സിഎംആര്‍എല്‍-എക്സാലോജിക് കേസില്‍ പിണറായി വിജയന്റെ മകള്‍ വീണ ടിക്കെതിരെ തെളിവുണ്ടെന്ന് ഇഡി. വീണ കള്ളപ്പണം വെളുപ്പിച്ചതിന് തെളിവുണ്ടെന്നാണ് ഇഡി സംസ്ഥാന പൊലീസ് മേധാവിക്ക് അയച്ച കത്തില്‍ പറയുന്നത്. മെയ് 27ന് തിരുവനന്തപുരത്തെ റെയ്ഡില്‍ പിടിച്ചെടുത്ത ഡയറിയില്‍ ഇതിനുള്ള തെളിവുകളുണ്ട്. വിദേശത്തേക്ക് പണം അയച്ചതിനുള്ള തെളിവുകള്‍ ലഭിച്ചിട്ടുണ്ട്. അത് ഹവാല ഇടപാടാണെന്നാണ് ഇഡിയുടെ വാദം. വീണയുടെ പങ്കാളിയും മുന്‍ മന്ത്രിയുമായ പി.എ. മുഹമ്മദ് റിയാസിന് ഇതില്‍ മുഖ്യ പങ്കുണ്ടെന്നും ഇഡി പറയുന്നു. വൻ കള്ളപ്പണ ഇടപാടാണ് നടന്നത്. അതില്‍റിയാസിന്റെ സ്റ്റാഫ് അംഗങ്ങളും സുഹൃത്തുക്കളും ഉള്‍പ്പെടെ ചിലര്‍ പങ്കാളികളായിട്ടുണ്ട്. ഹവാല ഇടപാടിനുവേണ്ടി 16 പേരുള്ള വാട്സാപ്പ് ഗ്രൂപ്പ് ഉണ്ടാക്കി. മിനിസ്റ്റര്‍ റിയാസ് എന്ന പേരിലാണ് മുഹമ്മദ് റിയാസിന്റെ പേര് സേവ് ചെയ്തിരിക്കുന്നത്. റിയാസിനും ഇടപാടുകളില്‍ പങ്കുണ്ടെന്ന വിവരം കൂടിയാണ് ഇഡി പങ്കുവയ്ക്കുന്നത്.
എന്‍ടിപിസിയില്‍നിന്ന് വൈദ്യുതി വാങ്ങാനുള്ള തീരുമാനം തല്‍ക്കാലം വേണ്ടെന്നുവയ്ക്കാന്‍ കെഎസ്ഇബി. അധിക സാമ്പത്തിക ബാധ്യത ഉണ്ടാകുമെന്ന വിലയിരുത്തലിലാണ് തീരുമാനം. യൂണിറ്റിന് 30 രൂപ നിരക്കില്‍ വൈദ്യുതി വാങ്ങുന്നത് ജനങ്ങള്‍ക്ക് ഇരട്ടി പ്രഹരമാകുമെന്നും വിലയിരുത്തല്‍. അതേസമയം, ഉത്തരേന്ത്യൻ സംസ്ഥാനങ്ങളിൽ നിന്നും വൈദ്യുതി ലഭ്യമാക്കാനുള്ള ശ്രമങ്ങൾ കെഎസ്ഇബി തുടരും.
സംസ്ഥാനത്തെ നിയന്ത്രണമില്ലാത്ത വൈദ്യുതി മുടക്കത്തില്‍ വലഞ്ഞ് കോഴി കര്‍ഷകര്‍. കൃത്രിമച്ചൂട് ലഭിക്കാതെ ഫാമുകളിൽ കോഴിക്കുഞ്ഞുങ്ങൾ കൂട്ടത്തോടെ ചത്തൊടുങ്ങുന്നു. 500 കോഴി കുഞ്ഞുങ്ങൾക്ക് കൃത്രിമ ചൂട് നൽകാൻ വേണ്ടത് 500 വാട്സ് ബൾബുകൾ. ഇരുട്ടത്ത് ഭയന്ന് തിക്കിത്തിരക്കുന്ന കോഴിക്കുഞ്ഞുങ്ങൾ ശ്വാസംമുട്ടി ചാകുന്നതും പതിവാകുന്നു. ഫാമുകളില്‍ ജനറേറ്ററുകള്‍ പ്രവര്‍ത്തിക്കണമെങ്കില്‍ വലിയ തുക വേണ്ടിവരും. ചെറുകിട കര്‍ഷകര്‍ക്ക് അത്തരം സാമ്പത്തിക ബാധ്യത താങ്ങാനാവില്ല.
സിഎംആർഎൽ-എക്സാലോജിക് ഇടപാടിൽ ഇഡി പറയുന്നത് അതേപടി വിഴുങ്ങില്ലെന്ന് മന്ത്രി കെ. മുരളീധരൻ. ഇഡി ശുപാര്‍ശയില്‍ സർക്കാർ നിലപാട് വ്യക്തമാക്കിയിരുന്നു. നിയമോപദേശം തേടിയ ശേഷമാകും തുടർനടപടി. ഇഡി പറയുന്നത് അതേപടി വിഴുങ്ങുന്നവരല്ല തങ്ങൾ. കൂടുതൽ തെളിവുകൾ പുറത്തു വരട്ടെ. തിടുക്കപ്പെടേണ്ട കാര്യമില്ല. മുഹമ്മദ് റിയാസിനെതിരെ പാര പണിയുന്നത് അദ്ദേഹത്തിന്റെ പാർട്ടിയാണ്. പിണറായി വിജയനുശേഷം റിയാസ് വരാതിരിക്കാൻ ഉള്ള തിരക്കഥയാണ്. അതില്‍ കോൺഗ്രസിനും യുഡിഎഫിനും പങ്കില്ലെന്നും മുരളീധരൻ പറഞ്ഞു.
പ്രതിപക്ഷ നേതാവ് പിണറായി വിജയന്‍, വീണ ടി., പി.എ. മുഹമ്മദ് റിയാസ് എന്നിവര്‍ക്കെതിരെ കേസെടുക്കണമെന്ന ഇഡി ശുപാര്‍ശയില്‍ സര്‍ക്കാര്‍ നിയമവശങ്ങള്‍ പരിഗണിക്കുകയാണെന്ന് മന്ത്രി സണ്ണി ജോസഫ്. ഇഡി ആഭ്യന്തര വകുപ്പിന് കൈമാറിയ വിവരങ്ങളാണ് ഇപ്പോള്‍ പുറത്തുവന്നിരിക്കുന്നത്. അത് പുറത്ത് അറിയുന്നതില്‍ എന്താണ് പ്രശ്നം. ഇഡി വിവരങ്ങള്‍ ചോര്‍ത്തി നല്‍കിയെന്ന് പറയാനാവില്ല. കൃത്യമായ രേഖകള്‍ തന്നെയാണ് പുറത്തുവന്നത്. രാഷ്ട്രീയവശങ്ങളല്ല, നിയമവശങ്ങളാണ് പരിശോധിക്കേണ്ടത്. നിയമവശം പരിഗണിച്ചാകും കേസ് എടുക്കുന്ന കാര്യത്തില്‍ തീരുമാനമെടുക്കുകയെന്നും മന്ത്രി സണ്ണി ജോസഫ് കൂട്ടിച്ചേര്‍ത്തു.
തൃശൂര്‍ നാട്ടികയിൽ നിർത്തിയിട്ടിയിരുന്ന തടി ലോറിയുടെ പുറകിൽ ടാങ്കർ ലോറി ഇടിച്ചു കയറി. ദേശീയപാത 66ൽ നാട്ടിക സെന്ററിലായിരുന്നു അപകടം. കോഴിക്കോട് ഭാഗത്തുനിന്നും എറണാകുളം ദിശയിൽ കേടുവന്ന് നിർത്തിയിട്ടിരുന്ന തടി ലോറിയുടെ പുറകിൽ ടാങ്കർ ലോറി ഇടിച്ചു കയറുകയായിരുന്നു. ടാങ്കർ ലോറി ഡ്രൈവർ കണ്ണൂർ സ്വദേശി സിദ്ധിഖിന് (44) കാലിന് ഗുരതര പരിക്കേറ്റു. വിവരം അറിഞ്ഞെത്തിയ പൊലീസും ഫയർ ഫോഴ്‌സും ചേർന്ന് ഏറെ പണിപ്പെട്ടാണ് ടാങ്കർ ലോറിയുടെ കാബിൻ വെട്ടി പൊളിച്ച് ഡ്രൈവറെ പുറത്തെടുത്തത്. ഇയാളെ ഉടൻതന്നെ തൃശൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്ന് പുലർച്ചെയായിരുന്നു അപകടം.
ബിജെപി ജില്ലാ കമ്മിറ്റി അംഗം, നെയ്യാറ്റിൻകര അമരവിള സ്വദേശി ശ്രീജേഷിനെ(43) വീടിനുള്ളിൽ മരിച്ച നിലയിൽ കണ്ടെത്തി. മൃതദേഹം നെയ്യാറ്റിൻകരയിലെ സ്വകാര്യ ആശുപത്രിയിൽ. ആരോഗ്യപ്രശ്നങ്ങളാണ് മരണകാരണമെന്നാണ് പ്രാഥമിക നിഗമനം.
മാത്യു കുഴല്‍നാടന്‍ എംഎല്‍യുടെ വീട്ടില്‍ മോഷണം. എംഎൽഎയുടെ പൈങ്ങോട്ടൂരില്‍ നിർമാണത്തിലിരിക്കുന്ന വീട്ടിലാണ് മോഷണം നടന്നത്. മോഷ്ടാക്കൾ ഇലക്ട്രിക് വയറുകളാണ് കവർന്നത്. 50,000 രൂപ വിലവരുന്ന ഇലക്ട്രിക് വയറുകളാണ് മോഷണം പോയത്.
ചിറയിന്‍കീഴിലെ വിവാദമായ കയ്യാങ്കളിക്കുശേഷം ഒരുമിച്ച് വേദി പങ്കിട്ട് രമ്യാ ഹരിദാസ് എംഎൽഎയും കോണ്‍ഗ്രസ് നേതാവും. ചിറയിൻകീഴ് ബ്ലോക്ക് പഞ്ചായത്ത് തെരഞ്ഞെടുപ്പ് കൺവെൻഷനിലാണ് രമ്യയും ജില്ലാ പഞ്ചായത്ത് അംഗം സജിത്ത് മുട്ടപ്പാലവും പങ്കെടുത്തത്. കയ്യാങ്കളിക്കു ശേഷം ആദ്യമായാണ് ഇരുവരും വേദി പങ്കിടുന്നത്.
കുട്ടികള്‍ക്കെതിരായ ഉള്ളടക്കങ്ങള്‍ നേരിട്ട് പൊലീസിന് റിപ്പോര്‍ട്ട് ചെയ്യാന്‍ തയ്യാറാണെന്ന് മെറ്റ. കേന്ദ്ര സര്‍ക്കാരിനെ രേഖാമൂലമാണ് മെറ്റ ഇക്കാര്യം അറിയിച്ചത്. കുട്ടികൾക്ക് എതിരായ ലൈംഗിക അതിക്രമങ്ങളും, ശാരീരിക അക്രമങ്ങളും അടങ്ങിയ പോസ്റ്റുകളും വീഡിയോകളും കേന്ദ്ര സർക്കാരിന് കൈമാറാമെന്നും മെറ്റ ഐടി മന്ത്രാലയത്തിന് നൽകിയ കത്തിൽ അറിയിച്ചു.
കുപ്രസിദ്ധ ഗുണ്ട ജംബുലിംഗം സുരേഷ് ബാലരാമപുരം പൊലീസിന്റെ പിടിയിലായി. നിരവധി ക്രിമിനൽ കേസുകളില്‍ പ്രതിയാണ് സുരേഷ്. ഒരു സ്ത്രീയെ പീഡിപ്പിക്കാൻ ശ്രമിച്ച കേസിലാണ് നിലവിലെ അറസ്റ്റ്. ഏഴു വർഷത്തോളം ജയിൽവാസം അനുഭവിച്ച സുരേഷ് കഴിഞ്ഞ ദിവസങ്ങളിലാണ് മോചനം നേടിയത്. പൊലീസ് ഉദ്യോഗസ്ഥനെ ആക്രമിച്ചത് ഉൾപ്പെടെ 40 ഓളം കേസുകളിലെ പ്രതിയാണ്. വിവിധ കേസുകളിലായി 12 വർഷത്തോളം ജയിൽവാസം അനുഭവിച്ചിട്ടുണ്ട്. പൊലീസിന്റെ ഓപ്പറേഷൻ ഗ്രിപ്പിൻ്റെ ഭാഗമായാണ് സുരേഷിനെ പിടികൂടിയത്.
കോട്ടയത്ത്, വില കൂടുതലാണെന്ന് ആരോപിച്ച് പച്ചക്കറിക്കടയില്‍ മദ്യലഹരിയില്‍ യുവാക്കളുടെ അതിക്രമം. മണർകാട് കവലയിലെ കടയിലാണ് യുവാക്കൾ അക്രമം നടത്തിയത്. സംഭവത്തിൽ മണർകാട് സ്വദേശികളായ വിഷ്ണു, ബിബിൻ, ശരത് എന്നിവരെ പൊലീസ് കസ്റ്റഡിയിലെടുത്തു. നാട്ടുകാരും മറ്റു കടകളിൽ ഉണ്ടായിരുന്നവരും ചേര്‍ന്നാണ് യുവാക്കളെ കീഴ്പ്പെടുത്തി പൊലിസില്‍ ഏല്‍പ്പിച്ചത്.
സംസ്ഥാനത്തെ വൈദ്യുതി പ്രതിസന്ധിക്ക് പരിഹാരം കാണാന്‍ കൂടുതല്‍ വൈദ്യുതി വാങ്ങാന്‍ കെഎസ്ഇബി. ഒക്ടോബർ-ഡിസംബർ മാസങ്ങളിൽ വൈദ്യുതി വാങ്ങാന്‍ പുതിയ ടെന്‍ഡര്‍ ക്ഷണിച്ചു. പീക്ക് സമയത്ത് 600 മെഗാവാട്ട് വൈദ്യുതിയാണ് ആവശ്യം. ഓഫ് പീക്ക് സമയത്ത് 12 മണിക്കു ശേഷം രണ്ടു സമയങ്ങളിലായി 900 മെഗാവാട്ട് വൈദ്യുതിയും വാങ്ങും. രാത്രിയും പകലും ഒരേ നിരക്കിൽ വൈദ്യുതി ലഭിക്കുന്ന റൗണ്ട് ദി ക്ലോക്ക് അടിസ്ഥാനത്തിൽ 300 മെഗാവാട്ട് വൈദ്യുതിക്കും ശ്രമമുണ്ട്.
തമിഴ്‌നാട് മുഖ്യമന്ത്രി ജോസഫ് വിജയ്‌ക്കും മന്ത്രിമാർക്കുമെതിരായ അപകീർത്തികരമായ പരാമർശത്തിൽ ഡിഎംകെ ഡെപ്യൂട്ടി ജനറൽ സെക്രട്ടറി എ. രാജ, മുൻ മന്ത്രി പി.കെ. ശേഖർ ബാബു ഉൾപ്പെടെ ആറ് നേതാക്കൾക്കെതിരെ കേസ്. വിജയ് സ്റ്റാലിനെതിരെ ദേഹനിന്ദ നടത്തിയെന്ന ആരോപണത്തിൽ ഡിഎംകെ നടത്തിയ പ്രതിഷേധത്തിലായിരുന്നു വിവാദ പരാമർശം. ടിവികെ നേതാക്കൾ നൽകിയ പരാതിയുടെ അടിസ്ഥാനത്തിനാണ് കേസ്.
പ്രത്യേക പാര്‍ലമെന്റ് സമ്മേളനം വിളിച്ചുചേര്‍ക്കാനുള്ള നടപടിക്ക് തുടക്കമിട്ട് കേന്ദ്ര സര്‍ക്കാര്‍. ഒക്ടോബർ 11ന് മുമ്പ് പ്രത്യേക സമ്മേളനം വിളിക്കുന്ന കാര്യത്തിൽ പ്രതിപക്ഷത്തിന്റെ അഭിപ്രായം തേടി. പാര്‍ലമെന്ററികാര്യ മന്ത്രി കിരണ്‍ റിജിജു, കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ അഭിപ്രായം തേടി.
പത്തനംതിട്ടയില്‍ മദ്യപിച്ച് വാഹനാപകടം ഉണ്ടാക്കിയ പൊലീസ് ഉദ്യോഗസ്ഥന്‍ പിടിയില്‍. തണ്ണിത്തോട് പൊലീസ് സ്റ്റേഷനിലെ സിപിഒ പ്രവീണ്‍ കുമാറാണ് കോന്നി പൊലീസിന്റെ പിടിയിലായത്. പ്രവീൺകുമാർ ഓടിച്ച ബൈക്ക് നിർത്തിയിട്ടിരുന്ന ആംബുലൻസിൽ ഇടിച്ചു കയറുകയായിരുന്നു. ഇന്നലെ രാത്രി കോന്നി കൊന്നപ്പാറയിലായിരുന്നു അപകടം. നാട്ടുകാരാണ് പ്രവീണിനെ തടഞ്ഞുവെച്ച് പൊലീസിനെ ഏല്‍പ്പിച്ചത്.
കോട്ടയം മെഡിക്കല്‍ കോളേജ് ആശുപത്രിയില്‍ ജനിച്ച കുഞ്ഞിന്റെ ശരീരത്തില്‍ സൂചി കണ്ടെത്തിയ സംഭവത്തില്‍ ഗാന്ധിനഗര്‍ പൊലീസ് കേസെടുത്തു. കോഴിക്കോട് സ്വദേശി വിനീഷ്-അഞ്ജു ദമ്പതികളുടെ പരാതിയിലാണ് പൊലീസ് നടപടി. ചികിത്സാപ്പിഴവ് ചൂണ്ടിക്കാണിച്ചാണ് ദമ്പതികളുടെ പരാതി. അതേസമയം, പൊലീസ് കേസെടുത്തെങ്കിലും പ്രതിസ്ഥാനത്ത് ആരുടെയും പേരില്ല.
തമിഴ്‌നാട് മുഖ്യമന്ത്രി ജോസഫ് വിജയ്‌യുടെ രൂപത്തില്‍ ഗണേശ വിഗ്രഹം നിര്‍മിച്ചതില്‍ വിവാദം തുടരുന്നു. ഉത്തരവാദികളാവരെ അറസ്റ്റ് ചെയ്യണമെന്ന് ബിജെപി ആവശ്യപ്പെട്ടു. ഈശ്വരാരാധനയെ പ്രചാരണമാക്കി തരംതാഴ്ത്തുന്ന പ്രവർത്തകരെ തിരുത്താൻ മുഖ്യമന്ത്രി വിജയ് തുടക്കത്തില്‍ തയ്യാറായില്ല. വിജയ്‌യുടെ മൗനം അതിരുകടന്ന പ്രവൃത്തികൾ തുടരാൻ കാരണമായതായി ബിജെപി തമിഴ്‌നാട് സംസ്ഥാന പ്രസിഡന്റ് നൈനാർ നാഗേന്ദ്രൻ ആരോപിച്ചു.
ഇമിഗ്രേഷൻ നടപടികൾ പൂർത്തിയാകാതെ വിദേശീയര്‍ യാത്ര ചെയ്ത സംഭവത്തില്‍ എയര്‍ ഇന്ത്യ സിഇഒയെ വിളിച്ചുവരുത്തി വ്യോമയാന മന്ത്രാലയം. സംഭവത്തില്‍ മൂന്നു ദിവസത്തിനുള്ളില്‍ വിശദീകരണം നല്‍കണമെന്ന് നേരത്തെ നിര്‍ദേശിച്ചിരുന്നു. പിന്നാലെയാണ് സിഇഒയെ വിളിച്ചുവരുത്തിയത്.
സിപിഐഎം വിപുലീകൃത സംസ്ഥാന കമ്മിറ്റിയിൽ ഇഡിക്കെതിരെ പ്രമേയം അവതരിപ്പിച്ചു. സംസ്ഥാന കമ്മിറ്റി ഏകകണ്ഠമായാണ് പ്രമേയം അവതരിപ്പിച്ചത്. സിപിഐഎം സംസ്ഥാന സെക്രട്ടേറിയറ്റ് അംഗം പി.കെ. ബിജു ആണ് പ്രമേയം അവതരിപ്പിച്ചത്. നേരത്തെ, 12 ജില്ലാ കമ്മിറ്റികള്‍ ഇഡി വിഷയം ചര്‍ച്ചയില്‍ ഉന്നയിച്ചിരുന്നു. സംസ്ഥാന നേതാക്കളെ ഇഡി വേട്ടയാടുകയാണ്. ഇഡി നീക്കത്തില്‍ പ്രതിരോധം തീര്‍ക്കണമെന്നായിരുന്നു ആവശ്യം.
സിപിഐഎം വിപുലീകൃത സംസ്ഥാന കമ്മിറ്റിയില്‍ അധാസാരണ നടപടികള്‍. സിപിഐഎം സംസ്ഥാന സെക്രട്ടേറിയറ്റ് പുനഃസംഘടിപ്പിച്ചു. പി. ജയരാജന്‍, വി. ശിവന്‍കുട്ടി, എം.ബി. രാജേഷ്, ജോണ്‍ ബ്രിട്ടാസ് എന്നിവരെ സെക്രട്ടേറിയറ്റില്‍ ഉള്‍പ്പെടുത്തി. അതേസമയം, കേന്ദ്ര കമ്മിറ്റി അംഗങ്ങളായ ടി.പി. രാമകൃഷ്ണന്‍, തോമസ് ഐസക്ക് എന്നിവരെ ഒഴിവാക്കി. സംസ്ഥാന സമിതിയും പുനഃസംഘടിപ്പിച്ചിട്ടുണ്ട്. ജെയ്‌ക് സി. തോമസ്, എം. വിജിന്‍, ഒ.എസ്. അംബിക, പി.എസ്. സഞ്ജീവ്, എം. ശിവപ്രസാദ്, ആദർശ് എം. സജി, എൻ. സുകന്യ, സുബൈദ ഇസ്‌ഹാഖ്, പ്രഭാവർമ്മ എന്നിവരെയാണ് ക്ഷണിതാക്കളായി സംസ്ഥാന സമിതിയില്‍ ഉള്‍പ്പെടുത്തിയിരിക്കുന്നത്. പി. രാജീവ് എല്‍ഡിഎഫ് കണ്‍വീനറാകും. സിപിഐഎം സംസ്ഥാന സെക്രട്ടറി എം.വി. ഗോവിന്ദന് പാർട്ടി ശാസന നൽകിയെന്ന വിവരവും പുറത്തുവരുന്നുണ്ട്.
കേരളത്തിന്റെ വൈദ്യുതി പ്രതിസന്ധിയില്‍ സഹായവുമായി ഹിമാചല്‍ പ്രദേശ്. ഹിമാചല്‍ പ്രദേശ് 250 മെഗാവാട്ട് വൈദ്യുതി ലഭ്യമാക്കും. കെ.സി. വേണുഗോപാല്‍ എംപിയുടെ ഇടപെടലിലാണ് നടപടി. ഹിമാചല്‍ പ്രദേശ് മുഖ്യമന്ത്രി സുഖ്‌വീന്ദര്‍ സിങ് സുഖുവുമായാണ് വേണുഗോപാല്‍ ചര്‍ച്ച നടത്തിയത്. ഇതു സംബന്ധിച്ച സെക്രട്ടറിതല ചര്‍ച്ചകള്‍ പിന്നാലെ നടക്കും.
ഡിവൈഎഫ്ഐ സംസ്ഥാന പ്രസിഡൻ്റ് ചിന്താ ജെറോമിന്റെ പി എച്ച് ഡി പ്രബന്ധം പരിശോധിക്കാൻ പ്രത്യേക സമിതി. പ്രബന്ധത്തിലെ ക്രമക്കേടുകൾ പരിശോധിക്കാൻ കേരള സർവകലാശാല നാലംഗ ഉപസമിതിയെ നിയോഗിക്കും. ചിന്തയുടെ പ്രബന്ധത്തിൽ ക്രമക്കേടുകൾ ഉണ്ടെന്ന പരാതിയുടെ അടിസ്ഥാനത്തിലാണ് സിൻഡിക്കേറ്റ് നടപടി. മലയാള വാണിജ്യ സിനിമകളുടെ പ്രത്യയശാസ്ത്രത്തെ അധികരിച്ചുള്ള ചിന്തയുടെ പ്രബന്ധത്തിലാണ് സർവകലാശാല പി എച്ച് ഡി ബിരുദം നൽകിയത്. എന്നാൽ മലയാള സിനിമകളെ കുറിച്ചുള്ള പ്രബന്ധം അന്യഭാഷ പ്രൊഫസർമാർ മൂല്യനിർണയം നടത്തിയെന്നും പ്രബന്ധത്തിലെ രചനകൾ മറ്റ് പ്രസിദ്ധീകരണങ്ങളിൽ നിന്ന് പകർത്തിയതാണെന്നും പരാതി ഉയർന്നിരുന്നു
സംസ്ഥാനത്ത് ഇന്നും വൈദ്യുതി നിയന്ത്രണം. രാത്രി 12.45 വരെയുള്ള സമയങ്ങളിൽ നിയന്ത്രണം ഉണ്ടാകുമെന്ന് കെഎസ്ഇബി. വൈദ്യുതി ആവശ്യകതയിൽ 900 മെഗാവാട്ടിൻ്റെ വരെ കുറവുള്ള സാഹചര്യത്തിലാണ് തീരുമാനം.
സംസ്ഥാനത്തെ വൈദ്യുതി പ്രതിസന്ധിക്ക് പരിഹാരം വൈകും. എന്‍ടിപിസിയില്‍ നിന്നും ഉയര്‍ന്ന വിലയ്ക്ക് തത്കാലം വൈദ്യുതി വാങ്ങില്ല. 30 രൂപ നിരക്കില്‍ വൈദ്യുതി വാങ്ങുന്നത് ജനങ്ങള്‍ക്ക് ഇരട്ടിപ്രഹരമാകുമെന്നാണ് വിലയിരുത്തല്‍. വിഷയം, പരിശോധനയിലാണെന്ന് മന്ത്രി സണ്ണി ജോസഫ് പറഞ്ഞു.
വിവാദമായ ആസൂത്രണ ബോര്‍ഡ് പരീക്ഷയില്‍ പുതിയ ചുരുക്ക പട്ടിക പ്രസിദ്ധീകരിച്ച് പിഎസ്‌സി. കട്ട് ഓഫ് മാര്‍ക്ക് 27ല്‍ നിന്ന് 38 മാര്‍ക്കായി ഉയര്‍ത്തി. ഓരോ ചുരുക്ക പട്ടികയിലും ഉള്‍പ്പെട്ടത് പത്ത് പേര് വീതം. അഭിമുഖ പരീക്ഷയ്ക്ക് ശേഷം അന്തിമ പട്ടിക.
കാലടി: കാട്ടുപന്നിയിടിച്ച് സ്‌കൂട്ടര്‍ യാത്രക്കാരന് പരിക്ക്. കുറുപ്പംപടി സ്വദേശി ലിജോ കുര്യാക്കോസിനാണ് പരിക്കേറ്റത്. മലയാറ്റൂര്‍ നടുവട്ടം കാരക്കാട് ചെക്ക്പോസ്റ്റിന് സമീപത്താണ് അപകടമുണ്ടായത്. ജോലി കഴിഞ്ഞ് വീട്ടിലേക്ക് മടങ്ങുന്നതിനിടെയായിരുന്നു സംഭവം.
പരീക്ഷാ ക്രമക്കേടില്‍ തിരുവനന്തപുരം ലോ അക്കാദമി എക്‌സാമിനേഷന്‍ സെന്റര്‍ സസ്‌പെന്‍ഡ് ചെയ്യാന്‍ തീരുമാനം. കേരള സര്‍വകലാശാല സിന്‍ഡിക്കേറ്റിലാണ് തീരുമാനം.
ലോ അക്കാദമിയില്‍ നടന്ന ഒരു പരീക്ഷയില്‍ ക്രമക്കേട് കണ്ടെത്തിയിരുന്നു. ക്രമക്കേടുകളുടെ സിസിടിവി ദൃശ്യങ്ങള്‍ സര്‍വകലാശാല പരിശോധിച്ചു. സംഭവത്തില്‍ വിദഗ്ധ അന്വേഷണത്തിനും തീരുമാനം.
മഞ്ജു വാര്യര്‍ തടവിലാണെന്ന ആരോപണത്തില്‍ പരിഹാസ പോസ്റ്റുമായി സഹോദരന്‍ മധു വാര്യർ. തോക്കിന്‍ മുനയിലുള്ള മഞ്ജുവിനെ കണ്ട് ഞെട്ടിയെന്നായിരുന്നു കുടുംബത്തോടൊപ്പമുള്ള ചിത്രം പങ്കുവെച്ചുള്ള മധു വാര്യരുടെ പോസ്റ്റ്. പോസ്റ്റിന് പൊട്ടിച്ചിരിക്കുന്ന ഇമോജി കമന്റായി ഇട്ടായിരുന്നു മഞ്ജുവിന്റെ പ്രതികരണം. സംവിധായകന്‍ സനല്‍കുമാര്‍ ശശിധരന്റെ ആരോപണങ്ങൾക്കിടെയാണ് മധു വാര്യരുടെ പോസ്റ്റ്.
ബഹിരാകാശത്ത് സ്വന്തമായി ആയുധങ്ങള്‍ വിന്യവിച്ചിട്ടുണ്ടെന്ന് യു.എസ് സ്‌പേസ് ഫോഴ്‌സ് ഔദ്യോഗികമായി സ്ഥിരീകരിച്ചു. ഇത്തരത്തിലുള്ള ആക്രമണ ശേഷി തങ്ങള്‍ക്കുണ്ടെന്ന് യുഎസ് ലോകത്തിന് മുന്നില്‍ തുറന്നു സമ്മതിക്കുന്നത് ചരിത്രത്തില്‍ ആദ്യമായാണ്. ശത്രുരാജ്യങ്ങളില്‍ നിന്ന് യുഎസിനെ സംരക്ഷിക്കാന്‍ ഈ 'ഓണ്‍-ഓര്‍ബിറ്റ്' ആയുധം അത്യാവശ്യമാണെന്ന് യു.എസ് എയര്‍ഫോഴ്‌സ് സെക്രട്ടറി ട്രോയ് മീങ്ക് വ്യക്തമാക്കി. ഇത് ചൈനയ്ക്കും റഷ്യയ്ക്കുമുള്ള ശക്തമായ മുന്നറിയിപ്പുകൂടിയായാണ് വിലയിരുത്തപ്പെടുന്നത്.
സംസ്ഥാനത്തെ വൈദ്യുതി പ്രതിസന്ധിയില്‍ സുപ്രിംകോടതിയെ സമീപിച്ച് കേരളം. വൈദ്യുതി കരാര്‍ റദ്ദാക്കിയതിനെതിരായ ഹര്‍ജി അടിയന്തിരമായി പരിഗണിക്കണമെന്നാണ് ആവശ്യം. സുപ്രിംകോടതിയില്‍ സര്‍ക്കാര്‍ അപേക്ഷ നല്‍കി
മദ്യനയ രൂപീകരണ ചര്‍ച്ചകളിലേക്ക് കടന്ന് യുഡിഎഫ് സര്‍ക്കാര്‍. ചര്‍ച്ചകള്‍ക്ക് ഈമാസം 23ന് തുടക്കമാകും. എക്‌സൈസ് മന്ത്രി എം.ലിജുവിന്റെ അധ്യക്ഷതയില്‍ തിരുവനന്തപുരത്താണ് ചര്‍ച്ച നടക്കുക. പൊതുജനങ്ങള്‍ക്ക് അഭിപ്രായം അറിയിക്കാന്‍ വെബ്‌സൈറ്റും ഉണ്ട്. min.co.ex@kerala.gov.in മെയിലില്‍ അറിയിക്കാം.
