കെഎസ്ഇബിയുടെ അലുമിനിയം കമ്പി മോഷ്ടിച്ച് കടത്തിയ ഉദ്യോഗസ്ഥനും കരാർ ജീവനക്കാരനും അറസ്റ്റിൽ. മലപ്പുറം വഴിക്കടവ് കെഎസ്ഇബി ഓഫീസിൽ നിന്നും മോഷ്ടിച്ചത് 100 കിലോ അലുമിനിയം കമ്പിയാണ്. കെഎസ്ഇബി ഉദ്യോഗസ്ഥൻ വണ്ടൂർ സ്വദേശി തോമസ്, കരാർ തൊഴിലാളികളായ പാലക്കാട് വല്ലപ്പുഴ സ്വദേശികളായ ജാസിർ ഹുസൈൻ, ഹിഷാമുദ്ദീൻ, മുഹമ്മദ് ഹസീബ്, കൊല്ലം സ്വദേശി അബ്ദുൾ സലാം എന്നിവരാണ് പിടിയിലായത്.
പാലക്കാട് വടക്കഞ്ചേരി പഞ്ചായത്തിലെ വാർഡ് മെമ്പർ സുനിൽ ചുവട്ടുപാടം വീണ്ടും സത്യപ്രതിജ്ഞ ചെയ്തു. ഉമ്മൻ ചാണ്ടിയുടെ നാമത്തിലുള്ള സത്യപ്രതിജ്ഞ കോടതി അസാധുവാക്കിയ സാഹചര്യത്തിലാണ് വീണ്ടും സത്യപ്രതിജ്ഞ ചെയ്തത്. ഇരുപത്തിയൊന്നാം വാർഡ് മെമ്പർ സുനിൽ ചുവട്ടുപാടം. സ്റ്റാൻഡിങ് കമ്മിറ്റി ചെയർപേഴ്സൺ അമ്പിളി മോഹൻദാസ് ആണ് സത്യപ്രതിജ്ഞ ചൊല്ലിക്കൊടുത്തത്.
കോഴിക്കോട് വെസ്റ്റ് കണ്ണഞ്ചേരിയില് ട്രെയിന് തട്ടി ഗുരുതരമായി പരിക്കേറ്റ് ചികിത്സയിലായിരുന്ന എട്ടുവയസ്സുകാരന് മരിച്ചു. കുഞ്ഞീരിയമ്പലത്ത് അഹമ്മദ് കോയയുടെ മകന് ഫൈസാന് ആണ് മരിച്ചത്. സ്വകാര്യ ആശുപത്രിയിലെ തീവ്രപരിചരണ വിഭാഗത്തില് ചികിത്സയിലിരിക്കെയാണ് അന്ത്യം.
ഇന്നലെ രാവിലെ എട്ട് മണിയോടെയായിരുന്നു അപകടം. യശ്വന്ത്പൂരില് നിന്നും കണ്ണൂരിലേക്ക് പോവുകയായിരുന്ന യശ്വന്ത്പുര് - കണ്ണൂര് എക്സ്പ്രസ്സ് ആണ് കുട്ടിയെ ഇടിച്ചത്. ഇടിയുടെ ആഘാതത്തില് ഫൈസാന്റെ തലയ്ക്ക് ഗുരുതരമായി പരിക്കേറ്റിരുന്നു. റെയില്വേ ട്രാക്കിന് സമീപത്താണ് കുട്ടിയുടെ വീട്.
പെരുമ്പാവൂർ: കുറുപ്പംപടിയിൽ പൊലീസ് ഉദ്യോഗസ്ഥന്റെ ക്വാട്ടേഴ്സിൽ വിജിലൻസ് മിന്നൽ പരിശോധന നടത്തി. കുറുപ്പുംപടി സിഐ രാജേഷ് കുമാറിന്റെ ക്വാട്ടേഴ്സിലാണ് പരിശോധന നടത്തിയത് പരിശോധന സമയത്ത് ക്വട്ടേഴ്സിൽ ഒരു കേസിലെ പ്രതിയും ഉണ്ടായിരുന്നു. കണക്കിൽപ്പെടാത്ത 40000 രൂപ പിടിച്ചെടുത്തു. സംഭവത്തിൽവിശദമായ അന്വേഷണം നടത്തുമെന്ന് വിജിലൻസ് അറിയിച്ചു.