കാക്കനാട് രണ്ടാം ഭാര്യയെ പെട്രോൾ ഒഴിച്ചു തീ കൊളുത്തി ഭർത്താവ്

ആനക്കാംപൊയിൽ-കള്ളാടി-മേപ്പാടി തുരങ്കപാത പദ്ധതി യുഡിഎഫ് സർക്കാർ ഉപേക്ഷിക്കില്ലെന്ന് തിരുവമ്പാടി എംഎല്‍എ സി.കെ. കാസിം ന്യൂസ് മലയാളത്തോട് പറഞ്ഞു. വിദഗ്‌ധസമിതിയുടെ റിപ്പോർട്ട് വന്നാലുടന്‍ തുടർനടപടി ഉണ്ടാകും. പദ്ധതിയെ എതിർക്കും എന്നല്ല, നിർമാണപ്രവർത്തികൾ കരുതലോടെ വേണം എന്നാണ് മുഖ്യമന്ത്രി പറഞ്ഞത്. മുൻകരുതൽ സ്വീകരിക്കാത്തതാണ് കള്ളാടിയിലെ മണ്ണിടിച്ചിലിന് കാരണം. ജനങ്ങളുടെ സുരക്ഷയ്‌ക്ക് മുൻഗണന നൽകണം. എല്‍ഡിഎഫ് സർക്കാർ പദ്ധതിയെ വേണ്ട ഗൗരവത്തിൽ കണ്ടോ എന്ന് സംശയമുണ്ടെന്നും സി.കെ. കാസിം പറഞ്ഞു. തുരങ്കപാതയുടെ നിർമാണം തടയാൻ യുഡിഎഫ് ശ്രമിക്കുന്നുവെന്ന ആരോപണവുമായി സിപിഐഎം രംഗത്തെത്തിയിരുന്നു. മുഖ്യമന്ത്രി വി.ഡി. സതീശൻ പ്രതിപക്ഷ നേതാവായിരിക്കെ നടത്തിയ 'തുരങ്കപാതയെ ഞങ്ങൾ എതിർക്കും' എന്ന പ്രസ്താവന സത്യമാവുകയാണോ എന്ന സംശയം ബലപ്പെടുന്നതായി സിപിഐഎം ഏരിയ സെക്രട്ടറി വിനോദ് പറഞ്ഞു. പദ്ധതി അവസാനിപ്പിക്കാൻ അപകടത്തെ കൂട്ടുപിടിക്കുകയാണ് യുഡിഎഫ് സർക്കാർ ചെയ്യുന്നതെന്ന് മുൻ എംഎൽഎ ലിന്റോ ജോസഫും കുറ്റപ്പെടുത്തിയിരുന്നു.

അന്താരാഷ്ട്ര മാധ്യമങ്ങളെ വൈറ്റ് ഹൗസിൽ നിന്ന് വിലക്കിയതിന് പിന്നാലെ പുതിയ ഡിജിറ്റൽ ചാനൽ ആരംഭിച്ച് യുഎസ് പ്രസിഡന്റ് ഡൊണാള്‍ഡ് ട്രംപ്. 'ട്രംപ് ടിവി' എന്നാണ് 24 മണിക്കൂറും പ്രവർത്തിക്കുന്ന സ്ട്രീമിങ് പ്ലാറ്റ്‌ഫോമിന് പേര് നൽകിയിരിക്കുന്നത്. വൈറ്റ് ഹൗസിന്റെ യൂട്യൂബ് ചാനലിലൂടെ ഇന്നലെ വൈകിട്ടായിരുന്നു ലോഞ്ച് . ട്രംപിന്റെ പ്രസംഗങ്ങൾ , പ്രധാന പ്രഖ്യാപനങ്ങൾ എന്നിവ പുതിയ ചാനലിലൂടെ തത്സമയം അറിയാനാകും. വൈറ്റ് ഹൗസിലെ വിലക്കിനെതിരെ സിഎന്‍എന്‍, എംഎസ് നൗ, പൊളിറ്റിക്കോ എന്നീ മാധ്യമ സ്ഥാപനങ്ങൾ കോടതിയെ സമീപിച്ചതിനു പിന്നാലെയാണ് പുതിയ ഡിജിറ്റൽ ചാനൽ സംപ്രേഷണം ആരംഭിച്ചത്. ദേശീയ സുരക്ഷയെ ബാധിക്കുന്ന തരത്തിൽ തെറ്റായ വാർത്തകൾ നൽകുന്നവർക്ക് വൈറ്റ് ഹൗസിലേക്ക് പ്രവേശനം അനുവദിക്കില്ലെന്നും കോടതി ഉത്തരവ് എതിരായാൽ അപ്പീൽ നൽകുമെന്നും ട്രംപ് വ്യക്തമാക്കി. മാധ്യമ വിലക്കിൽ പ്രതിഷേധിച്ച് കഴിഞ്ഞ ദിവസം എബിസി, സിബിഎസ്, ഫോക്സ് അടക്കമുള്ളവർ ട്രംപുമായി ബന്ധപ്പെട്ട വാർത്താ കവറേജ് ബഹിഷ്കരിച്ചിരുന്നു.

പ്രതിപക്ഷ നേതാവ് പിണറായി വിജയൻ ഉൾപ്പെടെയുള്ളവർക്കെതിരായ ഇഡി റിപ്പോർട്ടിൽ അന്വേഷണ തീരുമാനം ഇന്ന്. വിജിലൻസിനെക്കൊണ്ട് പ്രാഥമിക അന്വേഷണം നടത്താനാണ് ധാരണ. ഇന്ന് തന്നെ ഒരുപക്ഷേ ഉത്തരവിറങ്ങും. അല്ലെങ്കിൽ നാളെ മന്ത്രിസഭാ യോഗത്തിന് ശേഷം മുഖ്യമന്ത്രി വി.ഡി. സതീശൻ മാധ്യമങ്ങളെ കാണുമ്പോഴായിരിക്കും അന്വേഷണത്തിലെ നിലപാടറിയിക്കുക. കേസെടുത്ത് അന്വേഷണം നടത്താം എന്നാണ് അഡ്വക്കേറ്റ് ജനറലിന്റെ നിയമോപദേശം. എങ്കിലും ദേശീയ തലത്തിലെ കോൺഗ്രസ് നിലപാട് കൂടി പരിഗണിച്ചാണ് പ്രാഥമിക അന്വേഷണം എന്ന തീരുമാനത്തിലേക്ക് എത്തുന്നത്. അന്വേഷണത്തിൽ തെളിവുകൾ ലഭിച്ചാൽ കേസെടുക്കുമെന്നും സർക്കാർ വൃത്തങ്ങൾ വ്യക്തമാക്കുന്നു. അതേസമയം, മുഹമ്മദ് റിയാസ് എംഎൽഎക്കെതിരായ ഗുരുതര ആരോപണങ്ങളിൽ കേസെടുത്ത് അന്വേഷണം നടത്തണമെന്ന അഭിപ്രായവും സർക്കാരിൽ ഒരു വിഭാഗത്തിനുണ്ട്.

മുഖ്യമന്ത്രിയുടെ സ്പോൺസേർഡ് വിമാനയാത്രയടക്കമുള്ള വിഷയങ്ങളിൽ സംസ്ഥാന സർക്കാർ പ്രതിക്കൂട്ടിൽ നിൽക്കെ സിപിഐഎം സംസ്ഥാന സെക്രട്ടേറിയേറ്റ് യോഗം ഇന്ന് ചേരും. സർക്കാരിനെതിരായ സമരമാർഗങ്ങൾ ചർച്ചയാകും. എല്‍ഡിഎഫ് യോഗം ചേരുന്ന കാര്യത്തിലും തീരുമാനം ഉണ്ടാകും. ജില്ലാതലത്തിൽ ചേരാനിരിക്കുന്ന സിപിഐഎം വിപുലീകൃത കമ്മറ്റി സംബന്ധിച്ചും ചർച്ച വരും. സെക്രട്ടേറിയേറ്റ് പുനഃസംഘടിപ്പിച്ച സാഹചര്യത്തിൽ അംഗങ്ങളുടെ ചുമതലകൾ സംബന്ധിച്ചും യോഗം തീരുമാനമെടുക്കും.

എക്സൈസ് കേസിൽ അറസ്റ്റിലായ ആന്റോ അഗസ്റ്റിൻ നൽകിയ ജാമ്യാപേക്ഷ ഹൈക്കോടതി ഇന്ന് വീണ്ടും പരിഗണിക്കും. എക്സൈസിനോട് കൂടുതൽ തെളിവുകളുണ്ടെങ്കിൽ ഹാജരാക്കാൻ കോടതി കഴിഞ്ഞ ദിവസം നിർദേശിച്ചിരുന്നു. ബത്തേരി കോടതി ജാമ്യാപേക്ഷ തള്ളിയതോടെയാണ് ആന്റോ ഹൈക്കോടതിയെ സമീപിച്ചത്. മജിസ്ടേറ്റ് കോടതിയിൽ എക്സൈസ് കസ്റ്റഡി അപേക്ഷ സമർപ്പിച്ച സാഹചര്യത്തിൽ ജാമ്യാപേക്ഷ പരിഗണിക്കാനാവില്ലെന്ന് ചൂണ്ടിക്കാട്ടി ജസ്റ്റിസ് കൗസർ എടപ്പഗത്ത് ഹർജി ഇന്ന് പരിഗണിക്കാനായി മാറ്റുകയായിരുന്നു . വിദേശ മദ്യത്തിനൊപ്പം വ്യാജ മദ്യവും ആന്റോയുടെ വീട്ടിൽ നിന്നും പിടികൂടിയെന്നാണ് എക്സൈസ് കോടതിയെ അറിയിച്ചത്.

പിണറായി വിജയനെയും മുഹമ്മദ് റിയാസിനെയും ലക്ഷ്യമിട്ടുള്ള ഇഡി നീക്കത്തിൽ ലഘുലേഖ ഇറക്കി ജനങ്ങളോട് വിശദീകരിക്കാൻ സിപിഐഎം. ഇഡി സിപിഐഎമ്മിന് എതിരെ വേട്ടക്ക് ഇറങ്ങിയിരിക്കുന്നു എന്നാണ് ലഘുലേഖയിൽ പറയുന്നത്. ടി.വീണയ്ക്ക് എതിരായ നീക്കത്തിന് പിന്നിൽ പിണറായി വിജയന്റെ മകൾ എന്ന ഒറ്റക്കാരണം. പത്തുവർഷം മുഖ്യമന്ത്രിയായിരുന്ന പിണറായി വിജയൻ സിഎംആര്‍എല്ലിന് വഴിവിട്ട ഒരു സഹായവും നൽകിയില്ല. എക്സാലോജിക് കേസിൽ ഒന്നും കിട്ടാതായപ്പോഴാണ് ഇഡി റിയാസിലേക്ക് നീങ്ങിയത്. കോഴിക്കോട്ടെ റെയ്ഡ് മറ്റൊരു ഇടപെടൽ ലക്ഷ്യമിട്ടായിരുന്നു. പിണറായി വിജയനും സിപിഐഎമ്മിനും എതിരെ ഇത്തരത്തിൽ ഒട്ടേറെ കള്ളക്കഥകൾ നേരത്തെയും വന്നിട്ടുണ്ടെന്നും ലഘുലേഖയിൽ പറയുന്നു.

മഹാരാജാസ് കോളേജിലെ എസ്എഫ്ഐ പ്രവര്‍ത്തകന്‍ അഭിമന്യു വധക്കേസില്‍ രഹസ്യവിചാരണ ആവശ്യപ്പെട്ട് പ്രതികൾ നൽകിയ ഹർജിയിൽ വിധി ഇന്ന്. എറണാകുളം പ്രിൻസിപ്പൽ സെഷൻസ് കോടതിയാണ് വിധി പറയുക. സ്വകാര്യത മാനിച്ച് അടച്ചിട്ട കോടതിയിൽ വിചാരണ നടത്തണമെന്നും മാധ്യമങ്ങളെ വിലക്കണമെന്നുമാണ് പ്രതികളുടെ ആവശ്യം. അതേസമയം, പ്രതികളുടെ ആവശ്യത്തെ പ്രോസിക്യൂഷൻ എതിർത്തിരുന്നു. ഹർജി തള്ളണമെന്നാണ് സർക്കാരിന്റെ ആവശ്യം. അടുത്ത മാസം കേസിന്റെ സാക്ഷി വിസ്താരം തുടങ്ങാൻ ഇരിക്കെയാണ് പ്രതികളുടെ ഹർജി.

ഹരിയാനയിലെ ആര്യ നഗർ ഗ്രാമത്തില്‍ പ്രേമ വിവാഹത്തിന് വിലക്ക്. ഞായറാഴ്ച നടന്ന ഗ്രാമ പഞ്ചായത്തിലാണ് തീരുമാനം. വിലക്ക് ലംഘിച്ചാൽ ഗ്രാമത്തിൽനിന്ന് പുറത്തു പോകേണ്ടിവരും. പ്രേമവിവാഹങ്ങളെ കുടുംബങ്ങള്‍ പിന്തുണച്ചാല്‍ അവരെയും ബഹിഷ്കരിക്കുമെന്നുമാണ് തീരുമാനം. ഒരേ ഗ്രാമത്തിലുള്ളവർ സഹോദരീ സഹോദരൻമാരാണെന്നാണ് ഹരിയാനയിലെ വിശ്വാസം.

യാത്ര ചെയ്യുമ്പോള്‍ യൂണിഫോം ധരിക്കരുതെന്ന് പഞ്ചാബ് പൊലീസിന് നിര്‍ദേശം. വീട്ടില്‍നിന്ന് ഡ്യൂട്ടിക്ക് വരുമ്പോഴും, മടങ്ങുമ്പോഴും യൂണിഫോം ധരിക്കേണ്ട. നെയിം പ്ലേറ്റോ ബാഡ്ജോ ഉൾപ്പെടെ പ്രദർശിപ്പിക്കരുതെന്നുമാണ് നിര്‍ദേശം. അമൃത്‌സറില്‍ രണ്ടിടത്ത് പൊലീസിനുനേരെ വെടിവയ്പ്പുണ്ടായ സാഹചര്യത്തിലാണ് ബോർഡർ റേഞ്ച് ഐജിയുടെ നിര്‍ദേശം. അതേസമയം, ജനങ്ങൾക്ക് സംരക്ഷണം ഒരുക്കേണ്ട പൊലീസ് സ്വന്തം സുരക്ഷയ്ക്കായി ബാഡ്ജും യൂണിഫോമും ഒളിപ്പിക്കേണ്ടി വരുന്നത് സംസ്ഥാനത്തെ ക്രമസമാധാന തകർച്ചയുടെ തെളിവാണെന്ന് പ്രതിപക്ഷം ആരോപിച്ചു. പഞ്ചാബ് കത്തിയെരിയുമ്പോൾ മുഖ്യമന്ത്രി ഭഗവന്ത് മാൻ സ്റ്റേജിൽ തമാശ പറയുകയാണെന്ന് പിസിസി അധ്യക്ഷൻ അമരീന്ദർ സിംഗ് രാജ വാറിങ് പ്രതികരിച്ചു. അതേസമയം, അത്തരമൊരു നിര്‍ദേശം നല്‍കിയിട്ടില്ലെന്നും, പ്രചരിക്കുന്നത് വ്യാജ സന്ദേശമാണെന്നും പഞ്ചാബ് പൊലീസ് വ്യക്തമാക്കി.

അബ്‌കാരി കേസില്‍ റിപ്പോര്‍ട്ടര്‍ ടിവി എംഡി ആന്റോ അഗസ്റ്റിന് ജാമ്യം. ഹൈക്കോടതിയാണ് ആന്റോയുടെ ജാമ്യാപേക്ഷ അംഗീകരിച്ചത്. കര്‍ശന ഉപാധികളോടെയാണ് ജാമ്യം. മാനന്തവാടി ജില്ലാ ജയിലില്‍ റിമാന്‍ഡില്‍ കഴിയുകയായിരുന്നു ആന്റോ. നേരത്തെ, അനധികൃതമായി മദ്യം കൈവശം വെച്ച കേസിൽ ആന്റോയുടെ ജാമ്യാപേക്ഷ ബത്തേരി ജുഡീഷ്യൽ ഫസ്റ്റ്ക്ലാസ് മജിസ്‌ട്രേറ്റ് കോടതി തള്ളിയിരുന്നു. പിന്നാലെയാണ് ആന്റോ ഹൈക്കോടതി സമീപിച്ചത്. ജസ്റ്റിസ് കൗസര്‍ എടപ്പഗത്തിന്റെ ബെഞ്ചാണ് ജാമ്യം അനുവദിച്ചത്.

സിഎംആര്‍എല്‍-എക്സാലോജിക് കേസില്‍ ഇഡി ശുപാര്‍ശയില്‍ പ്രതിപക്ഷ നേതാവ് പിണറായി വിജയനെതിരെ അന്വേഷണം. മുഖ്യമന്ത്രി വി.ഡി. സതീശനും ആഭ്യന്തര മന്ത്രി രമേശ് ചെന്നിത്തലയും നടത്തിയ നിര്‍ണായക കൂടിക്കാഴ്ചയ്ക്കുശേഷമാണ് സര്‍ക്കാര്‍ തീരുമാനം. പി.എ. മുഹമ്മദ് റിയാസ് എംഎല്‍എയ്‌ക്കെതിരെയും അന്വേഷണം നടത്തും. ഇഡി കത്തിലെ വിവരങ്ങളാകും അന്വേഷിക്കുക. അന്വേഷണത്തിന്റെ സ്വഭാവം ഡിജിപി തീരുമാനിക്കും.

അഴിമതി നിരോധന നിയമപ്രകാരം ഇഡി ഡിജിപിക്ക് കൊടുക്കുന്ന കത്ത് അവഗണിക്കാനാവില്ലെന്ന് ആഭ്യന്തര മന്ത്രി രമേശ് ചെന്നിത്തല. സുപ്രീം കോടതി ഉത്തരവുകള്‍ ചൂണ്ടിക്കാട്ടിയാണ് ആഭ്യന്തര മന്ത്രിയുടെ വിശദീകരണം. പ്രാഥമിക അന്വേഷണം നടത്തിയിട്ട് മാത്രമേ എഫ്ഐആര്‍ ഇടാന്‍ പാടുള്ളൂ എന്ന കോടതി ഉത്തരവും നിയമോപദേശത്തിലുണ്ട്. മുഖ്യമന്ത്രിയുമായി നടത്തിയ ചര്‍ച്ചയ്ക്ക് ശേഷമാണ് അന്വേഷണത്തില്‍ തീരുമാനമെടുത്തത്. അന്വേഷണ ചുമതല ഡിജിപിക്ക് നല്‍കിയതായും രമേശ് ചെന്നിത്തല പറഞ്ഞു.

മഹാരാജാസ് കോളേജിലെ എസ്എഫ്ഐ വിദ്യാർഥി അഭിമന്യു വധക്കേസിൽ രഹസ്യവിചാരണ ആവശ്യപ്പെട്ട് പ്രതികൾ നൽകിയ ഹർജി കോടതി തള്ളി. എറണാകുളം പ്രിന്‍സിപ്പല്‍ സെഷന്‍സ് കോടതിയാണ് ഹർജി തള്ളിയത്. രഹസ്യ വിചാരണ നടത്താനുള്ള അടിയന്തര സാഹചര്യം കേസിൽ ഇല്ലെന്ന് ചൂണ്ടിക്കാട്ടി ആണ് കോടതിയുടെ ഉത്തരവ്. പരസ്യ വിചാരണ ഭാവി ജീവിതത്തെ ബാധിക്കുമെന്നും സാക്ഷിമൊഴികള്‍ സ്വാധീനിക്കപ്പെടാന്‍ സാധ്യതയുണ്ടെന്നുമുള്ള പ്രതിഭാഗത്തിന്‍റെ വാദവും കോടതി തള്ളി. വിചാരണ റിപ്പോര്‍ട്ട് ചെയ്യുകയെന്നത് മാധ്യമപ്രവര്‍ത്തകരുടെ അവകാശമാണെന്നും അത് നിഷേധിക്കരുതെന്നുമുള്ള പ്രോസിക്യൂഷന്‍ വാദം കോടതി അംഗീകരിച്ചു. കാമ്പസ് ഫ്രണ്ട്-പോപ്പുലര്‍ ഫ്രണ്ട് പ്രവർത്തകർ ആയ 16 പ്രതികൾ ആണ് രഹസ്യവിചാരണ ആവശ്യപ്പെട്ട് കോടതിയെ സമീപിച്ചത്. പ്രോസിക്യൂഷൻ കൈമാറിയ രേഖകൾ വായിച്ചു മറുപടി നൽകാൻ കേസ് കോടതി ഈ മാസം 26ലേക്ക് മാറ്റി. ഒക്ടോബർ 15നാണ് അഭിമന്യു കേസിൽ വിചാരണ നടപടികൾ ആരംഭിക്കുന്നത്.

കാസറഗോഡ് ബദിയടുക്കയിൽ ടവറിൽ കയറി ജീവനൊടുക്കുമെന്ന് ഭീഷണി മുഴക്കിയ വയോധികൻ മണികൂറുകളോളും എല്ലാവരെയും ആശങ്കയിലാക്കി. പെട്രോൾ നിറച്ച കന്നാസും തീപ്പെട്ടിയുമായാണ് ബദിയടുക്ക മൗവ്വാർ നെല്ലിയടുക്കം അഭയത്തിലെ പി.കെ. മോഹൻദാസ് മെബൈൽ ടവറിൽ കയറി ഭീഷണി മുഴക്കിയത്. രാവിലെ ഒമ്പത് മണിയോടെ ബദിയടുക്ക ടൗണിലെ മൊബൈൽ ടവറിലായിരുന്നു സംഭവം. തുടർന്ന് അഗ്നിരക്ഷാസേന സാഹസികമായി ടവറിൽ കയറി മോഹൻദാസിനെ സുരക്ഷിതമായി താഴെയിറക്കി. ഭൂമി ഇടപാടുമായി ബന്ധപ്പെട്ട തർക്കത്തിൽ താൻ ചതിക്കപ്പെട്ടെന്നും ഭൂമിയുടെ അതിരുകൾ കൃത്യമായി നിർണയിച്ച് നൽകണമെന്നുമുള്ള ആവശ്യങ്ങളാണ് ടവറിൽ കയറി പ്രതിഷേധിക്കാൻ മോഹൻദാസ് പതിവായി ഉന്നയിക്കുന്നത്. 2018 നവംബർ ഒന്നിന് കാസർകോട് കലക്ടറേറ്റിലെ മൊബൈൽ ടവറിൽ കയറിയതാണ് ആദ്യ സംഭവം. 2020 നവംബർ 30ന് ബദിയടുക്ക ബസ് സ്റ്റാൻഡ് പരിസരത്തെ സ്വകാര്യ ഭൂമിയിലെ മൊബൈൽ ടവറിൽ കയറി സമാനമായ രീതിയിൽ ജീവനൊടുക്കാൻ ശ്രമിച്ചിരുന്നു. വിവിധ ആവശ്യങ്ങളുന്നയിച്ച് 22 വർഷത്തിനിടെ നിരവധി തവണ സത്യഗ്രഹം നടത്തിയിട്ടും ഫലമുണ്ടായില്ലെന്നാണ് മോഹൻദാസ് ൻ്റെ പക്ഷം. ഇത്തവണയും മണിക്കൂറുകൾ നീണ്ട അനുനയശ്രമങ്ങൾക്കൊടുവിലാണ് അഗ്നിരക്ഷാസേനയുടെ ഇടപെടലിലൂടെയാണ് പ്രതിഷേധത്തിന് താത്കാലി വിരാമമായതും ടവറിന് മുകളിൽ നിന്ന് ഇറങ്ങിയതും .

സൗഹൃദ ക്രിക്കറ്റ് മത്സരത്തിൽ ഇന്ത്യയെ വിറപ്പിച്ച് ജപ്പാൻ... നയതന്ത്ര ബന്ധത്തിന്റെ 75ആം വാർഷികത്തന്റെ ഭാഗമായി നടത്തിയ മത്സരത്തിൽ രണ്ടു റൺസിനായിരുന്നു ഇന്ത്യയുടെ ജയം. മഴമൂലം 5 ഓവറിക്കി ചുരുക്കിയ മത്സരത്തിൽ 4 വിക്കറ്റ് നഷ്ടത്തിൽ 32 റൺസാണ് ഇന്ത്യ നേടിയത്. ഇന്ത്യക്കായി നായകൻ ശ്രേയസ് അയ്യർ 16 റൺസെടുത്തപ്പോൾ മറ്റ് മുൻനിര ബാറ്റർമാർക്കൊന്നും രണ്ടക്കം കാണാനായില്ല... മറുപടി ബാറ്റിങ്ങിനിറങ്ങിയ ജപ്പാന് 5 ഓവറിൽ 3 വിക്കറ്റ് നഷ്ടത്തിൽ 30 റൺസെടുക്കാനെ കഴിഞ്ഞുള്ളൂ... ഇന്ത്യക്കായി വാഷിങ്ടൺ സുന്ദർ 2 വിക്കറ്റെടുത്തു..

മൈക്രോ ഫിനാൻസ് കേസിൽ ആരോപണ വിധേയരെ വിചാരണ ചെയ്യാൻ സർക്കാർ അനുമതി ആവശ്യമാണോ എന്ന വിഷയത്തിൽ ഹൈക്കോടതി തീരുമാനമെടുക്കും. ജസ്റ്റിസ് എ. ബദറുദ്ദീൻ ഇക്കാര്യം വിധി പറയാൻ മാറ്റി. വിജിലൻസ് അന്തിമ റിപ്പോർട്ട് സമർപ്പിച്ച വയനാട് പുൽപ്പള്ളിയിലെ കേസിലെ പ്രോസിക്യൂഷൻ അനുമതി വിഷയമാണ് പരിഗണിക്കുന്നത്. പ്രത്യേക അനുമതി ആവശ്യമില്ലെന്ന് ചൂണ്ടിക്കാട്ടിയാണ് വായ്പാ ദാതാക്കളായ പിന്നാക്ക വിഭാഗ വികസന വകുപ്പ് ഉത്തരവിറക്കിയത്. എന്നാൽ അനുമതി അനിവാര്യമാണെന്ന് വിജിലൻസ് വകുപ്പും നിലപാടെടുത്തു. വ്യത്യസ്ത അഭിപ്രായം വന്ന സാഹചര്യത്തിൽ സർക്കാർ ഇതുസംബന്ധിച്ച തീരുമാനം കോടതിയുടെ തീർപ്പിന് വിടുകയായിരുന്നു.

മലപ്പുറം നിലമ്പൂര്‍ ടി.കെ നഗറിലെ കോട്ടപ്പുഴയിലെ മലവെള്ളപ്പാച്ചിലിൽ ഒഴുക്കിൽപ്പെട്ട സജിതയുടെ മൃതദേഹവും കണ്ടെത്തി. പൊട്ടിക്കല്ല് മുതൽ കോട്ടപ്പുഴ പാലം വരെയുള്ള ഭാഗത്ത് നടത്തിയ തിരച്ചിലിലാണ് മൃതദേഹം കണ്ടെത്തിയത്. ഇതോടെ മലവെള്ളപ്പാച്ചിലിൽ ഒഴുക്കിൽപ്പെട്ട് മരിച്ചവരുടെ എണ്ണം ആറായി. ഞായറാഴ്ച വൈകിട്ട് പുഴയിൽ തുണി അലക്കുന്നതിനിടെയാണ് മലവെള്ളപാച്ചിലിൽ സജിത ഉൾപ്പെടെ ആറു പേരെ കാണാതായത്. അപകടം ഉണ്ടായ ദിവസം രാത്രിയിൽ രണ്ടുപേരുടെ മൃതദേഹവും, ഇന്നലെ രാവിലെ നടത്തിയ തെരച്ചിലിൽ മൂന്നുപേരുടെ മൃതദേഹവും കണ്ടെത്തിയിരുന്നു. ടി.കെ നഗർ സ്വദേശിനിയായ സജിതയുടെ പോസ്റ്റുമോർട്ടം നടപടികൾ മഞ്ചേരി മെഡിക്കൽ കോളേജ് മോർച്ചറിയിൽ നടക്കും. മരിച്ചവരുടെ കുടുംബങ്ങൾക്കുള്ള സഹായം നൽകുന്ന കാര്യത്തിൽ നാളെ നടക്കുന്ന മന്ത്രിസഭായോഗത്തിൽ തീരുമാനം ഉണ്ടാകും.

രമ്യ ഹരിദാസ് എംഎല്‍എ ഉൾപ്പെട്ട ചിറയിൻകീഴ് കയ്യാങ്കളി ഒത്തുതീർപ്പാക്കാൻ കോൺഗ്രസ്. പ്രശ്നപരിഹാരത്തിന് നാലംഗ സമിതിയെ രൂപീകരിച്ചു. എം. വിൻസെന്റ്, പാലോട് രവി, നെയ്യാറ്റിൻകര സനൽ, കെ.എസ്. ശബരീനാഥൻ എന്നിവരാണ് സമിതി അംഗങ്ങള്‍. രമ്യ ഹരിദാസിനും സജിത്തിനും എതിരെ നടപടി ഉണ്ടായേക്കില്ല. അതേസമയം, രണ്ടുപേര്‍ക്കും താക്കീത് നല്‍കിയിട്ടുണ്ട്. കെപിസിസി പ്രസിഡന്റ് സണ്ണി ജോസഫ് പാര്‍ട്ടി ആസ്ഥാനത്തേക്ക് വിളിപ്പിച്ചാണ് രമ്യക്ക് താക്കീത് നല്‍കിയത്. പാളയം പ്രദീപിനെ സ്റ്റാഫ് ആക്കേണ്ട. വിഷയത്തില്‍ പരസ്യപ്രതികരണം വേണ്ടെന്നുമാണ് നിര്‍ദേശം. കേസുകൾ പിൻവലിക്കാന്‍ രണ്ടുപേരോടും ആവശ്യപ്പെട്ടിട്ടുണ്ട്. തർക്കങ്ങൾ ഒഴിവാക്കി മുന്നോട്ടു പോകാനാണ് കോണ്‍ഗ്രസ് നീക്കം.

കേരളത്തിലെ യുഡിഎഫ് സര്‍ക്കാര്‍ സംഘപരിവാറിന്റെ ബി ടീമായാണ് പ്രവര്‍ത്തിക്കുന്നതെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദന്‍. മോദിയും ഇഡിയും വിഡിയും ഒത്തുചേര്‍ന്ന പ്രത്യേക കൂട്ടുകെട്ടാണത്. അതിന്റെ ഭാഗമായാണ് ഇഡി നിര്‍ദേശപ്രകാരം കേസെടുത്തത്. ഇഡിയെ ഉപയോഗപ്പെടുത്തി പ്രതിപക്ഷ നേതാക്കൾക്കെതിരെ നിലപാട് സ്വീകരിച്ചു വരികയാണ് കേന്ദ്ര സർക്കാർ. അത് പിന്തുടരുകയാണ് യുഡിഎഫ് സര്‍ക്കാര്‍. കോലീബി കാലംതൊട്ട് ആരംഭിച്ച ഈ കൂട്ടുകെട്ട് ഇപ്പോഴും തുടരുന്നു. തെരഞ്ഞെടുപ്പ് സമയത്ത് പരസ്പരം സഹായിച്ചു. ഭരണത്തിൽ എത്തിയപ്പോൾ ആ ബന്ധം കൂടുതലായി തുടരുന്നു. പിണറായി വിജയനെ ലക്ഷ്യമിട്ടാണ് ഇഡിയുടെ നടപടികളെന്നത് പാര്‍ട്ടി നേരത്തെ തന്നെ വ്യക്തമാക്കിയതാണ്. ഇഡിക്ക് ലഭിച്ച ഓരോ മൊഴികളും ഒന്നൊഴിയാതെ പിൻവലിക്കപ്പെട്ടിട്ടുണ്ട്. അങ്ങനെയുള്ള മൊഴികളുടെ അടിസ്ഥാനത്തില്‍ കേസെടുക്കുന്നത് കേട്ടുകേള്‍വി പോലും ഇല്ല. രാഷ്ട്രീയ ലക്ഷ്യം വെച്ചുള്ള ശ്രമമാണ് നടക്കുന്നത്. സിഎംആര്‍എല്ലില്‍നിന്ന് അനധികൃതമായി പണം വാങ്ങിയെന്ന് സമ്മതിച്ച രണ്ടു മന്ത്രിമാർ യുഡിഎഫ് മന്ത്രിസഭയിലുണ്ട്. എന്തിനാണ് പണം വാങ്ങിയത് എന്ന് വ്യക്തമാക്കണം. തെരഞ്ഞെടുപ്പ് ഫണ്ട് എന്നാണ് പറഞ്ഞത്. എന്നാല്‍, 20000 രൂപയില്‍ കൂടുതലുള്ള പണം അക്കൗണ്ട് വഴിയെ വാങ്ങാവൂ. ഇഡി ശുപാര്‍ശയിലുള്ള അന്വേഷത്തിനെതിരെ ശക്തമായ പ്രതിരോധം തീര്‍ക്കും. അന്വേഷണത്തെ നിയമപരമായും രാഷ്ട്രീയപരമായും നേരിടും. രാഷ്ട്രീയ വേട്ടയ്ക്കെതിരെ കേരളം ഒറ്റക്കെട്ടായി മുന്നോട്ടുപോകും. സിപിഐഎം സംസ്ഥാന വ്യാപകമായി ഇന്ന് വൈകീട്ട് പ്രതിഷേധം സംഘടിപ്പിക്കുമെന്നും എം.വി. ഗോവിന്ദ‍ന്‍ വ്യക്തമാക്കി.

അടുത്ത 3 മണിക്കൂറിൽ കേരളത്തിലെ പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനും; കൊല്ലം, മലപ്പുറം ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

(പുറപ്പെടുവിച്ച സമയവും തീയതിയും 07.00 PM; 22/09/2026)

സർവീസ് ക്ലിനിക്കിന്റെ ഉദ്ഘാടനം നാളെ, സെപ്റ്റംബർ 23 ബുധനാഴ്ച ഉച്ചയ്ക്ക് 2 മണിക്ക് സെക്രട്ടേറിയറ്റ് അനക്സ് 2-ലെ ലയം ഹാളിൽ വെച്ച് നടക്കും. ഉന്നത വിദ്യാഭ്യാസ വകുപ്പിൽ കെട്ടിക്കിടക്കുന്ന സർവീസ് സംബന്ധമായ ഫയലുകളും പരാതികളും കാലതാമസമില്ലാതെ തീർപ്പാക്കുക എന്ന ലക്ഷ്യത്തോടെ പുതിയൊരു സംരംഭത്തിന് തുടക്കം കുറിക്കുകയാണെന്ന് മന്ത്രി റോജി. എം ജോൺ പറഞ്ഞു. ജീവനക്കാരുടെ ന്യായമായ ആവശ്യങ്ങളും പ്രശ്നങ്ങളും വേഗത്തിൽ പരിഹരിക്കപ്പെടേണ്ടതുണ്ട്.

ജീവനക്കാരുടെ പ്രൊമോഷൻ, പെൻഷൻ, സർവീസ് ക്രമവൽക്കരണം, അർഹമായ മറ്റ് ആനുകൂല്യങ്ങൾ എന്നിവയുമായി ബന്ധപ്പെട്ട തടസ്സങ്ങൾ സമയബന്ധിതമായി നീക്കുകയാണ് ഈ സർവീസ് ക്ലിനിക്കിലൂടെ ലക്ഷ്യമിടുന്നത്. കൃത്യമായ നിയമോപദേശത്തോടെ ഫയലുകൾ വേഗത്തിൽ തീർപ്പാക്കാൻ ഉന്നത വിദ്യാഭ്യാസ വകുപ്പിലെയും ധനകാര്യ, നിയമ വകുപ്പുകളിലെയും മുതിർന്ന ഉദ്യോഗസ്ഥർ നേരിട്ട് സർവീസ് ക്ലിനിക്കിന് നേതൃത്വം നൽകും. തുടർന്ന് ഒന്നിടവിട്ടുള്ള ശനിയാഴ്ചകളിൽ ക്ലിനിക്കിൻ്റെ സേവനം ലഭ്യമായിരിക്കും. ഭരണനിർവ്വഹണം കൂടുതൽ കാര്യക്ഷമവും ജീവനക്കാർക്ക് ആശ്വാസകരവുമാക്കാൻ ഈ ഇടപെടൽ വഴിയൊരുക്കുമെന്ന് പ്രതീക്ഷിക്കുന്നതായി മന്ത്രി റോജി. എം ജോൺ പറഞ്ഞു.

എറണാകുളം കാക്കനാട് അമ്പാടിമൂലയിൽ രണ്ടാം ഭാര്യയെ പെട്രോൾ ഒഴിച്ചു തീ കൊളുത്തി ഭർത്താവ്. പ്രതിയായ ഭർത്താവ് അനിൽ കുമാറിനെ പൊലീസ് അറസ്റ്റ് ചെയ്തു. രണ്ടാം ഭാര്യയായ ജയശ്രീയെയാണ് ഇയാൾ ആക്രമിച്ചത്. ഗുരുതരമായി പരുക്കേറ്റ യുവതി ആശുപത്രിയിൽ ചികിത്സയിലാണ്.

അടുത്ത 3 മണിക്കൂറിൽ കേരളത്തിലെ കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.