ നഴ്സിങ്‌ വിദ്യാർഥി ആത്മഹത്യയ്ക്ക് ശ്രമിച്ചു. കഴിഞ്ഞ ദിവസം രാത്രിയിലാണ് സംഭവം. ഹോസ്റ്റൽ മുറിയിലാണ് മൂന്നാം വർഷ നഴ്സിങ്‌ വിദ്യാർഥി ചൈതന്യയെ തൂങ്ങിയ നിലയിൽ കണ്ടെത്തിയത്. വാർഡൻ്റെ മാനസിക പീഡനമാണ് ഇതിലേക്ക് നയിച്ചതെന്നാണ് ആരോപണം. നിലവിൽ പെൺകുട്ടി ഗുരുതരാവസ്ഥയിൽ മംഗലാപുരത്തെ ആശുപത്രിയിൽ ചികിത്സയിലാണ്.
ഹോസ്റ്റൽ വാർഡനുമായുള്ള പ്രശ്നമാണ് ആത്മഹത്യാ ശ്രമത്തിന് പിന്നിലെന്നാണ് സഹപാഠികൾ ആരോപിക്കുന്നത്. വിദ്യാർഥി വയ്യാതെ കിടന്നപ്പോൾ പോലും ഭക്ഷണം ഉൾപ്പടെ നൽകാൻ ഹോസ്റ്റൽ വാർഡൻ തയ്യാറായില്ല. മാനസികമായും പീഡിപ്പിച്ചു. ഇത് സഹിക്കാനാവാതെയാണ് വിദ്യാർഥി ആത്മഹത്യക്ക് ശ്രമിച്ചത്.
പെൺകുട്ടിക്ക് നീതി ലഭിക്കണമെന്നാണ് വിദ്യാർഥികളുടെ ആവശ്യം. ഇവർക്കെതിരെ നടപടി ആവശ്യപ്പെട്ട് കാഞ്ഞങ്ങാട്ടെ ആശുപത്രിക്ക് മുന്നിൽ വിദ്യാർഥികളും രക്ഷിതാക്കളും പ്രതിഷേധിച്ചു. കുറ്റക്കാർക്കെതിരെ നടപടിയുണ്ടാകുമെന്ന് മാനേജ്മെന്റ് ഉറപ്പ് നൽകിയതിനെ തുടർന്നാണ് പ്രതിഷേധം അവസാനിപ്പിച്ചത്.