ആർട്ടിഫിഷ്യൽ ഇൻ്റലിജൻസ് ഉപയോഗിച്ചുള്ള ചിത്രങ്ങൾ സൊമാറ്റോയിൽ നിന്ന് നീക്കം ചെയ്യുമെന്ന് സിഇഒ ദീപീന്ദർ ഗോയൽ. എ ഐ ജനറേറ്റഡ് ചിത്രങ്ങൾ ഉപയോഗിക്കുന്നതിൽ നിരവധി ഉപഭോക്താക്കൾ പരാതി അറിയിച്ചതോടെയാണ് തീരുമാനം. ഈ മാസം അവസാനത്തോടെ മെനുകളിൽ നിന്ന് അത്തരം ചിത്രങ്ങൾ നീക്കം ചെയ്യുമെന്നും അദ്ദേഹം അറിയിച്ചു.
കൂടുതൽ ആകർഷണീയമായി അവതരിപ്പിക്കാനാണ് എഐ ജനറേറ്റഡ് ഇമേജുകൾ ഉപയോഗിക്കുന്നത്. എന്നാൽ ഈ ചിത്രങ്ങൾ തെറ്റിദ്ധാരണയുണ്ടാക്കുന്നുവെന്ന് ധാരാളം പരാതികൾ ലഭിച്ചിട്ടുണ്ടെന്നും, ഇത്തരം ചിത്രങ്ങൾ ഉടനടി നീക്കുമെന്നും ഗോയൽ അറിയിച്ചു.
ALSO READ: ആരോഗ്യത്തോടെ ജീവിക്കണോ? പിന്തുടരൂ ഈ ജാപ്പനീസ് തന്ത്രങ്ങൾ!
എ ഐ ചിത്രങ്ങൾ ഉപഭോക്താക്കൾക്കും റെസ്റ്റോറൻ്റുകൾക്കും ഇടയിലുള്ള വിശ്വാസ്യത ഇല്ലാതാക്കും. ഇനി മുതൽ റെസ്റ്റോറൻ്റ് മെനുകളിലെ ഡിഷ് ഇമേജുകൾക്കായി എഐ ഉപയോഗിക്കുന്നത് ഒഴിവാക്കാനും യഥാർത്ഥ ഫുഡ് ഷോട്ടുകൾ മെനുവിൽ ഉൾപ്പെടുത്താനും തങ്ങളുടെ റെസ്റ്റോറൻ്റ് പങ്കാളികളോട് ആവശ്യപ്പെട്ടതായും ഗോയൽ വ്യക്തമാക്കി.
ഈ നിരോധനം തങ്ങളുടെ മാർക്കറ്റിങ് ടീമിനും ബാധകമാണ്. മാർക്കറ്റിങ് ആവശ്യങ്ങൾക്കായി എഐ ചിത്രങ്ങൾ ഉപയോഗിക്കരുതെന്ന് അവർക്ക് നിർദ്ദേശം നൽകിയിട്ടുണ്ട്. നിലവിൽ വർക്ക്ഫ്ലോകൾ കാര്യക്ഷമമാക്കുന്നതിനായി എ ഐയുടെ വിവിധ രൂപങ്ങൾ സൊമാറ്റോ ഉപയോഗിക്കുന്നുണ്ട്. എന്നിരുന്നാലും എ ഐയുടെ ഉപയോഗം ശക്തമായി നിരുത്സാഹപ്പെടുത്തുമെന്നും അദ്ദേഹം കൂട്ടിച്ചേർത്തു.