യുപിയുടെ എട്ട് വർഷത്തെ ലോ ആൻഡ് ഓർഡർ പ്രോ​ഗ്രസ് റിപ്പോർട്ടുമായി മുഖ്യമന്ത്രി യോ​ഗി ആദിത്യനാഥ്. 2017ൽ അധികാരത്തിൽ വന്ന ബിജെപി സർക്കാർ ക്രമസമാധാന പ്രശ്നം വലിയ തോതിൽ അടിച്ചമർത്തിയെന്നാണ് യോഗി ആദിത്യനാഥ് അവകാശപ്പെടുന്നത്. ബിജെപി സർക്കാർ വന്ന ശേഷം മാഫിയാബന്ധമുള്ള 222 പേർ കൊല്ലപ്പെട്ടെന്നും 930 പേർക്കെതിരെ രാജ്യദ്രോഹക്കുറ്റം ചുമത്തിയെന്നും യോ​ഗി ആദിത്യനാഥ് പറഞ്ഞു. 92 പേജുള്ള പ്രോഗ്രസ് റിപ്പോർട്ടാണ് യോഗി അവതരിപ്പിച്ചത്.


"2017 നും 2025 നുമിടെ സംസ്ഥാത്തുണ്ടായ പൊലീസ് ഏറ്റുമുട്ടലുകളിൽ 8,118 പേർക്ക് പരിക്കേറ്റു. മാഫിയാ നേതാക്കളും ​ഗുണ്ടകളുമായി 222 പേർ കൊല്ലപ്പെട്ടു. 930 പേർക്കെതിരെ ദേശസുരക്ഷാനിയമപ്രകാരം കേസെടുത്തു", യോ​ഗി വ്യക്തമാക്കി. ​എട്ട് കൊലത്തിനുള്ളിൽ ക്രിമിനൽ പശ്ചാത്തലമുള്ള 79,984 പേർക്കെതെിരെ ​ഗുണ്ടാനിയമപ്രകാരം കേസെടുത്തെന്ന് യോ​ഗി പറഞ്ഞു.

മാഫിയാസംഘത്തിൻ്റെയും ​ഗുണ്ടാനേതാക്കളുടേയും ബിനാമികളുടേതുമായി 4,076 കോടിയുടെ സ്വത്തുക്കൾ‌ കണ്ടുകെട്ടി. 27,178 വനിതാ ഉദ്യോ​ഗസ്ഥരടക്കം 2,16,450 പൊലീസുദ്യോ​ഗസ്ഥരെ സർക്കാർ പുതിയതായി നിയമിച്ചു. 2022 ഭരണത്തുടർച്ച ലഭിച്ചത് സർക്കാരിൻ്റെ ഇടപെടലിന് ഉദാഹരണമാണെന്നും യോ​ഗി വ്യക്തമാക്കി. 92 പേജുള്ള പ്രോ​ഗ്രസ് കാർഡാണ് യുപി മുഖ്യമന്ത്രി വാർത്താസമ്മേളനത്തിൽ പുറത്തിറക്കിയത്.

ALSO READ: 'ഏതൊരു പ്രവൃത്തിക്കും തിരിച്ചടിയുണ്ടാകും'; കുനാല്‍ കമ്രയ്‌ക്കെതിരെ ഏക്‌നാഥ് ഷിന്‍ഡേ

പ്രോഗ്രസ് കാർഡിനെ വിമർശിച്ച് സമാജ് വാദി പാർട്ടി രംഗത്തെത്തി. ബലാത്സം​ഗക്കേസുകൾ വർ‌ധിച്ചതും ഏറ്റുമുട്ടൽ കൊലകളുമാണോ ഭരണനേട്ടമെന്ന് അഖിലേഷ് യാദവ് ചോദിച്ചു. എന്നാൽ എല്ലാദിവസവും വാർത്തകളിൽ നിറയുന്നത് ബലാത്സം​ഗക്കേസുകളും ഏറ്റുമുട്ടൽ കൊലകളും ജാതിക്കൊലകളുമാണ്. ഇതാണോ ബിജെപിയുടെ ഭരണനേട്ടമെന്നായിരുന്നു പ്രോ​ഗ്രസ് കാർഡിനെ വിമ‍ർശിച്ചുള്ള അഖിലേഷ് യാദവിൻ്റെ പ്രതികരണം. സംസ്ഥാനത്ത് ഏറ്റുമുട്ടൽ കൊലകളും ബലാത്സം​ഗ​ക്കേസുകളും വർധിക്കുകയാണ്.

മുഖ്യമന്ത്രി പ്രോ​ഗ്രസ് റിപ്പോർ‌ട്ട് അവതരിപ്പിച്ച ലഖ്നൗവിൽ അതേദിവസം ഒരു കൊച്ചുപെൺകുട്ടി ബലാത്സം​ഗത്തിനിരയായി കൊല്ലപ്പെട്ടു. യുപിയിലെ ബല്ലിയയിൽ പെൺകുട്ടിയെ കൊന്ന് കൈകൾ പുറകിലേക്ക് കെട്ടിയ ശേഷം കെട്ടിത്തൂക്കിയ നിലയിൽ കണ്ടെത്തിയതും ഇതേദിവസമാണ്. എന്നാൽ അക്രമങ്ങളോട് സീറോ ടോളറൻസ് എന്നാണ് യോ​ഗി പറയുന്നത്. എങ്കിൽ പിന്നെ ഇത്തരം നീചമായ സംഭവങ്ങൾ എങ്ങനെ നിരന്തരം ആവർത്തിക്കപ്പെടുന്നുവെന്നും അഖിലേഷ് യാദവ് ചോദ്യമുന്നയിച്ചു.