ആനക്കാംപൊയിൽ-കള്ളാടി-മേപ്പാടി തുരങ്കപാതയുടെ നിർമ്മാണം തടയാൻ ശ്രമമെന്ന ആരോപണവുമായി സിപിഐഎം. മുഖ്യമന്ത്രി വി.ഡി. സതീശൻ പ്രതിപക്ഷ നേതാവായിരിക്കെ നടത്തിയ "തുരങ്കപാതയെ ഞങ്ങൾ എതിർക്കും" എന്ന പ്രസ്താവന സത്യമാവുകയാണോ എന്ന സംശയം ബലപ്പെടുന്നതായി സിപിഐഎം ഏരിയ സെക്രട്ടറി വിനോദ് പറഞ്ഞു. പദ്ധതി അവസാനിപ്പിക്കാൻ അപകടത്തെ കൂട്ടുപിടിക്കുകയാണ് യുഡിഎഫ് സർക്കാർ ചെയ്യുന്നതെന്ന് മുൻ എംഎൽഎ ലിന്റോ ജോസഫും കുറ്റപ്പെടുത്തി. തുരങ്കപാതയുടെ നിർമാണം താൽക്കാലികമായി നിർത്തിവെച്ചിട്ട് രണ്ടര മാസം പിന്നിടുന്നു. ജൂലൈ ഏഴിന് മേപ്പാടി മുഖത്തുണ്ടായ മണ്ണിടിച്ചിലാണ് നിർമാണം താൽക്കാലികമായി നിർത്തിവയ്ക്കാന്‍ കാരണം. ടണലിന്റെ ആനക്കാംപൊയിൽ ഭാഗത്ത് ആര്‍എച്ച്എസ് 110 മീറ്ററും എല്‍എച്ച്എസ് 20 മീറ്ററും തുരയ്ക്കല്‍ പൂർത്തിയായിരുന്നു. നിലവിലെ തിരുവമ്പാടി എംഎൽഎ പദ്ധതി പ്രദേശം ഇതുവരെയും സന്ദർശിച്ചിട്ടില്ലെന്നും ആക്ഷേപമുണ്ട്.
ആദായ നികുതി വകുപ്പില്‍ ജോലി വാഗ്ദാനം ചെയ്ത് 25 ലക്ഷം രൂപ തട്ടിയെടുത്തതായി പരാതി. കണ്ണൂര്‍ പാനൂർ സ്വദേശി ദാമോദരനാണ് അയല്‍വാസിയായ സുന്ദരന്റെ തട്ടിപ്പിനിരയായത്. കേന്ദ്ര സർക്കാരിൽ സ്വാധീനമുണ്ടെന്നും മകന് ജോലി വാങ്ങിത്തരാമെന്നുമായിരുന്നു വാഗ്ദാനം. ഐഎഎസ് ഓഫീസര്‍ എന്നു പറഞ്ഞ് രണ്ടുപേരെക്കൊണ്ട് ഫോണില്‍ സംസാരിപ്പിച്ച് വിശ്വാസം പിടിച്ചുപറ്റിയ ശേഷമായിരുന്നു തട്ടിപ്പ്. ദാമോദരന്റെ പരാതിയില്‍ സുന്ദരൻ ഉൾപ്പെടെ മൂന്നു പേർക്കെതിരെയാണ് കേസ് എടുത്തത്.
ജില്ലാ നേതൃത്വത്തിനെതിരെ കടുത്ത വിമർശനങ്ങൾ നിലനിൽക്കുന്നതിനിടെ സിപിഐഎം വിപുലീകൃത കണ്ണൂർ ജില്ലാ കമ്മിറ്റി ഒക്ടോബറിൽ ചേരും. ഒക്ടോബർ 18, 19 തിയതികളിൽ ചേരുന്ന കമ്മിറ്റിയിൽ കെ.കെ. രാഗേഷിനെ ജില്ല സെക്രട്ടറി സ്ഥാനത്ത് നിന്ന് മാറ്റണമെന്ന ആവശ്യമടക്കം ചർച്ചയാകും. പയ്യന്നൂരിലെ ഫണ്ട് വിവാദം, പാർട്ടി മുൻകൈ എടുത്ത് ആരംഭിച്ച ഹലാൽ ഫായിദ ബാങ്ക് ഉൾപ്പെടെ സംരംഭങ്ങളിലെ സാമ്പത്തിക ആരോപണങ്ങൾ, തളിപ്പറമ്പ്, പയ്യന്നൂർ മണ്ഡലങ്ങളിലെ സ്ഥാനാർഥി നിർണയത്തിലെ വീഴ്ച, ടി.കെ.ഗോവിന്ദനും വി.കുഞ്ഞികൃഷ്ണനും പാർട്ടി വിട്ടത് ഉൾപ്പെടെയുള്ള വിഷയങ്ങളിൽ പ്രതിനിധികൾ വിമർശനം ഉന്നയിച്ചേക്കും. പി ബി അംഗങ്ങളുടെ സാന്നിധ്യത്തിലാകും വിപുലീകൃത കമ്മിറ്റിയും ചേരുക.
തിരൂരിൽ നിന്ന് ബെംഗളൂരൂവിലേക്ക് പോകുകയായിരുന്ന 'എ വൺ ട്രാവൽസി'ന്റെ ബസിൽ ചോർച്ച. എസി പ്രവർത്തിക്കാത്തതും മഴവെള്ളം ഉള്ളിലേക്ക് ചോർന്നിറങ്ങിയതും യാത്രക്കാരെ വലച്ചു. തുടർന്ന് യാത്രക്കാർ വാഹനം മുക്കം പൊലീസ് സ്റ്റേഷന് മുന്നിൽ തടഞ്ഞിട്ടു. ബസ് ജീവനക്കാർ അപമര്യാദയായി പെരുമാറിയെന്നും യാത്രക്കാർ പറഞ്ഞു. പ്രതിഷേധത്തെ തുടർന്ന് ചിലര്‍ യാത്ര അവസാനിപ്പിച്ച് മടങ്ങി, മറ്റുള്ളവർക്കായി മാനന്തവാടിയിൽ നിന്നും പകരം ബസ് ഏർപ്പെടുത്തി.
വിദ്യാർഥി സംഘടനാ പ്രവർത്തനത്തിനുള്ള നിയന്ത്രണം സംബന്ധിച്ച കരട് രേഖ പുറത്തുവന്നതിൽ ആഭ്യന്തര അന്വേഷണത്തിന് കേരള സർവകലാശാല. ഉദ്യോഗസ്ഥർ തയ്യാറാക്കിയ കരട് രേഖ പരസ്യമായത് എങ്ങനെയെന്ന് അന്വേഷിക്കും. ലീഗൽ, അഡ്‌മിനിസ്ട്രേറ്റീവ് വകുപ്പിലെ ഉദ്യോഗസ്ഥരാണ് അന്വേഷണ പരിധിയിലുള്ളത്. വീഴ്ച കണ്ടെത്തിയാൽ അച്ചടക്ക നടപടി സ്വീകരിക്കാനാണ് തീരുമാനം. സർവകലാശാല തയ്യാറാക്കിയ കരടിന്റെ പകർപ്പ് ഉദ്യോഗസ്ഥർക്കും സിൻഡിക്കേറ്റ് അംഗം അജയ് ജുവൽ കുര്യാക്കോസിനും മാത്രമാണ് ലഭ്യമാക്കിയിരുന്നത്.
ശബരിമലയിലെ അരവണ പ്രതിസന്ധി തുടരുന്നു. ഒരാള്‍ക്ക് രണ്ട് ടിന്‍ അരവണ മാത്രമാണ് രാവിലെ മുതല്‍ നല്‍കുന്നത്. 15,000ത്തിലധികം സ്റ്റോക്ക് ഉണ്ടെന്നാണ് ദേവസ്വം ബോർഡ് പറയുന്നത്. എന്നാല്‍ ഓൺലൈൻ ബുക്കിങ് മാത്രം ഇന്ന് 15,000 ഉണ്ട്. 2000ൽ അധികമാണ് സ്പോട് ബുക്കിങ്. കന്നിമാസ പൂജ പൂർത്തിയാക്കി ഇന്ന് രാത്രി നട അടയ്ക്കും.
ആന്റോ അഗസ്റ്റിന്റെ വയനാട് വാഴവറ്റയിലെ വീട്ടിലെ നിരീക്ഷണ ക്യാമറാ ദൃശ്യങ്ങൾ മായ്ച്ചുകളഞ്ഞതായി എക്സൈസ്. വീട്ടിലെ 22 സിസിടിവി ക്യാമറകളിലെയും ദൃശ്യങ്ങള്‍ പൂര്‍ണമായും മായ്ച്ചുകളഞ്ഞ നിലയിലാണ്. തെളിവെടുപ്പിന്റെ ഭാഗമായി ആന്റോ അഗസ്റ്റിനുമായി എക്സൈസ് സംഘം വീട്ടിൽ പരിശോധന നടത്തിയപ്പോഴാണ് ഡിവിആർ സ്റ്റോറേജ് ഉള്‍പ്പെടെ എടുത്തുമാറ്റിയതായി കണ്ടെത്തിയത്. തെളിവു നശിപ്പിക്കാനുള്ള ആസൂത്രിത ശ്രമമെന്നാണ് എക്സൈസിന്റെ നിഗമനം. വീട്ടിലെ വൈദ്യുതി കണക്ഷന്‍ ആന്റോ അഗസ്റ്റിന്റെ പേരിലാണെന്നതിനുള്ള രേഖകള്‍ അന്വേഷണ സംഘത്തിന് ലഭിച്ചു. ആന്റോ തന്നെയാണ് അവസാന ബില്‍ അടച്ചിരിക്കുന്നത്. വാഴവറ്റയിലെ വീടുമായും സ്ഥലമായും ബന്ധമില്ലെന്ന ആന്റോയുടെ വാദമാണ് ഇതോടെ പൊളിയുന്നത്.
സംസ്ഥാനത്തിന്റെ വിവിധ ഭാഗങ്ങളില്‍ നിന്നായി അന്തർസംസ്ഥാന മോഷണ സംഘത്തിലെ 11 പേര് പിടിയിൽ. തൃശൂരില്‍ നിന്ന് ഒരാളും, കളമശേരി, കണ്ണൂര്‍ എന്നിവിടങ്ങളില്‍നിന്നായി അഞ്ചു പേര് വീതവുമാണ് അറസ്റ്റിലായത്. എല്ലാവരും ഉത്തര്‍പ്രദേശില്‍ നിന്നുള്ളവരാണ്. ഇവരില്‍നിന്ന് തൊണ്ടിമുതലുകളും കണ്ടെത്തി. വിമാനത്തില്‍ കേരളത്തില്‍ എത്തുന്ന സംഘം, ട്രെയിനില്‍ ബൈക്കുകള്‍ എത്തിക്കും. അതില്‍ സഞ്ചരിച്ചാണ് മോഷണം. പ്രതികൾക്കെതിരെ മുൻപും സമാന കുറ്റകൃത്യങ്ങൾക്ക് തൃക്കാക്കര പൊലീസ് സ്റ്റേഷനിൽ കേസുകളുണ്ട്.
എസ്ഐആറിന്റെ ഭാഗമായി നോട്ടീസ് അയയ്ക്കുന്നത് ഒഴിവാക്കാനാകില്ലെന്ന് തെരഞ്ഞെടുപ്പ് കമ്മീഷന്‍. ഡല്‍ഹിയില്‍ വോട്ടര്‍ പട്ടികയിലെ ക്രമക്കേടുമായി ബന്ധപ്പെട്ട് പരക്കെ നോട്ടീസ് നല്‍കിയതിലാണ് കമ്മീഷന്റെ വിശദീകരണം. നോട്ടീസ് അയച്ചതുകൊണ്ട് പേര് നീക്കം ചെയ്യപ്പെടില്ല. വിവരങ്ങളിലെ പൊരുത്തക്കേടുകള്‍ കാരണമുള്ള സ്വാഭാവിക നോട്ടീസാണ് വരുന്നത്. സമൂഹമാധ്യമങ്ങളില്‍ പ്രചരിക്കുന്നപോലുള്ള ആശങ്കകള്‍ക്ക് അടിസ്ഥാനമില്ലെന്നും കമ്മീഷന്‍ വ്യക്തമാക്കി. കേന്ദ്ര മന്ത്രിമാര്‍ ഉള്‍പ്പെടെ 32 ലക്ഷത്തിലേറെപ്പേര്‍ക്ക് നോട്ടീല് ലഭിച്ചതിലാണ് കമ്മീഷന്റെ വിശദീകരണം.
എഐഎസ്എഫ് നേതാവിനെ അകാരണമായി പൊലീസ് മര്‍ദിച്ചതായി പരാതി. എഐഎസ്എഫ് പത്തനംതിട്ട ജില്ലാ സെക്രട്ടറി ശരത് ലാലിനാണ് അടൂര്‍ പൊലീസിന്റെ മര്‍ദനമേറ്റത്. പൊലീസ് പിടിയിലായ പ്രവര്‍ത്തകനെ കാണാനെത്തിയപ്പോള്‍ ആയിരുന്നു മര്‍ദനം. സ്റ്റേഷനു മുന്നില്‍വച്ചും, റോഡില്‍വച്ചും പൊലീസ് മര്‍ദിച്ചുവെന്നാണ് ശരത്തിന്റെ പരാതി.
പ്രധാനമന്ത്രി നരേന്ദ്ര മോദിയെ പരിഹസിച്ചതിന്റെ പേരില്‍ ഗുണ്ടകളില്‍നിന്ന് നിരന്തരം ഭീഷണി നേരിടുന്നതായി കൊമേഡിയന്‍ പുല്‍കിത് മാണി. കോണ്‍ഗ്രസ് നേതാവ് രാഹുല്‍ ഗാന്ധിയുടെ ഛാത്രോം കി ഗൂഞ്ച് പരിപാടിക്കിടെയാണ് പുല്‍കിത് മാണി പ്രധാനമന്ത്രി മോദിയെ ട്രോളിയത്. പിന്നാലെയാണ് ഗുണ്ടകളില്‍നിന്ന് ഭീഷണി ഉണ്ടാകുന്നത്. ഇതോടെ, ഷോകള്‍ ഉള്‍പ്പെടെ പുൽകിത് മാണി റദ്ദാക്കി.
തിരുവനന്തപുരം പൂന്തുറയില്‍ 14 പേര്‍ക്ക് നായയുടെ കടിയേറ്റു. ഇന്ന് പുലര്‍ച്ചെയോടെയാണ് സംഭവം. വളര്‍ത്തുനായയാണ് കടിച്ചതെന്നും, അതിനെ തല്ലിക്കൊന്നെന്നും നാട്ടുകാര്‍ പറഞ്ഞു. കടിയേറ്റ 13 പേർ ജനറൽ ആശുപത്രിയിൽ ചികിത്സയിലാണ്. ഗുരുതരായി പരിക്കേറ്റ ഒരാളെ മെഡിക്കല്‍ കോളേജ് ആശുപത്രിയിലേക്ക് മാറ്റി.
സാമ്പത്തിക തിരിമറി ആരോപണങ്ങൾ ഉയർന്ന കണ്ണൂരിലെ ഹലാൽ ഫായിദ ബാങ്ക് പുതിയ സംരംഭങ്ങളിലേക്ക് കടക്കുന്നു.. നേരത്തെ തീരുമാനിച്ച മാംസ കയറ്റുമതിക്കുള്ള പദ്ധതി ഉപേക്ഷിച്ച്, വ്യവസായങ്ങൾ തുടങ്ങാനാണ് തീരുമാനം. ഇതിന്റെ ഡിപിആർ ഉണ്ടാക്കാനുള്ള നടപടികൾ തുടങ്ങി. ഇന്നലെ ചേർന്ന ജനറൽ ബോഡി യോഗത്തിലാണ് തീരുമാനം. 511 നിക്ഷേപകരിൽ 76 പേർ മാത്രമാണ് ഇന്നലെ ജനറൽ ബോഡി യോഗത്തിന് എത്തിയത്. ഉടൻ തന്നെ ചേരുന്ന ഭരണസമിതി യോഗം പുതിയ പദ്ധതികളിൽ അന്തിമ തീരുമാനം എടുക്കും. നിക്ഷേപകരിൽ ചിലർ ബാങ്കിനെതിരെ പരാതി ഉന്നയിച്ചിരുന്നു. അതേസമയം ഇന്നലെ ചേർന്ന യോഗത്തിൽ നിക്ഷേപകർ ആരും പണം തിരികെ ആവശ്യപ്പെട്ടില്ല. ആരെങ്കിലും ആവശ്യപ്പെട്ടാൽ പണം തിരികെ നൽകുമെന്നാണ് ഭരണ സമിതിയുടെ നിലപാട്.
ശ്രീനാരായണ ഗുരുവിന്റെ ദർശനങ്ങളിൽ ഊന്നിയാണ് സംസ്ഥാന സർക്കാരിന്റെ പ്രവർത്തനങ്ങളെന്ന് മുഖ്യമന്ത്രി വി.ഡി. സതീശൻ. ഗുരുദർശനങ്ങൾ എല്ലാ മലയാളികളും പൈതൃകമായി ഏറ്റെടുക്കണം. ലോകത്തിന് മുന്നിൽ അഭിമാനത്തോടെ പറയാൻ കഴിയുന്ന പൈതൃകമാണത്. ഗുരുവിന്റെ ദർശനങ്ങളെ ഉയർത്തിപ്പിടിച്ച് പിന്തിരിപ്പൻ ആശയങ്ങളിൽ നിന്ന് കേരളത്തെ മോചിപ്പിക്കാനുള്ള പോരാട്ടം തുടരുമെന്നും മുഖ്യമന്ത്രി പറഞ്ഞു.. വർക്കല ശിവഗിരിയിൽ ശ്രീനാരായണ ഗുരു സമാധി ദിനം ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
കോഴിക്കോട് മലബാർ ക്രിസ്ത്യൻ കോളജിന് സമീപമുണ്ടായ ബൈക്കപകടത്തിൽ കാലിക്കറ്റ് എഫ്‌സി താരം റിജോൺ ജോസിന് ദാരുണാന്ത്യം. തൃശൂർ സ്വദേശിയായ റിജോൺ സഞ്ചരിച്ച ബൈക്ക്, ഇന്നലെ രാത്രി മറ്റൊരു ബൈക്കുമായി കൂട്ടിയിടിക്കുകയായിരുന്നു. അപകടത്തിൽ സഹതാരം ഗനി അഹമ്മദ് നിഗത്തിനും ഗുരുതരമായി പരിക്കേറ്റു. പരിക്കേറ്റ ഇരുവരെയും ഉടൻ ആശുപത്രിയിൽ എത്തിച്ചെങ്കിലും റിജോണിന്റെ ജീവൻ രക്ഷിക്കാനായില്ല. ഗനി ആശുപത്രിയിൽ ചികിത്സയിലാണ്. സൂപ്പർ ലീഗ് കേരളയിൽ കാലിക്കറ്റ് എഫ്‌സിയുടെ പ്രതിരോധ താരമാണ് റിജോൺ . ഫോഴ്‌സ് കൊച്ചി, എഫ്‌സി കേരള ക്ലബുകൾക്കായും കളിച്ചിട്ടുണ്ട്. കഴിഞ്ഞ സന്തോഷ് ട്രോഫിയിൽ കേരളത്തിനായി കളിച്ച താരമാണ് പരിക്കേറ്റ ഗനി അഹമ്മദ് നിഗം..
തൃണമൂൽ കോൺഗ്രസിന്റെ പേരും ചിഹ്നവും മരവിപ്പിച്ച തെരഞ്ഞെടുപ്പ് കമ്മീഷന്റെ തീരുമാനം ചോദ്യം ചെയ്ത് സമർപ്പിച്ച ഹർജിയിൽ അടിയന്തരമായി വാദം കേൾക്കണമെന്ന് മമത ബാനർജി സുപ്രിം കോടതിയിൽ . പാർട്ടിയിലെ എതിർ വിഭാഗങ്ങൾ തമ്മിലുള്ള തർക്കത്തിനിടെയാണ് തീരുമാനമെന്നും , നടപടികൾ പുരോഗമിക്കുന്നതിനിടെ പാർട്ടിയുടെ സ്വത്വം ഇല്ലാതാക്കാനുള്ള നീക്കം റദ്ദാക്കണമെന്നുമാണ് ആവശ്യം . മുതിർന്ന അഭിഭാഷകൻ കപിൽ സിബലാണ് മമതയ്ക്കായി കോടതിയിൽ ആവശ്യം ഉന്നയിച്ചത് . എതിർകക്ഷികളുടെ വാദവും കേൾക്കേണ്ടതുണ്ടെന്ന് ചീഫ് ജസ്റ്റിസ് അധ്യക്ഷനായ ബെഞ്ച് വ്യക്തമാക്കി. ഒക്ടോബർ ആറിന് നടക്കാനിരിക്കുന്ന നിയമസഭാ ഉപതെരഞ്ഞെടുപ്പിനായി തെരഞ്ഞെടുപ്പ് കമ്മീഷൻ ഇരു വിഭാഗങ്ങൾക്കും ബദൽ പേരുകളും ചിഹ്നങ്ങളും അനുവദിച്ചിരുന്നു.
നന്ദിഗ്രാം നിയമസഭാ ഉപതെരഞ്ഞെടുപ്പിൽ മത്സരിക്കാനിരിക്കെ പശ്ചിമ ബംഗാൾ പോലീസ് കസ്റ്റഡിയിലെടുത്തത് ചോദ്യം ചെയ്ത കോൺഗ്രസ് സ്ഥാനാർഥി മിലൻ പ്രധാൻ കൊൽക്കത്ത ഹൈക്കോടതിയെ സമീപിച്ചു. ഹർജി ചൊവ്വാഴ്ച പരിഗണിക്കും. ഒക്ടോബർ ആറിന് ഉപതെരഞ്ഞെടുപ്പ് നടക്കാനിരിക്കെ മിലൻ പ്രധാനെ കസ്റ്റഡിയിലെടുക്കുകയായിരുന്നു. 2017 ലെ ഒരു കൊലപാതക കേസുമായി ബന്ധപ്പെട്ടാണ് കസ്റ്റഡി. ഒക്ടോബർ മൂന്ന് വരെ കോടതി ഇയാളെ റിമാൻഡ് ചെയ്തിരിക്കുകയാണ്. ഈ സാഹചര്യത്തിൽ തിരഞ്ഞെടുപ്പ് പ്രവർത്തനങ്ങൾ നടത്താൻ സാധിക്കുന്നില്ലെന്നും കേസ് രാഷ്ട്രീയ പ്രേരിതമാണെന്നും ചൂണ്ടികാണിച്ചാണ് ഹർജി.
ജനങ്ങൾക്ക് ആദരവോടെ ഉദ്യോഗസ്ഥർക്ക് എന്തുവേണമെങ്കിലും നൽകാമെന്ന വിവാദ പരാമർശത്തിൽ വിശദീകരണവുമായി മന്ത്രി ശിവലിംഗെ ഗൗഡ. ഉദ്യോഗസ്ഥർക്ക് കൈക്കൂലി നൽകാൻ മന്ത്രി ആഹ്വാനം ചെയ്തുവെന്ന കടുത്ത വിമർശനവുമായി പ്രതിപക്ഷം ഉൾപ്പെടെ രംഗത്തുവന്നതോടെയുമാണ് മന്ത്രി വിശദീകരണവുമായി രംഗത്തുവന്നത്. ജോലി ചെയ്തു തന്ന ഉദ്യോഗസ്ഥരെ ബഹുമാനിക്കണമെന്നാണ് താൻ ഉദ്ദേശിച്ചത് .. ബഹുമാനിക്കുക എന്നതിന് പകരം ആദരവോടെ നൽകുകയെന്ന് അബദ്ധത്തിൽ പറഞ്ഞുപോയതാണെന്നും ശിവലിംഗെ ഗൗഡ വിശദീകരിച്ചു. കഴിഞ്ഞ ദിവസം ഹാസനിലെ സകലേഷ്‌പുരയിൽ വച്ചായിരുന്നു വിവാദ പരാമർശം..
തമിഴ്നാട്ടിലെ ഉപതെരഞ്ഞെടുപ്പ് പ്രചാരണത്തിന് മുഖ്യമന്ത്രി ജോസഫ് വിജയ്. ഈ മാസം ഇരുപത്തിയെട്ടിനാണ് മധുരാന്തകം മണ്ഡലത്തിലെ ആദ്യ റാലി. ഒക്ടോബർ രണ്ടിനും വിജയ് മണ്ഡലത്തിൽ പ്രചാരണത്തിനെത്തും. ഡിഎംകെയ്ക്കായി ഒക്ടോബർ മൂന്നിന് എം.കെ. സ്റ്റാലിൻ മണ്ഡലത്തിലെത്തും ... അണ്ണാഡിഎംകെ സ്ഥാനാർഥിക്കായി 25, 26 ദിവസങ്ങളിൽ പാർട്ടി ജനറൽ സെക്രട്ടറി എടപ്പാടി പളനി സ്വാമി വോട്ട് തേടും. ധാരാപുരത്തെ വിജയ് യുടെ പ്രചാരണ പരിപാടികൾ ടിവികെ പുറത്തുവിട്ടിട്ടില്ല.
ടിവികെ ഭരണത്തിൽ തൃപ്തരല്ലാത്തതു കൊണ്ടാണ് ഉപതെരഞ്ഞെടുപ്പിൽ ഇടതുപാർട്ടികൾ മത്സരിക്കുന്നതെന്ന് ഡിഎംകെ. ടിവികെ സർക്കാർ ബിജെപിയുടെ അടിമയാണെന്നും തമിഴ്നാട്ടിലെ ജനങ്ങൾക്ക് നന്മയൊന്നും ചെയ്തിട്ടില്ലെന്നും ഇടതുപാർട്ടികൾക്ക് ബോധ്യമായി. സംസ്ഥാനത്തെ കർഷകർ പ്രതിഷേധത്തിലാണ്. ഇടതു പാർട്ടികൾക്ക് എങ്ങനെയാണ് അതിൽ നിശബ്ദത പാലിക്കാൻ കഴിയുകയെയെന്നും ഡിഎംകെ വക്താവ് ടികെഎസ്‌ ഇളങ്കോവൻ ചോദിച്ചു.
കർണാടക നിയമസഭയിൽ വന്ദേമാതരം വിവാദം. സമ്മേളനത്തിന്റെ ആദ്യ ദിനം സഭയിൽ കേൾപ്പിച്ചത് വന്ദേമാതരത്തിന്റെ ആദ്യ രണ്ടു ചരണങ്ങളാണ്. ഇതിനുശേഷം കോൺഗ്രസ് അംഗങ്ങൾ ഇരുന്നെങ്കിലും ബിജെപി എംഎൽഎമാർ ആറു ചരണങ്ങളും ആലപിക്കുകയായിരുന്നു. രണ്ടു ചരണങ്ങൾ പൂർത്തിയായ ശേഷം സ്‌പീക്കർ മുഖ്യമന്ത്രിയെ സംസാരിക്കാൻ വിളിച്ച ശേഷമായിരുന്നു ബിജെപി അംഗങ്ങളുടെ നീക്കം. ലെജിസ്ലേറ്റീവ് കൗൺസിലിലും സമാനമായ രംഗങ്ങൾ ഉണ്ടായി. ആറു ചരണങ്ങളും ആലപിക്കാത്തതിനെതിരെ ബിജെപി രംഗത്തുവന്നു. കോൺഗ്രസ് ദേശീയ നേതൃത്വത്തെ പ്രീതിപ്പെടുത്താനാണ് കർണാടക സർക്കാരിന്റെ നടപടി എന്നാണ് വിമർശനം.
പഞ്ചാബിൽ മയക്കുമരുന്ന് മാഫിയയ്‌ക്കെതിരെ നടപടിയെടുക്കാത്തതിൽ പ്രതിഷേധിച്ച് യുവാവ് വിഷം കഴിച്ച സംഭവം വൻ രാഷ്ട്രീയ വിവാദമാകുന്നു. സംഗ്രൂർ കളക്ടറേറ്റിന് മുന്നിൽ വെച്ചാണ് നാമോൾ ഗ്രാമവാസിയായ ജഗ്സീർ സിംഗ് വിഷം കഴിച്ചത്. തൻ്റെ ഗ്രാമത്തിൽ പരസ്യമായി മയക്കുമരുന്ന് വിൽപ്പന നടത്തുന്നതിനെതിരെ പരാതി നൽകിയിട്ടും അധികൃതർ നടപടിയെടുത്തില്ലെന്നാണ് ആരോപണം. ഗുരുതരാവസ്ഥയിലായ ജഗ്സീറിനെ പട്യാലയിലെ ആശുപത്രിയിലേക്ക് മാറ്റി. സംഭവം പുറത്തുവന്നതോടെ കോൺഗ്രസും ബി.ജെ.പിയും എ എ പി സർക്കാരിനെതിരെ ശക്തമായ പ്രതിഷേധവുമായി രംഗത്തെത്തി.
റഷ്യൻ പാർലമെന്റ് തെരഞ്ഞെടുപ്പിൽ വ്ളാഡിമർ പുടിന്റെ യുണൈറ്റഡ് റഷ്യ പാർട്ടിക്ക് മുൻതൂക്കം. വോട്ടെണ്ണൽ പുരോഗമിക്കുമ്പോൾ 58 ശതമാനം വോട്ടുമായി യുണൈറ്റഡ് റഷ്യ മുന്നിലാണ്. യുക്രെയ്ന്‍ അധിനിവേശം ആരംഭിച്ചതിന് ശേഷമുള്ള ആദ്യ തെരഞ്ഞെടുപ്പ് പുടിന് നിർണായകമാണ്. മൂന്ന് ദിവസം നീണ്ടുനിന്ന വോട്ടെടുപ്പ് ഞായറാഴ്ചയാണ് അവസാനിച്ചത്. ആദ്യഘട്ട ഫലസൂചനകൾ പ്രകാരം യുണൈറ്റഡ് റഷ്യ സുരക്ഷിതമായ നിലയിലേക്ക് എത്തുന്നെന്നാണ് റഷ്യൻ സെൻട്രൽ ഇലക്ഷൻ കമ്മീഷന്റെ കണക്കുകൾ സൂചിപ്പിക്കുന്നത്. 2022 ഫെബ്രുവരിയിൽ യുക്രെയ്നെതിരെ റഷ്യ പൂർണതോതിലുളള അധിനിവേശം ആരംഭിച്ചതിന് ശേഷമുള്ള ആദ്യത്തെ സ്റ്റേറ്റ് ഡുമ തെരഞ്ഞെടുപ്പാണിത്. രാജ്യത്തിന്റെ സൈനിക രാഷ്ട്രീയ നയങ്ങൾക്കുള്ള ജനപിന്തുണയുടെ തെളിവായിട്ടാണ് പുടിൻ ഈ തെരഞ്ഞെടുപ്പിനെ അവതരിപ്പിച്ചത്.
യെമനിൽ ഹൂതികൾക്കെതിരെ ആക്രമണം നടത്തുന്നതിൽ നിന്ന് തല്‍ക്കാലം പിൻമാറാൻ യു.എസ് പ്രസിഡന്റ് ഡൊണാള്‍ഡ് ട്രംപ് തീരുമാനിച്ചതായി ന്യൂയോർക് ടൈംസ് റിപ്പോർട്ട്. സൗദിയുടെ അഭ്യർഥന മാനിച്ചാണ് ട്രംപിന്റെ തീരുമാനം. നേരത്തെ, സൗദി കിരീടാവകാശി മുഹമ്മദ് ബിൻ സൽമാൻ ഹൂതികൾക്കെതിരെ സൈനിക സഹായം, ആവശ്യപ്പെട്ടിരുന്നെങ്കിലും ട്രംപ് നിരസിച്ചിരുന്നു. പിന്നീട്, റിയാദിലടക്കം ഹൂതികൾ വ്യോമാക്രമണം നടത്തിയതിന് ശേഷമാണ് സൗദിക്ക് സൈനിക പിന്തുണ നൽകാൻ ട്രംപ് തീരുമാനിച്ചതെന്നും യുഎസ് മാധ്യമം റിപ്പോർട്ട് ചെയ്യുന്നു. ആക്രമണ ലക്ഷ്യങ്ങൾ തീരുമാനിച്ച്, യുദ്ധവിമാനങ്ങളിൽ ബോംബുകൾ ലോഡ് ചെയ്തതിന് ചെയ്തതിന് ശേഷമാണ് പിന്മാറ്റം.
ഇറാനിൽ നിന്ന് ഉടനെ വിട്ടുപോകണമെന്ന് പൗരൻമാർക്ക് നിർദേശം നൽകി ഇറാനിലെ യുഎസ് വെർച്വൽ എംബസി. ഇറാനിലേക്ക് ഒരു കാരണവശാലും യാത്ര ചെയ്യരുത്. അവിടെയുള്ളവർ ഉടനെ രാജ്യം വിടുകയും വേണമെന്നാണ് മുന്നറിയിപ്പ്. സുരക്ഷാ സാഹചര്യം സങ്കീർണമാണെന്നും സംഘർഷം രൂക്ഷമാകാൻ സാധ്യതയുണ്ടെന്നും മുന്നറിയിപ്പിൽ യുഎസ് എംബസി വിശദീകരിക്കുന്നു. സൗദിയിലെ വിമാനത്താവളങ്ങളിലേക്കുള്ള ഹൂതി ആക്രമണങ്ങളും മുന്നറിയിപ്പിൽ എടുത്തുപറയുന്നുണ്ട്.
വടക്കൻ ശ്രീലങ്കയിലെ ചെമ്മണിയിൽ കൂട്ടക്കുഴിമാടം കണ്ടെത്തി. പ്രദേശത്ത് നിലവിലുണ്ടായിരുന്ന പൊതു ശ്മശാനത്തിന്റെ വിസ്തൃതി കൂട്ടുന്നതിനായി മണ്ണുമാറ്റുന്നതിനിടയിലാണ് മനുഷ്യ അസ്ഥികൂടങ്ങൾ കണ്ടെത്തിയത്. കൈക്കുഞ്ഞുങ്ങളുടെയും വൃദ്ധരുടേതുമടക്കം 572-ലധികം മൃതദേഹ അവശിഷ്ടങ്ങളാണ് കണ്ടെത്തിയത്. ശ്രീലങ്കയുടെ ചരിത്രത്തിൽ ഇതുവരെ കണ്ടെത്തിയതിൽ വച്ച് ഏറ്റവും വലിയ കൂട്ടക്കുഴിമാടമാണിത്. മതാചാരപ്രകാരമുള്ള സംസ്കാരമായിരുന്നില്ല നടന്നിരുന്നതെന്നാണ് കണ്ടെത്തൽ. മൃതദേഹങ്ങൾ വിവസ്ത്രമായിരുന്നുവെന്നും ആഴം കുറഞ്ഞ കുഴിയിൽ ഒന്നിന് മേലെ ഒന്നായി അടുക്കിവെച്ച നിലയിലായിരുന്നു അവശിഷ്ടങ്ങൾ കണ്ടെത്തിയതെന്നും ശ്രീലങ്കൻ മനുഷ്യാവകാശ കമ്മീഷൻ വ്യക്തമാക്കി.
ഏഷ്യൻ ഗെയിംസ് രണ്ടാം ദിനവും ഷൂട്ടിങ്ങിലൂടെ ഇന്ത്യൻ മുന്നേറ്റം. 10 മീറ്റർ എയർ റൈഫിൾ വ്യക്തിഗത ഇനത്തിലും ടീം ഇനത്തിലും മെഡൽ നേടിയതോടെ ഷൂട്ടിങ്ങിൽ മെഡൽ നേട്ടം അഞ്ചായി. 10 മീറ്റർ എയർ റൈഫിളിൽ ഹിമാൻഷു ധില്ലൻ വെള്ളിയും രുദ്രാൻക്ഷ് പാട്ടിൽ വെങ്കലവും നേടി. 10 മീറ്റർ എയർ റൈഫിൾ ടീം ഇനത്തിലും ഇന്ത്യ വെള്ളി നേടി. മിക്സഡ് മാർഷൽ ആർട്ട്സിൽ സുചിക തരിയാലും വെങ്കല മെഡൽ നേടി. 60 കിലോ വിഭാഗത്തിൽ സെമിയിൽ സിങ്കപ്പൂർ താരത്തോട് തോൽക്കുകയായിരുന്നു. നീന്തലിൽ മലയാളിയായ സജൻ പ്രകാശ് ഉൾപ്പെട്ട ഇന്ത്യൻ ടീമിന് ഫൈനലിലെത്താനായില്ല. ഹോക്കിയിൽ രണ്ടാം മത്സരത്തിലും ഇന്ത്യൻ വനിതകൾ തകർപ്പൻ ജയം സ്വന്തമാക്കി. ഇന്തോനേഷ്യയെ ഒന്നിനെതിരെ 17 ഗോളുകൾക്കാണ് തോൽപ്പിച്ചത്. ഇന്ന് നാല് മെഡലുകളാണ് ഇന്ത്യ നേടിയത്. 4 വെള്ളിയും രണ്ട് വെങ്കലവുമുൾപ്പെടെ 6 മെഡലുള്ള ഇന്ത്യ പത്താം സ്ഥാനത്താണ്.
ആദായ നികുതി കേസിൽ നടൻ ജയസൂര്യയുടെ അപ്പീൽ തള്ളിയ നടപടി ഹൈക്കോടതി റദ്ദാക്കി. ജയസൂര്യ ഹിയറിങ്ങിനു ഹാജരാകാത്തതിന്റെ പേരിലാണ് അപ്പീൽ തള്ളിയത്. ഇത്തരത്തിൽ നടപടി സ്വീകരിക്കാൻ അപ്പീൽ അതോറിറ്റിക്ക് കഴിയില്ല. ജയസൂര്യയുടെ വാദം കേട്ട് തീരുമാനമെടുക്കണമെന്നും ഹൈക്കോടതി വ്യക്തമാക്കി.
ഉത്തര്‍പ്രദേശിനെ ഉടന്‍ തന്നെ നാലായി വിഭജിക്കുമെന്ന് സംസ്ഥാന മന്ത്രി. എൻഡിഎ സഖ്യകക്ഷിയും സുഹെൽദേവ് ഭാരതീയ സമാജ് പാർട്ടി നേതാവുമായ ഓം പ്രകാശ് രാജ്ഭറിന്റേതാണ് അവകാശവാദം. പുർവാഞ്ചൽ സംസ്ഥാനം രൂപീകരിക്കപ്പെടുമ്പോൾ രാജ്ഭർ സമുദായത്തിൽ നിന്നുള്ള ഒരാളാകും മുഖ്യമന്ത്രി. പ്രധാനമന്ത്രി നരേന്ദ്ര മോദിയുമായി നടത്തിയ ചർച്ചയിൽ വിഭജനകാര്യത്തിൽ ഉറപ്പു ലഭിച്ചതായും രാജ്ഭർ പറഞ്ഞു.
കാരണങ്ങള്‍ വ്യക്തമാക്കാതെ അറസ്റ്റ് രേഖപ്പെടുത്തുന്ന പൊലീസ് ഉദ്യോഗസ്ഥന് വകുപ്പുതല നടപടി നേരിടണമെന്ന് സുപ്രീം കോടതി. അറസ്റ്റിനുള്ള കാരണം രേഖാമൂലം പ്രതിക്ക് മനസിലാകുന്ന രൂപത്തിൽ നൽകണം. വീഴ്ചയുണ്ടായാൽ ഉന്നത ഉദ്യോഗസ്ഥൻ അന്വേഷണം നടത്തി അച്ചടക്ക നടപടി സ്വീകരിക്കണം. പ്രതിയെ വീണ്ടും അറസ്റ്റ് ചെയ്യേണ്ടിവന്നാല്‍, കേസ് അന്വേഷണം മറ്റൊരു ഉദ്യോഗസ്ഥന് കൈമാറണം. കാരണങ്ങൾ വ്യക്തമാക്കാതെ അറസ്റ്റ് ചെയ്ത നടപടി കോടതി റദ്ദാക്കിയാൽ, അതേ പ്രതിയെ വീണ്ടും അറസ്റ്റ് ചെയ്യാൻ പൊലീസിന് മജിസ്ട്രേറ്റിന്റെ മുൻകൂർ അനുമതി നിർബന്ധമാണെന്നും സുപ്രീം കോടതി വ്യക്തമാക്കി. എല്ലാ സംസ്ഥാന ഡിജിപിമാർക്കുമായാണ് സുപ്രീം കോടതി നിര്‍ദേശം.
ഐഎൻടിയുസി സംസ്ഥാന പ്രസിഡന്റ് ആർ. ചന്ദ്രശേഖരനും മുഖ്യമന്ത്രി വി.ഡി. സതീശനും ഒരേ വേദിയിൽ. തിരുവനന്തപുരത്ത് നടന്ന ഐഎൻടിയുസി സംസ്ഥാന നേതൃ സമ്മേളനത്തിലാണ് ഇരുവരും വേദി പങ്കിട്ടത്. കശുവണ്ടി ഇറക്കുമതി അഴിമതിയിൽ പ്രോസിക്യൂട്ട് ചെയ്യാൻ സർക്കാർ നിർദ്ദേശം നൽകിയതിന് പിന്നാലെ ആർ ചന്ദ്രശേഖരൻ പങ്കെടുത്ത സംസ്ഥാന സമ്മേളനത്തിൽ നിന്നും മുഖ്യമന്ത്രി വിട്ടു നിന്നിരുന്നു. നേതൃ സമ്മേളനത്തിൽ മുഖ്യമന്ത്രിയെ വാനോളം പുകഴ്ത്തിയ ആർ ചന്ദ്രശേഖരൻ അദ്ദേഹം അന്നത്തെ സമ്മേളനത്തിൽ പങ്കെടുക്കാതിരുന്നതിൽ നീരസം പ്രകടിപ്പിച്ചു. നിയമസഭയിലെ ചർച്ചകളിൽ പങ്കെടുക്കേണ്ട തിരക്കുണ്ടായതിനാൽ ആണ് സംസ്ഥാന സമ്മേളനത്തിൽ പങ്കെടുക്കാതിരുന്നതെന്നും അങ്ങോട്ട് ആവശ്യപ്പെട്ടാണ് ഇപ്പോൾ നേതൃ സമ്മേളനത്തിൽ എത്തിയതെന്നും വി ഡി സതീശൻ പറഞ്ഞു.
തിരുവനന്തപുരം ചിറയിൻകീഴ് അർധരാത്രിയിൽ വീടിനു നേരെ ബോംബേറ്. പുതുക്കരി വയലിൽ വീട് വിജയന്റെ ഉടമസ്ഥതയിലുള്ള വീടിനുനേരെയാണ് ആക്രമണം ഉണ്ടായത്. ഹെൽമെറ്റും റെയിൻകോട്ടും ധരിച്ചെത്തിയ രണ്ടുപേർ വീട് ലക്ഷ്യമാക്കി നാല് ബോംബുകൾ എറിയുകയായിരുന്നു. മൂന്നെണ്ണം വൻ ശബ്ദത്തോടെ പൊട്ടിത്തെറിച്ചു. സംഭവസമയത്ത് ഗൃഹനാഥനായ വിജയൻ, ഭാര്യ ഗിരിജ, മക്കൾ, മരുമക്കൾ എന്നിവരടക്കം ഒൻപത് പേർ വീട്ടിനുള്ളിലുണ്ടായിരുന്നു. കുടുംബാംഗങ്ങൾ അത്ഭുതകരമായി പരിക്കേൽക്കാതെ രക്ഷപ്പെട്ടു. പൊട്ടാതെ കിടന്ന ബോംബ് നിർവീര്യമാക്കിയ പൊലീസ് സിസിടിവി ദൃശ്യങ്ങളുടെ അടിസ്ഥാനത്തിൽ അന്വേഷണം ആരംഭിച്ചു.
ഇന്ന് രാത്രികാല വൈദ്യുതി നിയന്ത്രണമെന്ന് കെഎസ്ഇബി. വൈകീട്ട് 6.45 നും രാത്രി 12.45 നുമിടയിൽ നിയന്ത്രണമുണ്ടാകുമെന്ന് മുന്നറിയിപ്പ്. മറ്റ് സംസ്ഥാനങ്ങളിൽ നിന്നും ദീർഘകാല കരാറിൻ്റെ ഭാഗമായി ലഭിക്കേണ്ട 380 മെഗാവാട്ട് ഇന്ന് ലഭിക്കില്ല.മധ്യപ്രദേശിൽ നിന്നുള്ള സ്വാപ്പ് വഴിയുള്ള 200 മെഗാവാട്ടും മുടങ്ങും. പല ജില്ലകളിലും മഴയുണ്ടെങ്കിലും ഉപഭോഗത്തിൽ കാര്യമായ കുറവില്ലെന്നാണ് വിലയിരുത്തൽ. മഴയും പവർ എക്സ്ചേഞ്ചിൽ നിന്നുള്ള വൈദ്യുതി ലഭ്യതയും കാരണം ഇന്നലെ നിയന്ത്രണം വേണ്ടിവന്നില്ല. എന്നാൽ ഇന്ന് സമാനമായ സാഹചര്യമല്ലെന്ന് കെഎസ്ഇബി.
മുഖ്യമന്ത്രിയുടെ മലപ്പുറം യാത്രയിൽ അസ്വാഭാവികത. ചാർട്ടേഡ് ഫ്ലൈറ്റ് യാത്രയ്ക്ക് ഒരു രൂപ പോലും ചെലവായില്ലെന്നാണ് സർക്കാരിൻ്റെ അവകാശവാദം. യാത്രയ്ക്ക് ആരാണ് പണം ചെലവാക്കിയത് എന്നതിലും അവ്യക്തത.
ശബരിമല സന്നിധാനത്ത് അരവണക്ക് പുറമെ മറ്റൊന്നും ലഭിക്കുന്നില്ലെന്ന പരാതിയുമായി ഭക്തർ. പമ്പാ ഗണപതി ക്ഷേത്രത്തിൽ മോദകവും അവൽ പ്രസാദങ്ങളും ഇല്ല. ഇന്നലെ മുതലാണ് ഇവ ലഭിക്കാത്തതെന്ന് തീർഥാടകർ പറഞ്ഞു.
എറണാകുളം വടക്കൻ പറവൂർ ബസ്സിൻ്റെ ഡോറിൽ നിന്ന് തെറിച്ചുവീണ് യുവതിക്ക് ദാരുണാന്ത്യം. കുഞ്ഞിത്തൈ സ്വദേശി വിന്റുമോൾ (31) ആണ് മരിച്ചത്. ഉച്ചയ്ക്ക് രണ്ട് മണിയോടെയായിരുന്നു സംഭവം ജോലി കഴിഞ്ഞ് വീട്ടിലേക്ക് മടങ്ങവേ ആയിരുന്നു അപകടം.
പ്രിയദർശനി പദ്ധതിയുടെ നൂറാം ദിനാഘോഷത്തിൻ്റെ ഭാഗമായി കെഎസ്ആർടിസി ഡിപ്പോയിൽ സാരി വിതരണം നടത്തുമെന്ന പ്രചാരണം അടിസ്ഥാനരഹിതമെന്ന് കെഎസ്ആർടിസി.
സംസ്ഥാനത്തെ അനധികൃത വാഹന പാർക്കിങ്ങ് സംബന്ധിച്ച് നടത്തിയ പരിശോധനയിൽ ഒരു കോടി രൂപ പിഴ ഈടാക്കി ട്രാഫിക് പൊലീസ്. 32,385 വാഹനങ്ങളിൽ നിന്നായി 10843600 രൂപയാണ് പിഴ ഈടാക്കിയത്. സെപ്റ്റംബർ ഒമ്പതാം തീയതി മുതൽ പതിനഞ്ചാം തീയതി വരെയാണ് പ്രത്യേക പരിശോധന നടത്തിയത്.
പ്രളയ ദുരിതാശ്വാസ തുക നൽകാത്തതിന് സർക്കാരിനെ വിമർശിച്ച് പ്രതിപക്ഷ നേതാവ് പിണറായി വിജയൻ. ദുരന്തബാധിതരോട് സർക്കാർ കാണിക്കുന്നത് അവഗണനയും മനുഷ്യത്വരഹിതമായ സമീപനവുമാണ്. പ്രഖ്യാപിച്ച അടിയന്തര ധനസഹായം പോലും ഇതുവരെ നൽകിയിട്ടില്ല. ആലപ്പുഴ കോട്ടയം പത്തനംതിട്ട ജില്ലകളിലാണ് തുക നൽകാത്തത്. ആലപ്പുഴയിൽ 40000 പേർ അപേക്ഷിച്ചപ്പോൾ 83 പേർക്ക് മാത്രമാണ് തുക ലഭിച്ചത്. അവർക്ക് നൽകിയതാകട്ടെ പകുതി തുകയായ 5000 രൂപ മാത്രം. കോട്ടയത്ത് ദുരന്തബാധിതരുടെ വിവരശേഖരണം പോലും പൂർത്തിയായില്ലെന്നും പിണറായി ചൂണ്ടിക്കാട്ടി.
നാദാപുരം കുമ്മങ്കോട് അജ്ഞാത ജീവിയുടെ ആക്രമണത്തിൽ വിദ്യാർഥിക്ക് പരിക്ക്. എരഞ്ഞിക്കൽ മുഹമ്മദ് സിനാൻ (22) ആണ് പരിക്കേറ്റത്. ഉച്ചയ്ക്ക് ഒന്നരയോടെയാണ് സംഭവം. വീട്ടുപറമ്പിൽ കാട് വെട്ടിത്തെളിക്കുമ്പോൾ അജ്ഞാത ജീവി ശരീരത്തിലേക്ക് ചാടുകയായിരുന്നു.ചെവിക്ക് പരിക്കേറ്റ വിദ്യാർഥിയെ നാദാപുരത്തെ ആശുപത്രിയിൽ നിന്ന് വടകരയിലെ സ്വകാര്യ ആശുപത്രിയിലേക്ക് മാറ്റി. ആക്രമിച്ചത് പുലിയാണെന്ന സംശയത്തിലാണ് നാട്ടുകാർ.
വടകര മുക്കാളിയിൽ ദേശീയപാത നിർമാണത്തിനിടെ മണ്ണിടിച്ചിൽ. നേരത്തെയും നിരവധി തവണ ഇവിടെ മണ്ണിടിച്ചിൽ ഉണ്ടായിട്ടുണ്ട്. സംരക്ഷണ ഭിത്തി ഇടിഞ്ഞതിനെ തുടർന്ന് പുതിയ കമ്പനിക്ക് കരാർ നൽകിയിരുന്നു. പുതിയ കമ്പനിയുടെ നേതൃത്വത്തിൽ നിർമാണ പ്രവർത്തനങ്ങൾ പുരോഗമിക്കുന്നതിനിടെയാണ് വീണ്ടും മണ്ണിടിച്ചിലുണ്ടായത്. മണ്ണിടിച്ചിലിനെ തുടർന്ന് സമീപത്തെ വീട് അപകടാവസ്ഥയിലാണ്.
ഇടുക്കി പൂപ്പാറയിൽ അതിഥി തൊഴിലാളികളായ ദമ്പതികളെ മരിച്ച നിലയിൽ കണ്ടെത്തി. മധ്യപ്രദേശ് സ്വദേശികളായ ലഖാൻ സിങ് മാർക്കം ഭാര്യ സുനിയ മാർക്കം എന്നിവരെയാണ് തേയിലത്തോട്ടത്തിലെ കുളത്തിൽ മരിച്ച നിലയിൽ കണ്ടെത്തിയത്. സംഭവത്തിൽ ശാന്തൻപാറ പൊലീസ് കേസെടുത്ത് അന്വേഷണം ആരംഭിച്ചു.
കഴിഞ്ഞ ദിവസം സംസ്ഥാനത്ത് വിവിധയിടങ്ങളിൽ പെയ്ത മഴ മേഘവിസ്ഫോടനം മൂലമുള്ള മഴ അല്ലെന്ന് ഐഎംഡി ഡയറക്ടർ നീത കെ. ഗോപാൽ. ചുരുങ്ങിയ സമയത്തിൽ കൂടുതൽ അളവിൽ മഴ ലഭിച്ചത് ആഘാതം കൂട്ടി. വരും ദിവസങ്ങളിലും അതീവ ജാഗ്രത വേണം. ബംഗാൾ ഉൾക്കടലിൽ രൂപപ്പെട്ട ന്യൂനമർദത്തിൻ്റെ ദിശയ്ക്കും ശക്തിയ്ക്കും അനുസരിച്ച് മുന്നറിയിപ്പ് മാറുമെന്നും നീത കെ. ഗോപാൽ.
അസമിൽ കോണ്‍ഗ്രസ് നേതാക്കള്‍ സഞ്ചരിച്ച വാഹനത്തിനുനേരെ ആക്രമണം. നേതാക്കളായ ഭൂപേഷ് ബാഗല്‍, ഗൗരവ് ഗോഗോയ് എന്നിവരാണ് വാഹനത്തിലുണ്ടായിരുന്നത്. അക്രമികൾ കല്ലും കുപ്പികളും വലിച്ചെറിഞ്ഞിട്ടും പൊലീസ് ഇടപെട്ടില്ലെന്ന് നേതാക്കൾ ആരോപണം ഉന്നയിച്ചു.
കൊയിലാണ്ടിയിൽ മധ്യവയസ്കൻ ട്രയിൻ തട്ടി മരിച്ചു. മരിച്ചയാളെ തിരിച്ചറിയാനായില്ല. 6.30 ഓടെ ചെങ്ങോട്ടുകാവിലാണ് അപകടം നടന്നത്. മൃതദേഹം കൊയിലാണ്ടി താലൂക്ക് ആശുപത്രിയിലേക്ക് മാറ്റി
പാലക്കാട് കൊടുവായൂരിൽ ഭർത്താവ് ഭാര്യയെ കഴുത്ത് ഞെരിച്ചു കൊന്നു. ഉച്ചയ്ക്ക് ഊണ് കഴിക്കാൻ എത്തിയപ്പോൾ മണികണ്ഠനും ഭാര്യയും തമ്മിൽ വാക്കു തർക്കമുണ്ടായി. ഇതിൽ പ്രകോപിതനായാണ് മണികണ്ഠൻ ഭാര്യയെ കൊലപ്പെടുത്തിയത്. നാട്ടുകാർ വിവരം അറിയിച്ചതിനെ തുടർന്ന് പൊലീസുകാരെത്തി പ്രതിയെ കസ്റ്റഡിയിലെടുത്തു.
