കണ്ണൂർ സെൻട്രൽ ജയിലിൽ ഉദ്യോഗസ്ഥർക്ക് തടവുകാരുടെ മർദനം

സംസ്ഥാനത്ത് അങ്കണവാടി ജീവനക്കാരുടെ ശമ്പള വിതരണ പ്രതിസന്ധിയിൽ പരിഹാരം കാണാതെ സർക്കാർ. മാസങ്ങളായി ശമ്പളം മുടങ്ങിയിട്ടും പരിഹാരമില്ലാതായതോടെ പ്രത്യക്ഷ സമരത്തിനിറങ്ങി തൃശൂരിലെ ജീവനക്കാർ. ജില്ലയിൽ മാത്രം 247 ജീവനക്കാരാണ് പ്രതിഷേധിക്കുന്നത്. ശമ്പളമില്ലായ്മയ്ക്ക് പുറമെ അങ്കണവാടിയുടെ ദൈനംദിന പ്രവർത്തനങ്ങൾക്ക് സ്വന്തം കയ്യിൽ നിന്നെടുക്കുന്ന പൈസ പോലും സർക്കാർ നൽകുന്നില്ലെന്നാണ് ജീവനക്കാരുടെ ആക്ഷേപം. വകുപ്പിലെ ഉദ്യോഗസ്ഥരുടെ അനാസ്ഥയാണ് പ്രതിസന്ധി രൂക്ഷമാക്കുന്നതെന്നും അങ്കണവാടി ജീവനക്കാർ ആരോപിച്ചു.

ഇഡി റിപ്പോർട്ടിൽ ഇന്ന് ക്രൈംബ്രാഞ്ച് പ്രത്യേക അന്വേഷണ സംഘത്തെ തീരുമാനിക്കും. മന്ത്രിസഭാ യോഗത്തിനു ശേഷം മാധ്യമങ്ങളെ കാണുമ്പോഴായിരിക്കും മുഖ്യമന്ത്രി വി.ഡി. സതീശൻ അന്വേഷണ തീരുമാനം ഔദ്യോഗികമായി അറിയിക്കുക. ക്രൈംബ്രാഞ്ച് മേധാവി എച്ച്. വെങ്കിടേഷിന്റെ മേൽനോട്ടത്തിൽ പ്രത്യേക സംഘമായിരിക്കും പ്രാഥമിക അന്വേഷണം നടത്തുക. അന്വേഷണത്തിൽ ക്രമക്കേടുകൾ കണ്ടെത്തിയാൽ എഫ്ഐആർ രജിസ്റ്റർ ചെയ്യും. കഴിഞ്ഞ ദിവസത്തെ ചാർട്ടേഡ് വിമാനയാത്ര സംബന്ധിച്ചും മുഖ്യമന്ത്രി ഇന്ന് പ്രതികരിച്ചേക്കും. യാത്ര ചെലവുമായി ബന്ധപ്പെട്ട സർക്കാരിന് പണച്ചെലവ് ഉണ്ടായിട്ടില്ല എന്ന നിലപാടാകും മുഖ്യമന്ത്രി സ്വീകരിക്കുക. മന്ത്രിമാരുടെ വിദേശയാത്ര, മന്ത്രി കെ.എം. ഷാജിയുടെ ആഡംബരക്കാർ ഉപയോഗം എന്നിവയിലും മുഖ്യമന്ത്രിയുടെ പ്രതികരണം ഉണ്ടാകും..

യുഡിഎഫ് സർക്കാരിന്റെ മദ്യനയ ചർച്ചകൾക്ക് ഇന്ന് തുടക്കമാകും. രാവിലെ പതിനൊന്നരയോടെ എക്സൈസ് മന്ത്രി എം. ലിജുവിന്റെ അധ്യക്ഷതയിൽ തൈക്കാട് ഗസ്റ്റ് ഹൗസിലാണ് യോഗം. ആദ്യദിവസം മദ്യനിരോധന സമിതി ഭാരവാഹികൾ, വിവിധ മതമേലധ്യക്ഷൻമാർ, സാമൂഹ്യ പ്രവർത്തകർ എന്നിവരുമായുള്ള ചർച്ചയാണ് നടക്കുക. ആദ്യമായാണ് മദ്യനയത്തിന്റെ ഭാഗമായി മദ്യ വിരുദ്ധ സമിതികളുമായി സർക്കാർ ചർച്ച നടത്തുന്നത്. നാളത്തെ ചർച്ചയ്ക്കു ശേഷം 25ന് ബാർ ജീവനക്കാരുമായും മന്ത്രിയുടെ അധ്യക്ഷതയിൽ ചർച്ച നടക്കും. 28നാണ് മുൻ എക്സൈസ് മന്ത്രിമാരുമായുള്ള ചർച്ച. അടുത്തമാസം ആദ്യ വാരത്തോടെ മദ്യനയത്തിൽ ചർച്ചകൾ പൂർത്തിയാക്കും. അതിനു ശേഷം യുഡിഎഫിൽ ചർച്ച ചെയ്ത് മദ്യനയം അന്തിമമാക്കും. ബാറുകളുടെ പ്രവർത്തന സമയം കുറയ്ക്കുക, വീര്യം കുറഞ്ഞ മദ്യത്തിലെ വില്‍പ്പന, ബാർ ലൈസൻസ് കൊടുക്കേണ്ട ഹോട്ടലുകളുടെ ശ്രേണി നിശ്ചയിക്കൽ, ബോധവൽക്കരണം, മദ്യ ഉപഭോഗം ഒഴിവാക്കിയവരുടെ പുനരധിവാസം തുടങ്ങിയ കാര്യങ്ങൾക്ക് മുൻഗണന നൽകിയാവും മദ്യ നയം രൂപീകരിക്കുക.

സിപിഐഎമ്മിന്റെ വഖഫ് സെമിനാറിൽ പങ്കെടുത്തതിന്റെ പേരിൽ സമസ്ത മുശാവറ അംഗം ഉമർഫൈസി മുക്കത്തിനെതിരെ അമർഷം പുകയുന്നതിനിടെ നിർണായക മുശാവറ യോഗം ഇന്ന്. വഖഫ് ബോർഡ് പുന:സംഘടനയുമായി ബന്ധപ്പെട്ട് യുഡിഎഫ് സർക്കാരിനെ വിമർശിച്ചതിന് ഉമർ ഫൈസി മുക്കത്തിനെതിരെ ഇന്നത്തെ മുശാവറയിൽ നടപടി വേണമെന്നാണ് ലീഗ് പക്ഷത്തിന്റെ നിലപാട്. ഉമർ ഫൈസിക്കെതിരെ മലപ്പുറത്ത് നടത്താനിരുന്ന ബദൽ സെമിനാർ, പ്രശ്നം ചർച്ച ചെയ്യാമെന്ന നേതൃത്വത്തിന്റെ ഉറപ്പിനെ തുടർന്നായിരുന്നു സംഘാടകർ പിൻവലിച്ചത്. അതുകൊണ്ടു തന്നെ ഇന്നത്തെ യോഗത്തിൽ നടപടി ഉണ്ടായില്ലെങ്കിൽ പിൻവലിച്ച ബദൽ സെമിനാർ വീണ്ടും നടത്തുമെന്നും ലീഗ് പക്ഷം പറയുന്നു. ഇന്നത്തെ യോഗത്തിൽ പുതിയ സമസ്ത ജനറൽ സെക്രട്ടറിയെ സംബന്ധിച്ചും ചർച്ച ചെയ്തേക്കും.

മുഖ്യമന്ത്രി വി.ഡി. സതീശനെതിരായ വ്യാജ വിവാഹ ആരോപണത്തിൽ റിപ്പോർട്ടർ ചാനൽ മേധാവി ആന്റോ അഗസ്റ്റിന്റെ മുൻകൂർ ജാമ്യാപേക്ഷ ഇന്ന് കോടതി പരിഗണിക്കും. തിരുവനന്തപുരം പ്രിന്‍സിപ്പല്‍ ജില്ലാ സെഷന്‍സ് കോടതിയാണ് ഹര്‍ജി പരിഗണിക്കുക. തിരുവനന്തപുരം സൈബർ പൊലീസ് രജിസ്റ്റർ ചെയ്ത കേസ് പിന്നീട് കളമശ്ശേരി പൊലീസിന് കൈമാറിയിരുന്നു. അതിനാൽ ഇന്ന് കേസ് പരിഗണിക്കുന്ന കോടതി ജാമ്യാപേക്ഷയും എറണാകുളത്തേക്ക് മാറ്റും. മുഖ്യമന്ത്രിക്കെതിരായ വ്യാജ ആരോപണത്തിനെതിരെ കോൺഗ്രസ് വക്താവ് രാജു പി. നായരാണ് പരാതി നൽകിയത്... ഡിജിപിക്ക് നൽകിയ പരാതിയിലാണ് പൊലീസ് എഫ്ഐആർ രജിസ്റ്റർ ചെയ്തത്.

സംസ്ഥാനത്ത് ഇന്ന് ഒറ്റപ്പെട്ട ഇടങ്ങളിൽ ഇടിമിന്നലോടു കൂടിയ ശക്തമായ മഴയ്ക്ക് സാധ്യത. ഏഴ് ജില്ലകളിൽ കേന്ദ്ര കാലാവസ്ഥാ വകുപ്പ് യെല്ലോ അലേർട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, കണ്ണൂർ, കാസർഗോഡ് ജില്ലകളിലാണ് മഴ മുന്നറിയിപ്പ്. നാളെ അഞ്ചു ജില്ലകളിലും മറ്റന്നാൾ എട്ടു ജില്ലകളിലും മഴ മുന്നറിയിപ്പുണ്ട്. ബംഗാൾ ഉൾക്കടലിൽ രൂപപ്പെട്ട തീവ്ര ന്യൂനമർദത്തിന്റെ സ്വാധീനഫലമായാണ് മഴ തുടരുന്നത്. ഈ ന്യൂനമർദം അടുത്ത 24 മണിക്കൂറിനിടയിൽ അതിതീവ്ര ന്യൂനമർദമായി ശക്തി പ്രാപിക്കാൻ സാധ്യതയുണ്ട്. അതിനാൽ മലയോര മേഖലകളിൽ അടക്കം മഴ കനക്കുന്ന സാഹചര്യത്തിൽ ജാഗ്രത പാലിക്കണമെന്നാണ് ദുരന്ത നിവാരണ അതോറിറ്റിയുടെ നിർദേശം. മഴയ്ക്കൊപ്പം മണിക്കൂറിൽ 40 കിലോമീറ്റർ വേഗതയിൽ കാറ്റ് വീശാനും സാധ്യതയുണ്ട്. അതേസമയം കേരളം, കർണാടക, ലക്ഷദ്വീപ് തീരങ്ങളിൽ മത്സ്യബന്ധനത്തിനേർപ്പെടുത്തിയ വിലക്ക് തുടരുകയാണ്.

രാജ്യത്തെ 19 സംസ്ഥാനങ്ങളിൽ ഇന്ന് കനത്ത മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിൻ്റെ മുന്നറിയിപ്പ്. ഒഡീഷ, ആന്ധ്രാപ്രദേശ്, തെലങ്കാന, ഛത്തീസ്‌ഗഢ് എന്നിവിടങ്ങളിൽ ഒറ്റപ്പെട്ടയിടങ്ങളിൽ കനത്തതോ അതിശക്തമായതോ ആയ മഴ ലഭിച്ചേക്കും. ഒഡീഷയിലും ആന്ധ്രാപ്രദേശിന്റെ തീരപ്രദേശങ്ങളിലും മണിക്കൂറിൽ 50 മുതൽ 60 കിലോമീറ്റർ വരെ വേഗതയിൽ ശക്തമായ കാറ്റ് വീശാനും സാധ്യതയുണ്ട്. ബംഗാൾ ഉൾക്കടലിലും ശക്തമായ കാറ്റിന് സാധ്യതയുള്ളതിനാൽ മത്സ്യത്തൊഴിലാളികൾക്ക് ജാഗ്രതാ നിർദേശം നൽകി.

ആഡംബര കാർ വിവാദത്തിൽ മന്ത്രി കെ.എം. ഷാജിയുടെ വാദം പൊളിച്ച് സർക്കാർ രേഖ. സ്വകാര്യ വാഹനം ഉപയോഗിക്കാന്‍ സര്‍ക്കാര്‍ അനുമതി ഉണ്ടെന്നായിരുന്നു ഷാജിയുടെ വിശദീകരണം. എന്നാല്‍, മന്ത്രിമാരിൽ സ്വകാര്യവാഹനം ഉപയോഗിക്കാൻ മൂന്ന് പേർക്ക് മാത്രമാണ് പൊതുഭരണ വകുപ്പ് അനുമതിയുള്ളത്. രമേശ് ചെന്നിത്തല, പി.കെ. കുഞ്ഞാലിക്കുട്ടി, വി.ഇ. അബ്ദുൾ ഗഫൂര്‍ എന്നിവര്‍ക്കാണ് അനുമതി നൽകിയിട്ടുള്ളത്. അതേസമയം, സ്വകാര്യ ചടങ്ങില്‍ പങ്കെടക്കാന്‍ കണ്ണൂരില്‍നിന്ന് കുര്‍ഗിലേക്കുള്ള യാത്രയ്ക്ക് മാത്രമാണ് ഷാജിക്ക് സ്വകാര്യ കാര്‍ ഉപയോഗിക്കാന്‍ അനുമതി നല്‍കിയിട്ടുള്ളത്. അതിന്റെ ഭാഗമായി കര്‍ണാടക സര്‍ക്കാരിന്റെ പ്രോട്ടോക്കോള്‍ വിഭാഗത്തിന് കൈമാറിയ കത്തില്‍ റേഞ്ച് റോവറിന്റെ നമ്പര്‍ ഉള്‍പ്പെടുത്തിയിട്ടുമുണ്ട്.

തൃണമൂൽ കോൺഗ്രസിന്റെ പേരും ചിഹ്നവും മരവിപ്പിക്കാനുള്ള തിരഞ്ഞെടുപ്പ് കമ്മീഷന്റെ തീരുമാനത്തെ ചോദ്യം ചെയ്ത് സമർപ്പിച്ച ഹർജി സുപ്രിം കോടതി ഇന്ന് പരിഗണിക്കും. പാർട്ടിയിലെ രണ്ടു വിഭാഗങ്ങൾ തമ്മിലുള്ള തർക്കത്തിനിടെയാണ് സുപ്രീം കോടതി ഹർജി പരിഗണിക്കുന്നത്. നടപടികൾ പുരോഗമിക്കുന്നതിനിടെ പാർട്ടിയുടെ ഐഡന്റിറ്റി മരവിപ്പിക്കാനുള്ള കമ്മീഷന്റെ തീരുമാനം റദ്ദാക്കണം എന്നാണാവശ്യം. ഒക്ടോബർ ആറിന് നടക്കാനിരിക്കുന്ന നിയമസഭാ ഉപതെരഞ്ഞെടുപ്പിനായി കമ്മീഷൻ ഇരു വിഭാഗങ്ങൾക്കും ബദൽ പേരുകളും ചിഹ്നങ്ങളും അനുവദിച്ചിരുന്നു. മമത നയിക്കുന്ന വിഭാഗത്തിന് 'മമത ഓൾ ഇന്ത്യ തൃണമൂൽ കോൺഗ്രസ്' എന്ന പേരും 'ഫുട്ബോൾ പ്ലെയർ' ചിഹ്നവുമാണ് അനുവദിച്ചത്. അതേസമയം ഋതബ്രത്ര ബാനർജി നയിക്കുന്ന എതിർ വിഭാഗത്തിന് 'ഡെമോക്രാറ്റിക് തൃണമൂൽ കോൺഗ്രസ്' ഉം 'എന്‍വലപ്പ്' ചിഹ്നവുമാണ് നൽകിയത്.

സംസ്ഥാനത്ത് കടുത്ത വൈദ്യുതി പ്രതിസന്ധി തുടരുന്ന സാഹചര്യത്തിൽ മുഖ്യമന്ത്രിക്ക് കൈമാറാനുള്ള പരിഹാര നിർദേശങ്ങൾ തയ്യാറാക്കി കെഎസ്ഇബി. കെഎസ്ഇബി ചെയർമാൻ എം.ജി. രാജമാണിക്യം തയ്യാറാക്കിയ റിപ്പോർട്ട് മന്ത്രി സണ്ണി ജോസഫ് ആണ് മുഖ്യമന്ത്രിക്ക് സമർപ്പിക്കുക. ആണവനിലയ സാധ്യതയും പുതിയ ജലവൈദ്യുത പദ്ധതികളുടെ വിവരങ്ങളും റിപ്പോർട്ടിൽ ഉൾപ്പെട്ടിട്ടുണ്ട്. നിലവിലെ പ്രതിസന്ധി പരിഹരിക്കുന്നതിനു പുറമേ അടുത്ത 10 വർഷത്തേക്കുള്ള വൈദ്യുതി ലഭ്യതയും സ്വയം പര്യാപ്തതയ്ക്കായി സോളാർ വഴിയുള്ള പദ്ധതികൾക്കും റിപ്പോർട്ടിൽ ഇടം പിടിച്ചിട്ടുണ്ടെന്നാണ് സൂചന. കടുത്ത വൈദ്യുതി പ്രതിസന്ധി മറികടക്കാനുള്ള നടപടികൾ വേഗത്തിലാക്കുകയാണ് പഠന റിപ്പോർട്ടിന്റെ ലക്ഷ്യം. കടുത്ത ഊർജ പ്രതിസന്ധിയിൽ ഇന്നലെയും രാത്രികാല വൈദ്യുതി നിയന്ത്രണമുണ്ടായി. വൈകീട്ട് 6.45നും രാത്രി 10 മണിക്കും ഇടയിലായിരുന്നു നിയന്ത്രണം.

യുഎസ് പ്രസിഡന്റ് ഡൊണാള്‍ഡ് ട്രംപും യുക്രെയ്ന്‍ പ്രസിഡന്റ് വൊളോഡിമര്‍ സെലന്‍സ്കിയും കൂടിക്കാഴ്ച നടത്തി. റഷ്യ–യുക്രെയ്ന്‍ യുദ്ധം അവസാനിപ്പിക്കുന്നതുമായി ബന്ധപ്പെട്ട് ഇരു നേതാക്കളും ചർച്ച ചെയ്തതായാണ് വിവരം. യുഎന്‍ പൊതുസഭയില്‍ പങ്കെടുക്കാനെത്തിയ നേതാക്കളുടെ കൂടിക്കാഴ്ചയില്‍ യുദ്ധം അവസാനിപ്പിക്കാനുള്ള നയതന്ത്ര നീക്കങ്ങളും സംഘർഷം കുറയ്ക്കാനുള്ള നടപടികളും ചർച്ചയായി. ശീതകാലത്തിനു മുമ്പ് യുദ്ധം അവസാനിപ്പിക്കണമെന്ന നിലപാടിലാണ് യുഎസും യുക്രെയ്നുമെന്ന് സെലൻസ്കി പറഞ്ഞു. യുക്രെയ്നിൽ പേട്രിയറ്റ് മിസൈൽ പ്രതിരോധ സംവിധാനങ്ങളുടെ ഉൽപ്പാദനം ആരംഭിക്കുന്നതും ശീതകാലത്തേക്കുള്ള വ്യോമപ്രതിരോധ സഹായവും കൂടിക്കാഴ്ചയിൽ ചർച്ചയായി. റഷ്യ, സമാധാന ചർച്ചകൾ നിരസിച്ചാൽ യുക്രെയ്നിലെ ജനങ്ങളെ സംരക്ഷിക്കാൻ കൂടുതൽ വ്യോമപ്രതിരോധ സംവിധാനങ്ങൾ ആവശ്യമാണെന്നും സെലെൻസ്കി വ്യക്തമാക്കി.

ഇഡി കത്തില്‍ പിണറായി വിജയനെതിരെ കേസെടുക്കാനുള്ളത് സുപ്രീം കോടതി വിധിയും നിയമ പരിശോധനയും നടത്തിയുള്ള തീരുമാനമെന്ന് മുഖ്യമന്ത്രി വി.ഡി. സതീശന്‍. ആരെയും വേട്ടയാടാനോ, പ്രതികാര ബുദ്ധിയോടെ പെരുമാറാനോ ഉള്ള തീരുമാനമല്ല. ഇഡി നല്‍കുന്ന കത്തില്‍ പൊലീസ് അന്വേഷണം നടത്തിയേ മതിയാകൂ എന്ന് സുപ്രീം കോടതി വിധിയുണ്ട്. അന്വേഷണം നടത്താനുള്ള സര്‍ക്കാര്‍ തീരുമാനം നിയമപരമായ ബാധ്യതയാണെന്നും മുഖ്യമന്ത്രി വാര്‍ത്താസമ്മേളനത്തില്‍ വ്യക്തമാക്കി.

മുഖ്യമന്ത്രി വി.ഡി. സതീശന്‍ പൂര്‍ണമായും ബിജെപി വക്താവായി മാറിയിരിക്കുന്നുവെന്ന് സിപിഐഎം സംസ്ഥാന സെക്രട്ടേറിയറ്റ് അംഗം പി. രാജീവ്. അക്കാര്യം തെളിയിക്കുന്നതായിരുന്നു മുഖ്യമന്ത്രിയുടെ ഇന്നത്തെ വാര്‍ത്താസമ്മേളനം. ഏത് പ്രതിപക്ഷ സംസ്ഥാനമാണ് ഇഡി റിപ്പോര്‍ട്ടിന് അനുകൂലമായി പ്രവര്‍ത്തിച്ചിട്ടുള്ളത്. പഞ്ചാബ്, തമിഴ്‌നാട്, പശ്ചിമ ബംഗാൾ സർക്കാരുകൾ ഇഡി റിപ്പോർട്ടുകളെ തള്ളുന്ന നിലപാട് ആണ് സ്വീകരിച്ചത്. കേരളത്തിലെ യുഡിഎഫ് സര്‍ക്കാര്‍ ബിജെപിക്ക് അരങ്ങ് ഒരുക്കുന്നു. വഖഫ് വിഷയത്തിലും ഇത് കണ്ടു. ഈ ഡീൽ കേരളം തിരിച്ചറിഞ്ഞു എന്ന് മുഖ്യമന്ത്രി മനസ്സിലാക്കണം. ബിജെപിക്കു വേണ്ടി വഴിവെട്ടുന്ന ആളായി മുഖ്യമന്ത്രി മാറിയിരിക്കുന്നു. ബിജെപിയുടെ മാസ്റ്റർ പ്ലാനിന്റെ നടത്തിപ്പുകാരനായി മുഖ്യമന്ത്രി മാറി. ഇൻഡ്യാ സഖ്യം ഇഡിക്കെതിരെ ഒരുമിച്ചു നിന്നതാണെന്നും പി. രാജീവ് പറഞ്ഞു. അഴിമതിയുടെയും ധൂർത്തിന്റെയും പര്യായമായി സർക്കാർ മാറിയിരിക്കുന്നു. വിമാന യാത്ര ആര് സ്പോണ്‍സര്‍ ചെയ്തുവെന്ന് മുഖ്യമന്ത്രിക്ക് പറയാമല്ലോ. മന്ത്രിയുടെ വാഹനം കേടായാൽ പൊലീസ് വാഹനമോ ടൂറിസം വകുപ്പിന്റെ വാഹനമോ വരും. അതാണ് രീതി. ഇപ്പോള്‍ സംഭവിച്ചുകൊണ്ടിരിക്കുന്നതെല്ലാം അഴിമതി നിയമത്തിന്റെ പരിധിയിൽ വരുന്നതാണ്. മുഖ്യമന്ത്രി, പ്രതിപക്ഷ നേതാവായിരിക്കുമ്പോൾ നടത്തിയ ഗീർവാണ പ്രസംഗങ്ങൾ കേൾക്കണം. മുൻ മുഖ്യമന്ത്രി സ്വകാര്യ വിമാനത്തിൽ യാത്ര ചെയ്തിരുന്നെങ്കിൽ അന്നത്തെ പ്രതിപക്ഷ നേതാവ് വെറുതെ ഇരിക്കുമായിരുന്നോയെന്നും രാജീവ് ചോദിച്ചു. മുഖ്യമന്ത്രി മാധ്യമങ്ങളോട് സംസാരിച്ചത് ധിക്കാരത്തോടെയാണ്. ഭരണഘടനയും സത്യപ്രതിജ്ഞയും ലംഘിച്ചു പ്രവർത്തിക്കും എന്നാണ് മുഖ്യമന്ത്രി പറയുന്നതെന്നും പി. രാജീവ് വിമര്‍ശിച്ചു.

കർണാടകയിലെ കോൺഗ്രസ് എംഎൽഎ രാജിവച്ചു. ഇന്ദി എംഎൽഎ യശ്വന്തരായഗൗഡ പാട്ടീലാണ് രാജിവച്ചത്. താലൂക്കിനെ വരൾച്ച ബാധിത പ്രദേശമായി പ്രഖ്യാപിക്കാത്തത്തിൽ പ്രതിഷേധിച്ചാണ് രാജി.

ആലപ്പുഴയിൽ സിപിഐഎം പിന്തുണയിൽ കോൺഗ്രസിന് ഭരണം. ആലപ്പുഴ ചേന്നംപള്ളിപ്പുറം പഞ്ചായത്ത് പ്രസിഡൻ്റായി കോൺഗ്രസിലെ എസ്. ജ്യോതിശ്രീ തെരഞ്ഞെടുക്കപ്പെട്ടു. രണ്ട് സിപിഐഎം അംഗങ്ങുടെ പിന്തുണയോടെയാണ് ജ്യോതിശ്രീ ജയിച്ചത്. പ്രസിഡൻ്റ് തെരഞ്ഞെടുപ്പിൽ ജ്യോതിശ്രീക്ക് ഒൻപത് വോട്ടുകൾ ലഭിച്ചു. മൂന്ന് വോട്ടുകൾ അസാധുവായി. 19 അംഗ പഞ്ചായത്തിൽ കോൺഗ്രസിനും ബിജെപിക്കും ഏഴ് അംഗങ്ങൾ വീതവും സിപിഐഎമ്മിന് അഞ്ച് അംഗങ്ങളുമുണ്ട്.

വടകര എംഡിഎംഎ കേസിൽ മുൻ അധ്യാപിക കാവ്യയ്ക്ക് ജാമ്യം. ജാമ്യം നൽകിയത് ഹൈക്കോടതി. കേസിൽ മൂന്നാം പ്രതിയാണ് കാവ്യ. കേസിലെ ഒന്നും രണ്ടും പ്രതികൾക്ക് നേരത്തെ ജാമ്യം ലഭിച്ചിരുന്നു.

അയോധ്യ രാമക്ഷേത്ര സംഭാവന ക്കൊള്ള കേസിൽ പ്രത്യേക അന്വേഷണ സംഘം കുറ്റപത്രം സമർപ്പിച്ചു. 7000 പേജ് ഉള്ള കുറ്റപത്രം ആണ് കോടതിയിൽ സമർപ്പിച്ചത്. കുറ്റപത്രത്തിൽ ചമ്പത് റായിയുടെയും അനിൽ മിശ്രയുടെയും പേരുകൾ പരാമർശിക്കുന്നില്ല.

ക്ഷേമപെന്‍ഷന്‍ വിതരണം നാളെ മുതല്‍ ആരംഭിക്കും.ഇതിനായി1068 കോടി അനുവദിച്ചു. സെപ്തംബര്‍ മാസത്തെ ക്ഷേമപെന്‍ഷനാണ് വിതരണം ചെയ്യുക. ക്ഷേമ പെന്‍ഷന്‍ വിതരണത്തിനായി 957.93 കോടി രൂപയും, വിവിധ ക്ഷേമനിധി ബോര്‍ഡുകള്‍ വഴിയുള്ള പെന്‍ഷന്‍ വിതരണത്തിനായി 110.86 കോടി രൂപയുമാണ് അനുവദിച്ചത്.

വൈദ്യുതി വാങ്ങാൻ കെഎസ്ഇബിക്ക് അനുമതി നൽകി സർക്കാർ. 200 മെഗാവാട്ട് വൈദ്യുതിയാണ് ലഭിക്കുക. 11 രൂപ നിരക്കിൽ നാളെ മുതൽ ഒക്ടോബർ 31 വരെ വൈദ്യുതി വാങ്ങാം. വൈകിട്ട് ആറു മുതൽ 12 മണി വരെയുള്ള സമയങ്ങളിൽ വൈദ്യുതി ലഭ്യമാക്കുകയാണ് ലക്ഷ്യം. വൈദ്യുതി വാങ്ങുന്നത് വിഇഎച്ച് ഗ്ലോബൽ ഇന്ത്യ പ്രൈവറ്റ് ലിമിറ്റഡിൽ നിന്നുമാണ്. വൈദ്യുതി പ്രതിസന്ധി തുടരുന്ന സാഹചര്യത്തിലാണ് സർക്കാരിൻ്റെ ഇടപെടൽ.

സാംസ്കാരിക-നാടക പ്രവർത്തകനും സംഗീത നാടക അക്കാദമി മുൻ ചെയർമാനുമായ സൂര്യ കൃഷ്ണമൂർത്തി അന്തരിച്ചു. 78 വയസായിരുന്നു. കേന്ദ്ര സംഗീത നാടക അക്കാദമി പുരസ്‌കാരം, കേരള സംഗീത നാടക അക്കാദമി ഫെല്ലോഷിപ്പ് ഉൾപ്പെടെ നിരവധി പുരസ്കാരങ്ങൾ ലഭിച്ചിട്ടുണ്ട്.

സാംസ്കാരിക രംഗത്ത് കേരളം ആകെ നിറഞ്ഞുനിന്നു പ്രവർത്തിച്ച സൂര്യ കൃഷ്ണമൂർത്തിയുടെ നിര്യാണത്തിൽ സിപിഐഎം അനുശോചനം രേഖപ്പെടുത്തി. സാംസ്കാരിക രംഗത്താകെ നിറഞ്ഞുനിന്ന വ്യക്തിത്വമാണ് സൂര്യ കൃഷ്ണമൂർത്തിയെന്ന് സിപിഐഎം നേതാവ് എം.വി.ഗോവിന്ദൻ പറഞ്ഞു. പ്രഗൽഭരായ കലാകാരൻ്റെ വിയോഗത്തിൽ കുടുംബത്തെ അനുശോചനം അറിയിക്കുന്നുവെന്നും അദ്ദേഹം പറഞ്ഞു.

സംഗീത നാടക അക്കാദമി മുൻ ചെയർമാൻ സൂര്യ കൃഷ്ണമൂർത്തിയ്ക്ക് ആദരാഞ്ജലി. മൃതദേഹം നാളെ രാവിലെ സ്വവസതിയിൽ പൊതുദർശനത്തിന് വയ്ക്കും. സംസ്കാരം നാളെ വൈകിട്ട് 5 മണിക്ക് ശാന്തികവാടത്തിൽ നടക്കും.

സൂര്യ കൃഷ്ണമൂർത്തിയുടെ വിയോഗം കലാലോകത്തിന് തീരാനഷ്ടമാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ അനുശോചിച്ചു. കേരളത്തിൻ്റെ സാംസ്‌കാരിക മേഖലയെ പ്രോജ്വലമാക്കിയ അപൂർവ വ്യക്തിത്വമായിരുന്നു സൂര്യ കൃഷ്ണമൂർത്തി.

ഒമാൻ തീരത്ത് 'എം.വി. കേപ് ദാവോ' എന്ന കപ്പലിന് നേരെ നടന്ന ടോർപിഡോ ആക്രമണത്തിൽ ഒരു ഇന്ത്യൻ നാവികൻ കൊല്ലപ്പെട്ടു. ഇന്ത്യയിലേക്ക് വരികയായിരുന്ന കപ്പലിന് നേരെയാണ് ആക്രമണം ഉണ്ടായത്. ഉത്തർപ്രദേശ് ദേവരിയ സ്വദേശിയായ വൈപ്പർ സൂരജ് യാദവാണ് കൊല്ലപ്പെട്ടത്. രണ്ട് പേർക്ക് പരിക്കേറ്റു.