സ്കൂൾ കായികമേളകളിൽ ഉത്തേജക മരുന്ന്: ഗൗരവത്തോടെ കാണുന്നുവെന്ന് കായിക മന്ത്രി

സ്കൂൾ കായികമേളകളിൽ ഉത്തേജക മരുന്നുകളുടെ ഉപയോഗവുമായി ബന്ധപ്പെട്ട് ഉയർന്നുവരുന്ന വാർത്തകളെ ഗൗരവത്തോടെ കാണുന്നുവെന്ന് കായിക മന്ത്രി ഒ.ജെ. ജനീഷ്. സ്കൂൾ കായികമേളകളിൽ ഉത്തേജകമരുന്ന് പരിശോധന ശക്തമാക്കും. നാഡയുടെ (NADA) സഹകരണത്തോടെ പരിശോധനാ സംവിധാനം കൊണ്ടുവരും. പ്രധാന മത്സരങ്ങളിൽ റാൻഡം, ടാർഗറ്റഡ് പരിശോധനകൾ നടത്തും. സാമ്പിൾ ശേഖരിച്ച് അംഗീകൃത ലാബുകളിൽ പരിശോധന നടത്തും. കുട്ടികളെ തെറ്റിദ്ധരിപ്പിച്ച് ഇത്തരം ഉത്തേജക മരുന്നുകൾ നൽകുന്ന കായിക അധ്യാപകർക്കെതിരെയും നടപടി എടുക്കും.

ഇടുക്കി അടിമാലിയിൽ രാസവസ്തു ഉള്ളിൽ ചെന്ന് ഇരട്ടക്കുട്ടികൾ മരിച്ചു. ഇരുമ്പുപാലം ഒഴുവത്തടം സ്വദേശി വലിയകാട്ടിൽ അഫ്സൽ - സാന്ദ്ര ദമ്പതികളുടെ ഇളയ ഇരട്ടക്കുട്ടികളാണ് മരിച്ചത്. ഇഹാൻ, റിഹാൻ ഇരുവർക്കും ഒരു വയസ്സ് മാത്രമാണ് പ്രായം. പിതാവാണ് കുട്ടികളെ ആശുപത്രിയിൽ എത്തിച്ചത്. ഇയാളെ പോലീസ് ചോദ്യം ചെയ്യുകയാണ്.

ബ്രിക്സ് ബിസിനസ് മീറ്റിൽ ഇറാനെതിരായ യുഎസ് ഉപരോധങ്ങളെ വിമർശിച്ച് ഇറാൻ പ്രസിഡൻ്റ് മസൂദ് പെസഷ്കിയാൻ. സഹകരണത്തിൻ്റെ പുതിയ സാധ്യതകൾ ബ്രിക്സ് തേടണമെന്നും അദ്ദേഹം ഓർമിപ്പിച്ചു.

വിവാദ പ്രസ്താവനയ്ക്ക് പിന്നാലെ കെ.എം.എസ്.സി.എൽ മാനേജിംഗ് ഡയറക്ടർ പോസ്റ്റിൽ നിന്നും ഡോ. രേണു രാജ് ഐഎഎസിനെ മാറ്റി. കെ.എം.എസ്.സി.എൽ ക്വാളിറ്റി കൺട്രോൾ വിഭാഗം നിർത്തലാക്കിയ സംഭവത്തിലെ പ്രതികരണത്തിന് പിന്നാലെയാണ് മാറ്റം. ‘കെ.എം.എസ്.സി.എൽ ക്വാളിറ്റി കൺട്രോൾ വിഭാഗം നിർത്തരുതെന്നും നിലവാരമില്ലാത്ത മരുന്നുകളൊന്നും KMSCL പിടികൂടിയിട്ടില്ല എന്നായിരുന്നു പ്രസ്താവന. പരസ്യ പ്രസ്താവനയിൽ ആരോഗ്യമന്ത്രിക്ക് അതൃപ്തി ഉണ്ടായിരുന്നു. കെ.എം.എസ്.സിഎൽ വാങ്ങിയ മരുന്നുകളിൽ കോടിക്കണക്കിന് രൂപയുടെ മരുന്നുകൾക്ക് നിലവാരമില്ലെന്ന് കണ്ടെത്തിയതോടെ ആണ് നിലവാരം ഉറപ്പാക്കാനുള്ള ചുമതല ഡ്രഗ്സ് കൺട്രോൾ വകുപ്പിന് നൽകിയത്.

ആസൂത്രണ ബോർഡ് പരീക്ഷാ ക്രമക്കേട് കേസിൽ പിഎസ്‌സി കമ്മീഷൻ അംഗങ്ങളുടെ വാദം അംഗീകരിക്കാതെ ക്രൈംബ്രാഞ്ച്. ക്രൈംബ്രാഞ്ച് ആസ്ഥാനത്ത് ചെയര്‍മാനും അംഗങ്ങളും ഹാജരാകണമെന്ന നിലപാടിലുറച്ച് നിൽക്കുകയാണ് എസ്ഐടി. അന്വേഷണ ഏജന്‍സിക്ക് മുന്നില്‍ ഹാജരാകാന്‍ പ്രോട്ടോകോള്‍ ബാധകമല്ലെന്നും അന്വേഷണസംഘം ചൂണ്ടിക്കാട്ടി.

ന്യൂസ് മലയാളം പുറത്തുകൊണ്ടുവന്ന സംസ്ഥാന ആസൂത്രണ ബോർഡിലെ പരീക്ഷാ ക്രമക്കേടുമായി ബന്ധപ്പെട്ട് ഉത്തരക്കടലാസുകളുടെ പുനർമൂല്യനിർണയം പി.എസ്.സി പൂർത്തിയാക്കി. നേരത്തെ പരിശോധിക്കാതെ ഒഴിവാക്കിയ 58 മാർക്കിന്റെ 10 ചോദ്യങ്ങളാണ് ഓൺസ്ക്രീൻ മാർക്കിങ് വഴി വീണ്ടും പരിശോധിച്ചത്. പുനർമൂല്യനിർണയത്തിന്റെ അടിസ്ഥാനത്തിൽ ചീഫ് ഇൻഡസ്ട്രിയൽ ആൻഡ് ഇൻഫ്രാസ്ട്രക്ചർ, ചീഫ് പ്ലാനിങ് കോ-ഓർഡിനേഷൻ എന്നീ തസ്തികകളിലേക്കുള്ള ചുരുക്കപ്പട്ടിക പി.എസ്.സി. ഉടൻ പ്രസിദ്ധീകരിക്കും. ഇതിനുശേഷം, പട്ടികയിൽ പുതുതായി ഉൾപ്പെടുന്ന ഉദ്യോഗാർത്ഥികൾക്കായി അഭിമുഖം നടത്താനുള്ള തയ്യാറെടുപ്പുകളും പി.എസ്.സി ആസ്ഥാനത്ത് ആരംഭിച്ചിട്ടുണ്ട്.

​അതേസമയം, പരീക്ഷാ ക്രമക്കേടുമായി ബന്ധപ്പെട്ട ചോദ്യം ചെയ്യലിനായി ക്രൈംബ്രാഞ്ച് ആസ്ഥാനത്ത് ഹാജരാകാൻ കഴിയില്ലെന്ന് പി.എസ്.സി. അംഗങ്ങൾ രേഖാമൂലം എസ്.ഐ.ടി. മേധാവി അജിതാ ബീഗത്തിന് കത്ത് നൽകി. അന്വേഷണ ഉദ്യോഗസ്ഥർക്ക് മൊഴിയെടുക്കാനായി പി.എസ്.സി. ആസ്ഥാനത്തെ തങ്ങളുടെ ചേമ്പറിലെത്താമെന്നും, അന്വേഷണവുമായി പൂർണ്ണമായും സഹകരിക്കാൻ തയ്യാറാണെന്നും അംഗങ്ങളായ ഡോ. ശ്രീകുമാർ, എസ്.എ.സെയ്ഫ്, അബ്ദുൽ സമദ്, ഡോ. സി.കെ. ഷാജിബ് എന്നിവർ ക്രൈംബ്രാഞ്ചിനെ അറിയിച്ചു.

കൊല്ലം പുനലൂർ താലൂക്ക് ആശുപത്രിയിൽ അടിയന്തര പ്രസവ ശസ്ത്രക്രിയയ്ക്കു വിധേയമാക്കിയ യുവതിയുടെ നവജാത ശിശു മരിച്ച സംഭവത്തിൽ ഡിഎംഒ ഓഫീസിൽ നിന്നുള്ള നാലംഗ വിദഗ്ധ സംഘം പുനലൂർ താലൂക്ക് ആശുപത്രിയിലെത്തി അന്വേഷണം ആരംഭിച്ചു. ഏരൂർ സ്വദേശികളായ അനൂപ്- ശ്രുതി ദമ്പതികളുടെ പെൺകുഞ്ഞാണ് മരിച്ചത്. സം ഭവത്തെക്കുറിച്ച് അടിയന്തര അന്വേഷണത്തിന് മന്ത്രി ബിന്ദു ൻ്റെ അടിസ്‌ഥാനത്തിലാണ് കൃഷ്ണ ഉത്തരവിട്ടിരുന്നു. ശ്രുതിയെ പ്രസവ ശസ്ത്രക്രിയയ്ക്കു വിധേയമാക്കിയതുമായി ബന്ധപ്പെട്ട് എല്ലാ ജീവനക്കാരുടെയും മൊഴി രേഖപ്പെടുത്തി.ജില്ലാ പ്രൊഡക്ടീവ് ചൈൽഡ് ഹെൽത്ത് ഓഫിസർ, ജില്ലാ നഴ്സിങ് മേധാവി, ഗൈനക്കോളജിസ്‌റ്റ്, ശിശുരോഗ വിദഗ്ധൻ എന്നിവരുൾപ്പെട്ട സംഘമാണ് അന്വേഷണത്തിന് എത്തിയത്.ശസ്ത്രക്രിയയ്ക്ക് നേതൃത്വം നൽകിയ ഗൈനക്കോളജിസ്റ്റ‌്, അനസ്ത‌റ്റിസ്‌റ്റ്, നഴ്സിങ് സൂപ്രണ്ട്, ഡ്യൂട്ടിയിലുണ്ടായിരുന്ന നഴ്സു‌മാർ, അറ്റൻഡർമാർ, ചികിത്സയിൽ കഴിയുന്ന ശ്രുതി എന്നിവരിൽ നിന്നും മണിക്കൂറുകൾ ചെലവഴിച്ചാണ് അന്വേഷണ സംഘം മൊഴിയെടുത്തത്.

സർവീസ് നടത്തുന്നതിനിടെ എറണാകുളം ഇടപ്പള്ളിയിൽ വെച്ച് ക്ലീനറുമായി തർക്കത്തിൽ ഏർപ്പെട്ടതിനെ തുടർന്ന് നടുറോഡിൽ ബസ് ഉപേക്ഷിച്ച് പോയ സംഭവത്തിൽ ഡ്രൈവറുടെ ലൈസൻസ് സസ്പെന്‍ഡ് ചെയ്തു. മോട്ടോർ വാഹന വകുപ്പാണ് തൃശ്ശൂർ സ്വദേശിയായ എൽ എം രജീഷിന്റെ ലൈസൻസ് മൂന്ന് മാസത്തേക്ക് സസ്പെന്‍ഡ് ചെയ്തത്. കഴിഞ്ഞ ദിവസം ഇടപ്പള്ളിയിൽ വെച്ചായിരുന്നു സംഭവം. കളമശേരി-തേവര റൂട്ടിൽ സർവീസ് നടത്തുന്ന 'കൃതിക' ബസ് ആണ് ഡ്രൈവർ രജീഷ് റോഡിൽ ഉപേക്ഷിച്ച് പോയത്. മറ്റ് ജീവനക്കാർക്ക് വാഹനം ഓടിക്കാൻ അറിയാതിരുന്നതിനെ തുടർന്ന് മണിക്കൂറുകളോളം റോഡിൽ ഗതാഗത തടസ്സം ഉണ്ടായി. പിന്നീട് പൊലീസ് ഇടപെട്ടാണ് ബസ് വഴിയിൽ നിന്ന് മാറ്റിയത്. ലൈസൻസ് സസ്പെൻഡ് ചെയ്യുന്നതിനു മുന്നോടിയായി ഡ്രൈവർക്ക് നോട്ടീസ് നൽകി വിശദീകരണം തേടിയിരുന്നു. എന്നാൽ ഇയാൾ നൽകിയ വിശദീകരണം തൃപ്തികരമല്ലെന്ന് കണ്ടെത്തിയതിനെ തുടർന്നാണ് ആർടിഒ കെ ആർ സുരേഷ് മൂന്നുമാസത്തേക്ക് ലൈസൻസ് സസ്പെൻഡ് ചെയ്യാൻ ഉത്തരവിട്ടത്. ബസിനെതിരെ സ്വീകരിക്കേണ്ട നടപടികൾ സംബന്ധിച്ച് ആർടിഎ ബോർഡ് തീരുമാനമെടുക്കുമെന്നും ആർടിഒ അറിയിച്ചു.

സെക്രട്ടറിയേറ്റ് മാർച്ച് സംഘർഷവുമായി ബന്ധപ്പെട്ട് എസ്എഫ്ഐ കണ്ണൂർ ജില്ലാ സെക്രട്ടറി ജോയൽ കസ്റ്റഡിയിൽ. തിരുവനന്തപുരം കന്റോണ്‍മെന്റ് പൊലീസാണ് കണ്ണൂരിൽ നിന്ന് ഇന്ന് പുലർച്ചെ ജോയലിനെ കസ്റ്റഡിയിലെടുത്തത്.. തിരുവന്തപുരത്ത് എത്തിച്ച ശേഷം പ്രതിയുടെ അറസ്റ്റ് രേഖപ്പെടുത്തുമെന്ന് പൊലീസ് വ്യക്തമാക്കി... ഇതോടെ കുറ്റകരമായ നരഹത്യ ഉൾപ്പെടെയുള്ള വകുപ്പുകൾ ചുമത്തി ചാർജ് ചെയ്ത കേസിൽ അറസ്റ്റിലായ പ്രതികളുടെ എണ്ണം അഞ്ചായി.. കേന്ദ്രക്കമ്മിറ്റി അംഗങ്ങളായ ടോണി കുര്യാക്കോസ്, എസ് കെ ആദർശ്, തിരുവനന്തപുരം ജില്ലാ സെക്രട്ടേറിയേറ്റംഗം മനേഷ്, യൂണിവേഴ്സിറ്റി കോളജ് യൂണിറ്റ് സെക്രട്ടറി പവേൽ ശ്യാം എന്നിവരാണ് നേരത്തെ അറസ്റ്റിലായത്.. നാലു പ്രതികളും നിലവിൽ റിമാൻഡിലാണ്... വന്ദേമാതര ഗാന വിവാദവുമായി ബന്ധപ്പെട്ട് എസ് എഫ് ഐയു പ്രതിഷേധത്തിന് നേരെ പൊലീസ് നടത്തിയ ആക്രമണത്തിൽ പ്രതിഷേധിച്ചാണ് സെക്രട്ടേറിയേറ്റ് മാർച്ച് നടത്തിയത്..

സംസ്ഥാനത്തെ വൈദ്യുതി പ്രതിസന്ധി എൽഡിഎഫ് സർക്കാർ ഉണ്ടാക്കിയതെന്ന് മന്ത്രി എ.പി. അനിൽകുമാർ. മൂന്നു മാസം കൊണ്ട് പരിഹരിക്കാവുന്ന ഒന്നല്ല വൈദ്യുതി മേഖലയിലെ അവസ്ഥ. ക്രൈസിസ് മാനേജ് ചെയ്യാനുള്ള ശ്രമമാണ് ഇപ്പോൾ നടക്കുന്നതെന്നും മന്ത്രി പറഞ്ഞു. അതേസമയം, പത്തുവർഷമായി എന്തുകൊണ്ട് പവർകട്ട് ഇല്ലായിരുന്നു എന്ന ചോദ്യത്തിന് മന്ത്രി മറുപടി പറഞ്ഞില്ല. കെപിസിസി പ്രസിഡന്റിനെ ഉചിത സമയത്ത് തീരുമാനിക്കും. മാധ്യമങ്ങളുടെ ഉൽക്കണ്ഠ അംഗീകരിക്കുന്നുവെന്നും അനില്‍ കുമാര്‍ പറഞ്ഞു.

കനത്ത ചൂടിൽ സംസ്ഥാനത്ത് വൈദ്യുതി ഉപഭോഗം വർധിക്കുന്നു. ഇന്നലെ ആകെ ഉപയോഗം 96.02 ദശലക്ഷം യൂണിറ്റ് വൈദ്യുതിയാണ് ഉപയോഗിച്ചത്. ഉയർന്ന ആവശ്യകത 5024 മെഗാവാട്ടിലെത്തി. അതേസമയം, പവർ എക്സ്ചേഞ്ചിൽ നിന്നുള്ള വൈദ്യുതി ലഭ്യത കുത്തനെ കുറഞ്ഞു. ഡാമുകളിൽ കഴിഞ്ഞവർഷത്തെ അപേക്ഷിച്ച് 16 ശതമാനം വെള്ളം കുറവാണെന്നും കെഎസ്ഇബി അറിയിച്ചു. അതിനാല്‍, കടുത്ത വൈദ്യുതി നിയന്ത്രണം വരും ദിവസങ്ങളിലും തുടരും.

പാലക്കാട് പട്ടാമ്പി കൊപ്പം എറയൂർ ശ്രീതിരുവളയനാട് ഭഗവതി ക്ഷേത്രത്തില്‍ കവര്‍ച്ച നടത്തിയത് ബിജെപി നേതാക്കള്‍. സിസിടിവി ക്യാമറകൾ മറച്ച് ഇരുമ്പ് ഗ്രിൽ മുറിച്ചു കടത്തുകയായിരുന്നു. ഇതിന്റെ ദൃശ്യങ്ങള്‍ സിസിടിവിയിൽ പതിഞ്ഞിരുന്നു. ബിജെപി കൊപ്പം മണ്ഡലം വൈസ് പ്രസിഡന്റ് എം. പരമേശ്വരൻ, ബിജെപി മുൻ പഞ്ചായത്ത് പ്രസിഡന്റ് ചില്ലവീട്ടിൽ ഗോപിനാഥൻ എന്നിവർക്കെതിരെ പൊലീസ് കേസെടുത്തു. സെപ്ത‌ംബർ മൂന്നിനായിരുന്നു മോഷണം.

വന്ദേമാതരം ആലാപനവുമായി ബന്ധപ്പെട്ട് ജമ്മു കശ്മീരിലെ സഖ്യ സര്‍ക്കാരില്‍ ഭിന്നത. വന്ദേ മാതരം ആലാപനം സംബന്ധിച്ച എഐസിസി നിലപാട് തള്ളിയതിലും മുഖ്യമന്ത്രി ഒമർ അബ്ദുള്ളയുടെ പരാമർശങ്ങളിലും കോൺഗ്രസ് നേതാക്കൾക്ക് വിയോജിപ്പ്. വന്ദേമാതരം ആലപിക്കുന്നതുമായി ബന്ധപ്പെട്ട കോൺഗ്രസ് നിർദേശത്തോട് രൂക്ഷ ഭാഷയിലായിരുന്നു ഒമർ അബ്ദുള്ളയുടെ പ്രതികരണം. കശ്മീരികളെ ജയിലിൽ അടയ്ക്കണമെന്നാണോ നിങ്ങൾ ആഗ്രഹിക്കുന്നതെന്ന് വിഷയത്തിൽ നാഷണൽ കോൺഫറൻസിന് ഉപദേശം നൽകിയ കോൺഗ്രസിനോട് ഒമർ അബ്ദുള്ള ചോദിച്ചു. വന്ദേമാതരം പൂർണരൂപത്തിൽ ആലപിക്കേണ്ടത് നിയമപരമായ ബാധ്യതയാണെന്ന നിലപാടിലാണ് ജമ്മു കശ്മീർ മുഖ്യമന്ത്രി. ശ്രീനഗറിൽ ചലച്ചിത്രോത്സവവേദിയിൽ വന്ദേമാതരം പൂർണമായി ആലപിച്ചതിൽ കോൺഗ്രസ് ജനറൽ സെക്രട്ടറി കെ.സി. വേണുഗോപാൽ അതൃപ്തി പ്രകടിപ്പിച്ചിരുന്നു. 'സ്വാതന്ത്ര്യസമര സേനാനികളുടെ ജ്ഞാനത്തെയും തീരുമാനങ്ങളെയും മാനിക്കാനും അവർ അംഗീകരിച്ച മനോഹരവും ചരിത്രപ്രധാനവുമായ ഗാനത്തിന്റെ പതിപ്പുമാത്രം ആലപിക്കുന്നതിൽ ഞങ്ങളോടൊപ്പം നിൽക്കാന്‍ സഖ്യകക്ഷികളോട് അഭ്യർഥിക്കുന്നു' എന്നായിരുന്നു വേണുഗോപാൽ എക്സിൽ കുറിച്ചത്.

മാവോയിസ്റ്റ് അനുകൂല പുസ്തകം കൈവശം വയ്ക്കുന്നതും ആക്ടിവിസ്റ്റുകളെ പിന്തുണച്ച് മുദ്രാവാക്യം വിളിക്കുന്നതും ദേശവിരുദ്ധ പ്രവർത്തനമല്ലെന്ന് മുംബൈ സിജെഎം കോടതി. ഉമർ ഖാലിദിനെയും ഷർജീൽ ഇമാമിനെയും പിന്തുണച്ച് മുദ്രാവാക്യം വിളിച്ചതിന് അറസ്റ്റിലായ ടിഐഎസ്എസ് വിദ്യാർഥിക്ക് ജാമ്യം അനുവദിച്ചാണ് കോടതി നിരീക്ഷണം.അഭിരൂപ് ആഷിം പോൾ എന്ന വിദ്യാർഥിക്കാണ് കോടതി ജാമ്യം നൽകിയത്.

വൈദ്യുതി മന്ത്രി സണ്ണി ജോസഫ് പ്രസംഗിക്കുന്നതിനിടെ വൈദ്യുതി മുടങ്ങി. എറണാകുളത്ത് കെഎസ്ഇബി ഓഫീസേഴ്സ് ഫെഡറേഷന്റെ സംസ്ഥാന സമ്മേളനത്തിൽ പ്രസംഗിക്കുമ്പോഴായിരുന്നു വൈദ്യുതി മുടക്കം. പാതിവഴിയില്‍ പ്രസംഗം അവസാനിപ്പിച്ച മന്ത്രി, എപ്പോള്‍ പ്രസംഗം നിര്‍ത്തണമെന്നുള്ള ടെക്നിക്കല്‍ ഇന്‍ഫോര്‍മേഷന്‍ എന്നാണ് തമാശയായി പ്രതികരിച്ചത്. മാധ്യമപ്രവര്‍ത്തകരുടെ ചോദ്യത്തിലും മന്ത്രി ഇക്കാര്യം ആവര്‍ത്തിച്ചു. എന്റെ പ്രസംഗം നിര്‍ത്തണമെന്ന് വൈദ്യുതി വകുപ്പിന് അറിയാമെന്ന് മന്ത്രി പറഞ്ഞു. എന്നാല്‍, ഇത് ജനങ്ങള്‍ അനുഭവിക്കുന്ന ദുരന്തത്തിന്റെ ഭാഗമല്ല. പകല്‍സമയത്ത് വൈദ്യുതി നിയന്ത്രണമില്ല. ഇത് ഒരു സെക്കന്‍ഡ് നേരത്തേക്കുള്ള പവര്‍ ഫെയില്യര്‍ ആണ്. അത് എവിടെയും സംഭവിക്കാമെന്നും മന്ത്രി പറഞ്ഞു.

ആര്യനാട് -കുളപ്പട റോഡിൽ രാഹുൽ എന്ന യുവാവിനെ മരിച്ച നിലയിൽ കണ്ടെത്തിയത് കൊലപാതകം. സംഭവത്തില്‍ രാഹുലിന്റെ സുഹൃത്തുക്കളായ അരുണ്‍, കിരണ്‍, സുബീഷ്, സാജന്‍ എന്നിവരെ പൊലീസ് കസ്റ്റഡിയിലെടുത്തു. മദ്യപാനത്തിനിടെ ഉണ്ടായ തർക്കമാണ് കൊലപാതകത്തിന് കാരണം. അതിക്രൂരമായാണ് പ്രതികള്‍ രാഹുലിനെ കൊലപ്പെടുത്തിയത്. കത്തിയും കമ്പിയും ഉപയോഗിച്ചുള്ള ക്രൂരമായ മര്‍ദനമാണ് മരണത്തിന് കാരണമായത്. രക്ഷപ്പെടാൻ ശ്രമിക്കുന്നതിനിടെ നെയ്യാറ്റിൻകര റെയിൽവേ സ്റ്റേഷൻ, നെടുമങ്ങാട് ബസ് സ്റ്റാൻഡ് എന്നിവിടങ്ങളിൽ നിന്നാണ് പ്രതികളെ പിടികൂടിയത്. പിടിയിലായ സുബീഷ് 15ഓളം കേസിൽ പ്രതിയാണ്. രാഹുലിന്റെ ഭാര്യയെ കുറിച്ച് പ്രതികൾ മോശമായി സംസാരിച്ചതിനെ തുടര്‍ന്നുണ്ടായ വാക്കുതര്‍ക്കമാണ് അക്രമത്തില്‍ കലാശിച്ചത്. ഇന്നലെ വൈകിട്ട് അഞ്ചരയോടെയാണ് വഴിയരികില്‍ മരിച്ച നിലയില്‍ രാഹുലിനെ നാട്ടുകാര്‍ കണ്ടത്. പൊലീസ് നടത്തിയ പരിശോധനയില്‍ രാഹുലിന്റെ തലയ്ക്ക് പരിക്കേറ്റതായി കണ്ടെത്തിയിരുന്നു. മൃതദേഹത്തിനു സമീപത്തായി റബ്ബറിന്റെ തടിക്കഷണവും കണ്ടെത്തി. തുടര്‍ന്ന് നടത്തിയ അന്വേഷണത്തിലാണ് മരണം കൊലപാതകമാണെന്ന് കണ്ടെത്തിയത്.

ഇഡിയുടെ വേട്ടയാടലുകൾക്ക് ഏറ്റവും കൂടുതൽ വിധേയമായ പാർട്ടിയാണ് ആർജെഡിയെന്ന് സെക്രട്ടറി ജനറൽ ഡോ. വർഗീസ് ജോർജ്. പാര്‍ട്ടിയുടെ പല നേതാക്കളും ഇപ്പോഴും വിചാരണ നേരിടുന്നു. കോണ്‍ഗ്രസ് നേതാക്കളായ രാഹുൽ ഗാന്ധിയും സോണിയ ഗാന്ധിയും ഉൾപ്പെടെ ഇഡി കേസുകൾക്ക് പിന്നാലെ നടക്കുകയാണ്. കോണ്‍ഗ്രസ് ഉള്‍പ്പെടെ 14 രാഷ്ട്രീയ പാർട്ടികൾ ഇഡിക്കെതിരെ സുപ്രീംകോടതിയെ സമീപിച്ചിരുന്നു. കഴിഞ്ഞ ഇന്‍ഡ്യാ മുന്നണി യോഗത്തിൽ നേതാക്കൾ ഇ ഡിക്കെതിരെ ആഞ്ഞടിച്ചു. അതിനാല്‍ ഇഡി വിഷയത്തില്‍ കോൺഗ്രസ് ദേശീയ നേതൃത്വത്തിന്റെയും കേരളത്തിലെയും നിലപാട് എന്തെന്ന് അറിയാൻ ആഗ്രഹമുണ്ട്. സിപിഐഎം ഇക്കാര്യത്തിൽ വളരെ വ്യക്തമായ നിലപാട് സ്വീകരിച്ചു. ഇനി നിലപാട് വ്യക്തമാക്കേണ്ടത് കോൺഗ്രസാണ്. സിഎംആര്‍എല്ലിന്റെ ഡയറിയിൽ മന്ത്രിസഭയിലെ മൂന്നാളുകളുടെ പേരുകൾ ഉണ്ട്. അവർ പണം വാങ്ങിയെന്ന് സമ്മതിക്കുകയും ചെയ്തു. അവർക്കെതിരെ അന്വേഷണം ഉണ്ടാകുമോ എന്നും കോൺഗ്രസ് വ്യക്തമാക്കണം. രാഷ്ട്രീയ പ്രതിയോഗികളെ നേരിടാൻ ഇഡി ഉൾപ്പെടെ അന്വേഷണ ഏജൻസികളെ കേന്ദ്ര സർക്കാർ ഉപയോഗിക്കുകയാണെന്നും വര്‍ഗീസ് ജോര്‍ജ് ആരോപിച്ചു.

സംസ്ഥാനത്ത് ഭരണം പിടിച്ചതിന്റെ ആത്മവിശ്വാസത്തില്‍ പശ്ചിമ ബംഗാള്‍ മുനിസിപ്പല്‍ തെരഞ്ഞെടുപ്പില്‍ ഒറ്റയ്ക്ക് മത്സരിക്കുമെന്ന് ആവര്‍ത്തിച്ച് ബിജെപി. എന്‍ഡിഎ സഖ്യക്ഷിയാണെന്ന് തൃണമൂൽ വിമതർ നേതൃത്വം നൽകുന്ന എൻസിപിഐ ആവര്‍ത്തിച്ചു വാദിക്കുന്നതിനിടെയാണ് ബിജെപി നീക്കം. കൊൽക്കത്ത അടക്കമുള്ള കോർപ്പറേഷനിലാണ് ഒറ്റയ്ക്ക് മത്സരിക്കാന്‍ ബിജെപി തയ്യാറെടുക്കുന്നത്.

മൂന്നു മാസമായി എം.കെ. മുനീറിന് എംഎല്‍എ പെന്‍ഷന്‍ ലഭിക്കുന്നില്ല. എജീസ് ഓഫീസിൽ നിന്ന് ട്രഷറിയിലേക്ക് നൽകിയ കത്തിലെ പിഴവാണ് പെന്‍ഷന്‍ മുടങ്ങാന്‍ കാരണം. എം.കെ മുനീറിന്റെ പേരിന് പകരം കെ. ബാബുവെന്നാണ് ടൈപ്പ് ചെയ്തിരുന്നത്. എജീസ് ഓഫീസിൽ നിന്ന് തിരുത്തി ലെറ്റർ നൽകിയിട്ടും പെൻഷൻ ലഭിക്കുന്നില്ല.

എറണാകുളം പൂതൃക്ക പഞ്ചായത്തിലെ ഉപതിരഞ്ഞെടുപ്പിൽ ട്വന്റി ട്വന്റി ഒറ്റയ്ക്ക് മത്സരിക്കുന്നു. എൻഡിഎ മുന്നണിയുമായുള്ള ബന്ധം പരാമർശിക്കാതെയാണ് പ്രചാരണ പോസ്റ്ററുകൾ. പ്രചാരണ പ്രവർത്തനങ്ങളിൽ ബിജെപി പ്രവർത്തകരെ ഒഴിവാക്കി എന്നും ആക്ഷേപമുണ്ട്. ബിജെപിയുമായുള്ള കൂട്ടുകെട്ടിനു പിന്നാലെയുണ്ടായ വിവാദങ്ങളെത്തുടര്‍ന്ന് ട്വന്റി ട്വന്റിക്ക് ഭരണം നഷ്ടമായ പഞ്ചായത്താണ് പൂതൃക്ക. ട്വന്റി ട്വന്റി അംഗവും പഞ്ചായത്ത് പ്രസിഡന്റുമായിരുന്ന പൂജാ മോൾ രാജിവച്ചതിനെത്തുടർന്നാണ് ഉപതെരഞ്ഞെടുപ്പ്.

ഓപ്പറേഷൻ തൂഫാന്റെ ഭാഗമായി നടത്തിയ തിരച്ചിലില്‍ നിരോധിത പുകയില ഉല്‍പ്പന്നങ്ങളുടെ മൊത്തവിതരണ കേന്ദ്രം കണ്ടെത്തി. തിരുവനന്തപുരം കഴക്കൂട്ടം കരിയിലാണ് കേന്ദ്രം പ്രവർത്തിച്ചിരുന്നത്. ഇവിടെനിന്നും 400 കി.ഗ്രാമോളം നിരോധിത വസ്തുക്കൾ കണ്ടെത്തി. സംഭവത്തില്‍ അസം സ്വദേശി സിയാറുൾ ഹഖ് (42) പിടിയിലായി. സിറ്റി ഡാൻസാഫ് സംഘത്തിന് കിട്ടിയ വിവരത്തിന്റെ അടിസ്ഥാനത്തിലായിരുന്നു പരിശോധന നടത്തിയത്. വാടക വീടെടുത്താണ് പുകയില ഉല്‍പ്പന്നങ്ങളുടെ കച്ചവടം നടത്തിയിരുന്നത്. ചില്ലറ കച്ചവടക്കാർക്ക് പാഴ്സലായി എത്തിച്ച് നൽകുന്ന സംഘത്തിലെ ഒരാളാണ് പിടിയിലായ സിയാറുൾ ഹഖ്. കേസെടുത്തതിന് പിന്നാലെ പ്രതിയെ കഴക്കൂട്ടം പൊലീസിന് കൈമാറി.

ഡല്‍ഹിയില്‍ നാളെയും മറ്റന്നാളുമായി നടക്കുന്ന ബ്രിക്സ് ഉച്ചകോടി 120 ട്രെയിൻ സർവീസുകളെ ബാധിക്കും. സുരക്ഷാ ക്രമീകരണങ്ങളുടെ ഭാഗമായി ഡൽഹി ഡിവിഷനിൽ നോർത്തേൺ റെയിൽവേ നിയന്ത്രണം ഏർപ്പെടുത്തി. രാജധാനി, വന്ദേഭാരത് ഉൾപ്പെടെ ട്രെയിനുകളുടെ സർവീസുകളെയാണ് നിയന്ത്രണം ബാധിക്കുക. തിരുവനന്തപുരം - ന്യൂ ഡൽഹി സൂപ്പർഫാസ്റ്റ് എക്സ്പ്രസിന് ഡൽഹി ഡിവിഷനിൽ ഒരു മണിക്കൂറിലേറെ നിയന്ത്രണം.ഇന്ന് മുതൽ ഞായർ വരെയുള്ള സർവീസുകളെയാണ് നിയന്ത്രണം ബാധിക്കുക.

ഉള്ളി, വെളുത്തുള്ളി, ഉരുളക്കിഴങ്ങ് എന്നിവ കൊണ്ടുള്ള ഭക്ഷണങ്ങൾ വിദ്യാർഥികൾ ഒഴിവാക്കണമെന്ന താനെയിലെ മീര റോഡിലെ സെവൻ സ്ക്വയർ സ്കൂളിന്റെ ഉത്തരവ് പിന്‍വലിച്ചു. ജൈന ഉത്സവം കണക്കിലെടുത്ത് പുറത്തിറക്കിയ ഉത്തരവാണ് വിവാദമായതിനെത്തുടര്‍ന്ന് പിന്‍വലിച്ചത്. ബിജെപി എംഎൽഎയുടെ നിയന്ത്രണത്തിലുള്ളതാണ് സ്കൂൾ. ഉത്തരവിനെതിരെ ശിവസേന ഉദ്ദവ് വിഭാഗം, എംഎൻഎസ്‌ അടക്കമുള്ള പാർട്ടികള്‍ രംഗത്തെത്തിയിരുന്നു. സ്കൂൾ അധികൃതരുടേത് ഭക്ഷണ ജിഹാദ് എന്നായിരുന്നു എംഎൻഎസ് വിശേഷിപ്പിച്ചത്.

സംസ്ഥാനത്ത് വരും ദിവസങ്ങളിലും താപനില ഉയരാൻ സാധ്യത. ഒറ്റപ്പെട്ടയിടങ്ങളിൽ ഇന്നു മുതൽ 13 വരെ താപനില സാധാരണയെക്കാൾ മൂന്ന് മുതൽ നാല് ഡിഗ്രി സെല്‍ഷ്യസ് വരെ കൂടുതൽ ഉയരാനാണ് സാധ്യത. സൂര്യാഘാതം, സൂര്യാതപം, നിർജലീകരണം എന്നിവയ്ക്ക് സാധ്യതയുള്ളതിനാല്‍ പൊതുജനങ്ങള്‍ ജാഗ്രത പാലിക്കണമെന്ന് ദുരന്ത നിവാരണ അതോറിറ്റി അറിയിച്ചു. ഇന്നും നാളെയും നൽകിയിരുന്ന മഴ മുന്നറിയിപ്പ് പിൻവലിച്ചിട്ടുണ്ട്. വരും ദിവസങ്ങളിലൊന്നും മഴയ്ക്ക് സാധ്യതയില്ല. ഇന്ന്, എറണാകുളം, ഇടുക്കി, കോട്ടയം, പത്തനംതിട്ട ജില്ലകളില്‍ യെല്ലോ അലേർട്ട് നൽകിയിരുന്നു. നാളെ പത്തനംതിട്ട, ഇടുക്കി, എറണാകുളം, പാലക്കാട് ജില്ലകളിലുമായിരുന്നു യെല്ലോ അലേര്‍ട്ട്.

സംസ്ഥാനത്തെ വൈദ്യുതി പ്രതിസന്ധിയില്‍ മുഖ്യമന്ത്രിയെയും വകുപ്പു മന്ത്രിയെയും രൂക്ഷഭാഷയില്‍ വിമര്‍ശിച്ച് മുന്‍ വൈദ്യുതി മന്ത്രി എം.എം. മണി. നല്ല മഴ കിട്ടിയാലും, എല്ലാ ജല വൈദ്യുതി പദ്ധതി ഉപയോഗപ്പെടുത്തിയാലും സംസ്ഥാനത്തിന് ആവശ്യമായതിന്റെ 40 ശതമാനം മാത്രമാണ് ഇവിടെ ഉല്‍പ്പാദിപ്പിക്കുന്നത്. 60 ശതമാനം വിവിധ കരാറിലൂടെ വാങ്ങിയാണ് നമ്മളിവിടെ സമ്പൂര്‍ണ വൈദ്യുതീകരണം നടത്തിയത്. മഴ കുറയുകയും, വൈദ്യുതി ക്ഷാമം ഉണ്ടാകുകയും ചെയ്യുമ്പോള്‍ അത് കണ്ടുകൊണ്ട് ഭരിക്കുന്നവര്‍ ദീര്‍ഘവീക്ഷണത്തോടെ കാര്യങ്ങള്‍ ചെയ്യണം. മുഖ്യമന്ത്രി വി.ഡി. സതീശനും വകുപ്പു മന്ത്രി സണ്ണി ജോസഫിനും ദീര്‍ഘവീക്ഷണമില്ല. പറ്റുന്നില്ലെങ്കില്‍, മുഖ്യമന്ത്രിയും വകുപ്പു മന്ത്രിയുമൊക്കെ രാജിവച്ച് മറ്റാരെയെങ്കിലും അത് ഏല്‍പ്പിക്കണം. വൈദ്യുതിയായാലും പൊതുആരോഗ്യമായാലും ദീര്‍ഘവീക്ഷണം വേണം, അല്ലാതെ എന്റെ പോക്കറ്റില്‍ എന്ത് വരുമെന്നല്ല നോക്കേണ്ടത്. കോണ്‍ഗ്രസ് അല്ലേ... കൃത്രിമ ക്ഷാമമൊക്കെ ഉണ്ടാക്കിയിട്ട്, ഇല്ലാത്തൊരു കരാര്‍ ഉണ്ടാക്കിയിട്ട് കമ്മീഷന്‍ വാങ്ങാനുള്ള ശ്രമമാണോ നടക്കുന്നതെന്നാണ് സംശയമെന്നും എം.എം. മണി കൂട്ടിച്ചേര്‍ത്തു.

കൊച്ചിയില്‍ വീണ്ടും ഓണ്‍ലൈന്‍ ട്രേഡിങ് തട്ടിപ്പ്. ഓൺലൈൻ ട്രേഡിങ് വഴി ഉയർന്ന ലാഭം വാഗ്ദാനം ചെയ്ത് 47,50,000 രൂപയാണ് തട്ടിയെടുത്തത്. തട്ടിപ്പിനിരയായ തൃപ്പൂണിത്തുറ സ്വദേശി മനോജ് കുമാറിന്റെ പരാതിയില്‍ കേസെടുത്തു. 2026 ഓഗസ്റ്റ് 13 മുതൽ സെപ്റ്റംബർ 10 വരെ കാലയളവിലാണ് തട്ടിപ്പ് നടന്നത്. പരാതിക്കാരനെ ടെലഗ്രാം അക്കൗണ്ട് വഴി ബന്ധപ്പെട്ട പ്രതികൾ, ഒരു വെബ്‌സൈറ്റ് വഴി ഓൺലൈൻ ട്രേഡിങ് നടത്തിയാൽ വൻ ലാഭം ലഭിക്കുമെന്ന് വിശ്വസിപ്പിക്കുകയായിരുന്നു.

മലപ്പുറം മോർഫിങ് കേസിലെ പ്രതി, തിരുവനന്തപുരം തിരുമല ഒടൻകുഴി സ്വദേശി സുബിൻ ബാബു ജീവനൊടുക്കാൻ ശ്രമിച്ചു. മലപ്പുറത്തെ സ്വകാര്യ ലോഡ്ജിൽ വെച്ചായിരുന്നു ആത്മഹത്യാ ശ്രമം. ആശുപത്രിയില്‍ പ്രവേശിപ്പിച്ച യുവാവ് അപകടനില തരണം ചെയ്തു. കേസില്‍ ഇന്നലെ കോടതി പ്രതിക്ക് ജാമ്യം അനുവദിച്ചിരുന്നു.

കോഴിക്കോട് കോട്ടൂരിൽ നിന്നും മൂന്നു ദിവസം മുൻപ് കാണാതായ വയോധികനെ കണ്ടെത്തി. വീടിനു സമീപമുള്ള തുരുത്തമലയുടെ മുകളിവെ വനത്തിൽ നിന്നാണ് ആറാം കോട്ടക്കൽ നാരായണനെ കണ്ടെത്തിയത്. നാട്ടുകാരുടെ തിരച്ചിലിലാണ് നാരായണനെ കണ്ടെത്തിയത്. ചൊവ്വാഴ്ച രാവിലെയാണ് നാരായണൻ വീട്ടിൽനിന്ന് പുറത്തുപോയത്. കണ്ടെത്തുമ്പോൾ അവശനിലയിലായിരുന്ന നാരായണനെ ആശുപത്രിയിൽ പ്രവേശിപ്പിച്ചു. പറമ്പിൽ പണിക്കായി പോയ നാരായണൻ വനത്തിൽ കുടുങ്ങുകയായിരുന്നു.

പിഎം ശ്രീ പദ്ധതിയില്‍ കേരളത്തിന് വീണ്ടും കത്തയച്ച് കേന്ദ്ര സര്‍ക്കാര്‍. കേന്ദ്ര വിദ്യാഭ്യാസ സെക്രട്ടറിയാണ് ചീഫ് സെക്രട്ടറിക്ക് കത്തയച്ചത്. പദ്ധതിയുടെ ഭാഗമായി തുടരണം. ഗുണനിലവാരമുള്ള വിദ്യാഭ്യാസം ഉറപ്പാക്കണം. കേരളം ഇതിനകം ധാരണപത്രം ഒപ്പിട്ടതാണ്. ഉപസമിതിയുടെ നടപടികൾ വേഗത്തിലാക്കണം. വിദ്യാർഥികളുടെ താല്‍പ്പര്യം സംരക്ഷിക്കണം എന്നിങ്ങനെയാണ് കത്തിലെ ആവശ്യങ്ങള്‍. യുഡിഎഫ് സർക്കാർ അധികാരത്തിൽ വന്നതിനുശേഷം രണ്ടാം തവണയാണ് കേന്ദ്രം കത്തയയ്ക്കുന്നത്. രണ്ടു ദിവസങ്ങൾക്ക് മുന്‍പാണ് സംസ്ഥാന ചീഫ് സെക്രട്ടറിമാർക്ക് കത്ത് ലഭിച്ചതെന്ന് പൊതുവിദ്യാഭ്യാസ മന്ത്രി എൻ. ഷംസുദ്ദീൻ അറിയിച്ചു. പദ്ധതിയുടെ തുടർനടപടികൾ മുന്നോട്ടുകൊണ്ടുപോകുന്ന കാര്യത്തിലുള്ള തീരുമാനം വൈകിപ്പിക്കരുതെന്നാണ് കേന്ദ്രം മുഖ്യമായും ആവശ്യപ്പെട്ടത്. വിഷയം സർക്കാർ ഗൗരവമായി ചർച്ച ചെയ്യുമെന്നും യുഡിഎഫ് നേതൃത്വത്തിന്റെയും മുഖ്യമന്ത്രിയുടെയും കൂടിയാലോചനകൾക്ക് ശേഷം ഔദ്യോഗിക നിലപാട് വ്യക്തമാക്കുമെന്നും മന്ത്രി മാധ്യമങ്ങളോട് പറഞ്ഞു.

റോഡിന്റെ തമ്പുരാനല്ല ബസ് ഡ്രൈവറെന്ന് ഹൈക്കോടതി. നഗരത്തില്‍ അമിത വേഗമല്ല, അശ്രദ്ധയാണ് പ്രശ്നം. റോഡുകള്‍ കൊലക്കളങ്ങള്‍ ആക്കരുതെന്നും ജസ്റ്റിസ് ദേവന്‍ രാമചന്ദ്രന്‍ പറഞ്ഞു. ബസ് ജീവനക്കാരുടെ അതിക്രമവുമായി ബന്ധപ്പെട്ടാണ് പരാമര്‍ശം. ഭാരവാഹനങ്ങൾ തന്നിഷ്ടം പോലെയാണ് റോഡിൽ സഞ്ചരിക്കുന്നത്. റോഡ് സുരക്ഷയ്ക്കായുള്ള നടപടികൾ പാലിക്കാത്തതിലും ഹൈക്കോടതിക്ക് അതൃപ്തി അറിയിച്ചു.

സംസ്ഥാനത്തെ വൈദ്യുതി നിയന്ത്രണം തുടരുമെന്ന് മന്ത്രി സണ്ണി ജോസഫ്. രാജ്യത്താകെ വൈദ്യുതി പ്രതിസന്ധിയുണ്ട്. സംസ്ഥാനത്ത് പ്രതിസന്ധി രൂക്ഷമാണ്. ഒറ്റയടിക്ക് തീര്‍ക്കാനാകുന്ന പ്രതിസന്ധിയല്ല. ഉപഭോഗം വര്‍ധിക്കുകയും, ഉല്‍പ്പാദനം കുറയുകയും ചെയ്തു. കൂടുതല്‍ വൈദ്യുതി വാങ്ങാന്‍ നടപടിയെടുക്കും. വൈദ്യുതി നിയന്ത്രണം തുടരുമെന്നും വൈദ്യുതി മന്ത്രി വ്യക്തമാക്കി.

വൈദ്യുതി പ്രതിസന്ധി രൂക്ഷമാകുന്നതിനിടെ, ആശങ്ക വര്‍ധിപ്പിച്ച് ഡാമുകളില്‍ ജലനിരപ്പ് താഴുന്നു. സംസ്ഥാനത്തെ ഡാമുകളില്‍ ഉള്ളത് 100 ദിവസം വൈദ്യുതി ഉല്‍പ്പാദിപ്പിക്കാനുള്ള വെള്ളം മാത്രം. 17 ഡാമുകളിലായി ശരാശരി 50 ശതമാനം വെള്ളം മാത്രമാണുള്ളത്. കഴിഞ്ഞ വർഷത്തേക്കാൾ 30 ശതമാനമാണ് കുറവ്. ഏഴ് ഡാമുകളില്‍ മാത്രമാണ് 50 ശതമാനത്തിനു മുകളില്‍ വെള്ളം ഉള്ളത്. സംസ്ഥാനത്തെ ഏറ്റവും വലിയ അണക്കെട്ടായ ഇടുക്കി ഡാമില്‍ ഉള്ളത് 2369 അടി വെള്ളമാണ്. കഴിഞ്ഞവര്‍ഷം ഇതേസമയം 2382 അടി വെള്ളമാണ് ഡാമിൽ ഉണ്ടായിരുന്നത്. മഴ മാറിയതും, വൈദ്യുതി ഉപഭോഗം വർധിച്ചതുമാണ് ജലനിരപ്പ് താഴാൻ കാരണം. 2025ല്‍ 80 ശതമാനം, 2024ല്‍ 70, 2023ല്‍ 40 (തുലാമഴയിൽ ഉയർന്നു), 2022ല്‍ 83, 2021ല്‍ 75, 2020ല്‍ 68 എന്നിങ്ങനെയാണ് മുന്‍ വര്‍ഷങ്ങളിലെ ഡാമുകളിലെ ശരാശരി ജലനിരപ്പ്.