'ചോദ്യങ്ങള്‍ വേണ്ട, ഫോട്ടോയും എടുക്കേണ്ട...'; മുഖ്യമന്ത്രിയുടെ പരിപാടിയില്‍ മാധ്യമപ്രവര്‍ത്തകരെ തടഞ്ഞ് പൊലീസ്

ഏഷ്യൻ ഗെയിംസിൽ മലയാളി താരം വിദർശയ്ക്ക് വെള്ളി മെഡൽ. 50 മീറ്റർ റൈഫിൾ ത്രീ വിഭാഗത്തിലാണ് വെള്ളി മെഡൽ കരസ്ഥമാക്കിയത്.

സിപിഐഎം വിപുലീകൃത ജില്ലാ കമ്മിറ്റികൾക്ക് ഇന്ന് തുടക്കം. ആദ്യ യോഗം ആലപ്പുഴയിൽ ചേരും. സംസ്ഥാന സെക്രട്ടേറിയറ്റിന് സമാനമായി ജില്ലാ നേതൃത്വത്തിലും അഴിച്ചുപണിക്ക് സാധ്യത. തിരുവനന്തപുരത്തും കണ്ണൂരും ജില്ലാ സെക്രട്ടറിമാർക്ക് മാറ്റത്തിന് സാധ്യത.

മെസി വിവാദം റിപ്പോർട്ടർ ടിവി എംഡി ആൻ്റോ അഗസ്റ്റിൻ നൽകിയ മുൻകൂർ ജാമ്യാപേക്ഷയിൽ വിധി ഇന്ന്. എറണാകുളം പ്രിൻസിപ്പൽ സെഷൻസ് കോടതിയാണ് കേസ് പരിഗണിക്കുന്നത്. പിടിച്ചെടുത്ത 6300 ഡോളർ തിരികെ നൽകണമെന്ന ആൻ്റോയുടെ ആവശ്യവും കോടതി പരിഗണിക്കും.

സംസ്ഥാനത്തെ ബാറുകളുടെ പ്രവൃത്തിസമയം കുറയ്ക്കണം എന്ന് തൊഴിലാളി സംഘടനകൾ. രാവിലെ പത്ത് മുതൽ രാത്രി പത്ത് വരെയായി സമയം പുനഃക്രമീകരിക്കണം. തിരുവോണ ദിനത്തിലും സ്വാതന്ത്ര്യദിനത്തിലും അവധി വേണം. നിലപാട് വ്യക്തമാക്കിയത് എക്സൈസ് മന്ത്രി പങ്കെടുത്ത മദ്യനയ രൂപീകരണ ചർച്ചയിൽ.

ഇടുക്കി കുട്ടിക്കാനത്ത് കാർ ആറ്റിലേക്ക് മറിഞ്ഞ് ഒരു മരണം. അടൂർ സ്വദേശി അഭിഷേകാണ് മരിച്ചത്. മൂന്ന് പേർക്ക് പരിക്കേറ്റു. അപകടത്തിൽപ്പെട്ടത് കട്ടപ്പന ഭാഗത്തേക്ക് പോയ കാർ.

തിരുവോണം ബംപർ ഭാഗ്യക്കുറി നറുക്കെടുപ്പ് ഇന്ന് ഉച്ചക്ക്. ഒന്നാം സമ്മാനം മുപ്പത് കോടിയാണ്. ഇത്തവണ നറുക്കെടുപ്പ് അച്ചടിച്ച 90 ലക്ഷം ടിക്കറ്റുകളും വിറ്റഴിച്ചെന്ന സർക്കാർ അറിയിച്ചു. ഏറ്റവും അധികം ടിക്കറ്റുകൾ വിറ്റത് പാലക്കാട് ജില്ലയിലാണ്.

ഏഴ് ദിവസത്തിനകം യുദ്ധം അവസാനിപ്പിക്കാൻ തയ്യാറെന്ന് ഇറാൻ. ഹോർമുസ് തുറക്കുന്നതിനും തയ്യാറാണെന്ന് ഇറാൻ അറിയിച്ചു. യുദ്ധം നിർത്തുന്നതിന് ഖത്തർ മുഖേന മുന്നോട്ട് വെച്ച നിബന്ധനകൾ പാലിക്കണം. ഇറാൻ്റെ ഉപാധികൾ തള്ളി ഡൊണാൾഡ് ട്രംപ് രംഗത്തെത്തി. ട്രൂത്ത് സോഷ്യലിൽ ഹോർമുസ് കടലിടുക്കിനെ ട്രംപ് കടലിടുക്ക് എന്ന് ചിത്രീകരിച്ചും പ്രകോപനം.

നേഷൻസ് ലീഗിൽ ഫ്രാൻസിന് ജയത്തുടക്കം.സിദാൻ പരിശീലകനായെത്തിയ ആദ്യ മത്സരത്തിൽ തുർക്കിക്കെതിരെ ഒരു ഗോൾ ജയം. വിജയഗോൾ നേടിയത് കിലിയൻ എംബപ്പെ. ഇറ്റലിക്കെതിരെ രണ്ട് ഗോൾ ജയവുമായി ബെൽജിയം.

ഇന്ത്യ- വിൻഡീസ് ഏകദിന മത്സരത്തിനൊരുങ്ങി തലസ്ഥാനം. ഏകദിന പരമ്പരയിലെ ആദ്യ മത്സരം നാളെ കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടക്കും. അവസാനവട്ട പരിശീലനത്തിന് ടീമുകൾ ഇന്നിറങ്ങും.

മഞ്ഞുമ്മൽ ശ്രീ സുബ്രഹ്മണ്യ സ്വാമി ക്ഷേത്രത്തിൽ മോഷണം. 40 തൂക്കുവിളക്കുകളും 8 കലശക്കുടങ്ങളും കവർന്നു. ശ്രീ കുമാര വിലാസം സഭയുടെ കീഴിലുള്ള ക്ഷേത്രമാണിത്. ഇന്നലെ അർധരാത്രിയോടെയാണ് മോഷണം നടന്നതെന്നാണ് പ്രാഥമിക വിവരം. ഇന്ന് പുലർച്ചെ ക്ഷേത്രത്തിലെത്തിയ ജീവനക്കാരാണ് മോഷണം നടന്നതായി കണ്ടെത്തിയത്. തുടർന്ന് ക്ഷേത്ര ഭാരവാഹികൾ പൊലീസിൽ വിവരം അറിയിക്കുകയായിരുന്നു. കളമശേരി മേഖലയിലെ നിരവധി അമ്പലങ്ങളിൽ അടുത്തിടെ മോഷണം നടന്നിരുന്നു.

കിളിമാനൂർ കുറവൻ കുഴിയിൽ വാഹനാപകടം. മൂന്നുപേർക്ക് ഗുരുതര പരിക്ക്. അപകടം ടൂറിസ്റ്റ് ബസും എതിരെ വന്ന ഓട്ടോറിക്ഷയും കൂട്ടിയിടിച്ച്. ഓട്ടോറിക്ഷയിൽ ഉണ്ടായിരുന്ന ഡ്രൈവർ ഉൾപ്പെടെ മൂന്ന് പേർക്കാണ് പരിക്കേറ്റത്. ഇവരെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

വടകര എംഡിഎംഎ കേസിലെ പ്രതിയായ അധ്യാപിക കീർത്തനയ്ക്ക് കുത്തേറ്റു. ഭർത്താവ് വിനീഷാണ് കീർത്തനയെ കുത്തിയത്. അന്വേഷണ ഉദ്യോഗസ്ഥന് മുൻപാകെ ഒപ്പിടാൻ എത്തിയ സമയത്താണ് ആക്രമണം ഉണ്ടായത്. കീർത്തനയെ വടകര ജില്ലാ ആശുപത്രിയിൽ പ്രവേശിപ്പിച്ചു. ഭർത്താവ് പൊലീസ് കസ്റ്റഡിയിൽ. എംഡിഎംഎ കേസിൽ കീർത്തനയ്ക്ക് കോടതി ജാമ്യം അനുവദിച്ചിരുന്നു.

മുഖ്യമന്ത്രിയോട് ചോദ്യങ്ങൾ വേണ്ടെന്ന് പോലീസ്. മാറിനിൽക്കാൻ അസിസ്റ്റൻ്റ് കമ്മീഷണറുടെ നിർദ്ദേശം. ഗോകുലം പാർക്കിലാണ് മുഖ്യമന്ത്രിയുടെ പരിപാടി.

സിഎംആർഎൽ- എക്സാലോജിക് കേസിലൂടെ വീണയെ അല്ല, തന്നെയാണ് ഇഡി ലക്ഷ്യമിടുന്നതെന്ന് പ്രതിപക്ഷ നേതാവ് പിണറായി വിജയൻ. സിഎംആർഎല്ലിന് എക്സാലോജിക് സേവനം നൽകിയെന്ന് അവകാശവാദം. പണം കൈമാറിയത് നിയമപരമായി. ഇഡി നീക്കത്തിന് പിന്നിൽ ബിജെപി- യുഡിഎഫ് സഖ്യമെന്നും പിണറായി ആരോപിച്ചു.

വന്ദേഭാരത് എക്സ്പ്രസിൽ യുവതിയോട് മോശം പെരുമാറ്റം. തിരുവനന്തപുരം മൈലക്കര സ്വദേശി മനു അറസ്റ്റിൽ. മാലി സ്വദേശിനിയുടെ പരാതിയിലാണ് നടപടി. പ്രതിയെ പിടികൂടിയത് കായംകുളം ബസ് സ്റ്റാൻഡിൽ നിന്ന്.

റിപ്പോർട്ടർ ചാനലിനെതിരെ സാബു ജേക്കബ്. ചാനൽ നിയമവിരുദ്ധമായാണ് പ്രവർത്തിക്കുന്നത്. തെലങ്കാനയിലെ സർക്കാർ ഭൂമി 38 കോടി രൂപയ്ക്ക് വാങ്ങിയാണ് ഈടുവച്ചതെന്നും സാബു ജേക്കബ് പറഞ്ഞു.

ഗ്യാനേഷ് കുമാർ കൊടും ക്രിമിനലാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ പറഞ്ഞു. അമിത് ഷാ വോട്ട് കൊള്ളയ്ക്ക് കൂട്ടുനിന്നു. ജനാധിപത്യത്തെ കൊന്നു. നീതിക്കു മുൻപിൽ കീഴടങ്ങേണ്ടിവരും. വോട്ടർ പട്ടികയുടെ നേരിട്ടുള്ള ആക്സസ് ഗ്യാനേഷ് കുമാറിൻ്റെ കയ്യിലാണ്. ഇന്ത്യ മുന്നണിയുമായും പ്രതിപക്ഷ കക്ഷികളുമായും യോജിച്ചു മുന്നോട്ടു പോകുമെന്നും കെ.സി. വേണുഗോപാൽ പറഞ്ഞു.

തിരുവോണം ബംപർ നറുക്കെടുപ്പ് തിരുവനന്തപുരത്ത് നടന്നു. ഒന്നാം സമ്മാനമായ 30 കോടി അടിച്ചത് കണ്ണൂരിൽ നിന്ന് എടുത്ത ടിക്കറ്റിനാണ്. TL 360615 എന്ന നമ്പറിനാണ് സമ്മാനം.

കോഴിക്കോട് അരിക്കുളത്ത് ദമ്പതികൾക്ക് നേരെ വീടുകയറി ആക്രമണം. വാകമോളി സ്വദേശികളായ മഹേഷ്, ഭാര്യ ശാലിനി എന്നിവർക്കാണ് മർദനമേറ്റത്. അയൽവാസിയാണ് ആക്രമണം നടത്തിയത്. അയൽവാസിയുടെ പറമ്പിലേക്ക് കുപ്പിയും മുട്ടത്തോടും വലിച്ചെറിഞ്ഞു എന്നാരോപിച്ച് വീട്ടിൽ അതിക്രമിച്ചു കയറി മർദിക്കുകയായിരുന്നുവെന്ന് ശാലിനി പറഞ്ഞു. സംഭവത്തിൽ ദമ്പതികൾ കൊയിലാണ്ടി പൊലീസിൽ പരാതി നൽകി.

കൊല്ലത്ത് ആഭ്യന്തരമന്ത്രി അമിത് ഷായ്ക്ക് നേരെ കരിങ്കൊടി പ്രതിഷേധം. യൂത്ത് കോൺഗ്രസ് പ്രവർത്തകരാണ് കരിങ്കൊടി കാണിച്ചത്. ആശ്രാമം മൈതാനത്ത് വന്നിറങ്ങിയപ്പോഴാണ് കരിങ്കൊടി കാണിച്ചത്. യൂത്ത് കോൺഗ്രസ് സംസ്ഥാനപാധ്യക്ഷൻ ബിനു ചുള്ളിയലിൻ്റെ നേതൃത്വത്തിൽ ആയിരുന്നു പ്രതിഷേധം.

ഏഷ്യൻ ഗെയിംസിൽ കബഡിയിൽ ഇന്ത്യക്ക് ഇരട്ട സ്വർണം. പുരുഷ കബഡിയിൽ ഇറാനെ തോൽപ്പിച്ചാണ് ഇന്ത്യ സ്വർണം നേടിയത്. നേരത്തെ വനിതാ കബഡിയിലും സ്വർണം നേടിയിരുന്നു.

ഗ്യാനേഷ്കുമാർ ഏകാധിപത്യ പ്രവണതയോടെ അധികാര ദുർവിനിയോഗം നടത്തുന്നുവെന്ന് സിപിഐഎം ജനറൽ സെക്രട്ടറി എം.എ. ബേബി ആരോപിച്ചു. ഔദ്യോഗിക സ്ഥാനത്തിന് ചേരാത്ത വൃത്തികെട്ട പണികൾ ചെയ്യുന്നു. ബിജെപി ഭരണത്തിന് കീഴിൽ നടക്കുന്ന വൃത്തികേടുകളുടെ ആഴം എത്രയാണെന്ന് ഇതിലൂടെ വ്യക്തം. വോട്ട് ചെയ്യാനുള്ള അവകാശത്തിന് വോട്ടർമാർ ക്ലേശിക്കണം എന്നതാണ് ഇപ്പോഴത്തെ അവസ്ഥയെന്നും എം.എ. ബേബി പറഞ്ഞു.

മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ നിര്‍ണായക വെളിപ്പെടുത്തലുമായി മുന്‍ ചീഫ് സെക്രട്ടറി ജിജി തോംസണ്‍. ബിജെപി ടിക്കറ്റില്‍ മത്സരിച്ചുകൂടേയെന്ന് ഗ്യാനേഷ് കുമാര്‍ ചോദിച്ചു. ജയിച്ചാല്‍ കേന്ദ്രമന്ത്രിയാകാമെന്നും അദ്ദേഹം പറഞ്ഞു. എന്നാല്‍, തെരഞ്ഞെടുപ്പില്‍ മത്സരിക്കാന്‍ താല്‍പ്പര്യമില്ലെന്ന് മറുപടി നല്‍കിയെന്നുമാണ് ജിജി തോംസണിന്റെ വെളിപ്പെടുത്തല്‍. 2016ല്‍ ഡല്‍ഹിയിലേക്കുള്ള വിമാനയാത്രയ്ക്കിടെയായിരുന്നു സംഭാഷണം. ലോക്‌സഭാ തെരഞ്ഞെടുപ്പില്‍ പത്തനംതിട്ടയില്‍നിന്ന് മത്സരിക്കാനാണ് പറഞ്ഞതെന്നും ജിജി തോംസണ്‍ വ്യക്തമാക്കി.

മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ പ്രതിഷേധം ശക്തമാകുന്നതിനിടെ നിര്‍ണായക യോഗം ചേര്‍ന്ന് കേന്ദ്ര തെരഞ്ഞെടുപ്പ് കമ്മീഷന്‍. ഗ്യാനേഷ് കുമാറിനൊപ്പം, തെരഞ്ഞെടുപ്പ് കമ്മീഷണര്‍മാരായ സുഖ്ബീര്‍ സിങ് സന്ധു, വിവേക് ജോഷി എന്നിവര്‍ യോഗത്തിൽ പങ്കെടുത്തു. തെരഞ്ഞെടുപ്പ് കമ്മീഷന്റെ പ്രവർത്തനങ്ങളുമായി ബന്ധപ്പെട്ടുയർന്ന ഭിന്നതകള്‍ ചര്‍ച്ചയായെന്നാണ് വിവരം.

ഗ്യാനേഷ് കുമാറിനെതിരെ ആഞ്ഞടിച്ച് മുൻ സംസ്ഥാന മുഖ്യ തെരഞ്ഞെടുപ്പ് ഓഫീസർ ടീക്കാറാം മീണ. ഡൽഹിയിൽ പോയതോടെ ഗ്യാനേഷ് കുമാർ ബിജെപിയുടെ കരുവായി മാറി. ബിജെപിക്ക് വേണ്ടി മത്സരിച്ചുകൂടേ എന്ന് ജിജി തോംസണോട് ഗ്യാനേഷ് കുമാർ ചോദിച്ചത് ശരിയായിരിക്കും. ജനാധിപത്യ-തെരഞ്ഞെടുപ്പ് പ്രക്രിയയെ അട്ടിമറിക്കാൻ ഗ്യാനേഷ് കുമാർ കൂട്ടുനിന്നു. ഇതെല്ലാം ചൂണ്ടിക്കാട്ടി കഴിഞ്ഞ നവംബറിൽ താൻ നേരിട്ട് ഗ്യാനേഷ് കുമാറിന് കത്തയച്ചെങ്കിലും മറുപടി കിട്ടിയില്ല. ഇപ്പോൾ ദേശദ്രോഹി, ക്രിമിനൽ എന്നീ വിശേഷണങ്ങൾ അദ്ദേഹത്തിന് കിട്ടാൻ കാരണം ഈ നിലപാടുകളാണെന്നും ടിക്കാറാം മീണ ന്യൂസ് മലയാളത്തോട് പറഞ്ഞു.

തൃശൂര്‍ സാഹിത്യ അക്കാദമിയില്‍ മുഖ്യമന്ത്രി വി.ഡി. സതീശന്‍ പങ്കെടുത്ത പരിപാടി റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരെ തടഞ്ഞ് പൊലീസ്. പുസ്തക പ്രകാശന ചടങ്ങ് റിപ്പോര്‍ട്ട് ചെയ്യാനോ, ഫോട്ടോ എടുക്കാനോ അനുവദിച്ചില്ല. ചോദ്യങ്ങള്‍ ചോദിക്കരുതെന്ന് പറഞ്ഞ് വനിതാ മാധ്യമപ്രവര്‍ത്തകയെ വിലക്കി. പിന്നാലെ, സദസിന്റെ മുന്‍നിരയില്‍നിന്നും എഴുന്നേല്‍പ്പിച്ച് ഹാളിനു പുറത്തേക്കു മാറ്റി. മുഖ്യമന്ത്രി ചടങ്ങില്‍ എത്തിയശേഷം ദൃശ്യങ്ങൾ ചിത്രീകരിക്കാനോ ഫോട്ടോയെടുക്കാനോ മാധ്യമങ്ങളെ അനുവദിച്ചില്ല. പൊലീസ് നടപടിയില്‍ മാധ്യമപ്രവര്‍ത്തകര്‍ പ്രതിഷേധിച്ചു.

മലപ്പുറം പെരിന്തല്‍മണ്ണയില്‍ നിര്‍ധന കുടുംബത്തിന്റെ വീട് ജപ്തി ചെയ്യാനെത്തിയ ഉദ്യോഗസ്ഥരെ തിരിച്ചയച്ച് നജീബ് കാന്തപുരം എംഎല്‍എ. വേങ്ങൂരില്‍ രണ്ട് യുവതികളും അമ്മയും മാത്രമുള്ള കുടുംബത്തെയാണ് വീട്ടില്‍നിന്നും പുറത്താക്കാന്‍ ശ്രമിച്ചത്. കുടുംബം എംഎല്‍എയോട് ഫോണില്‍ സഹായം അഭ്യര്‍ഥിക്കുകയായിരുന്നു. സ്ഥലത്തെത്തിയ എംഎല്‍എ ഉദ്യോഗസ്ഥരുമായി സംസാരിച്ച്, സംഘത്തെ മടക്കിയയച്ചു. ഇതിനിടെ എംഎല്‍എയും ഉദ്യോഗസ്ഥരും തമ്മിൽ വാക്കേറ്റവും ഉണ്ടായി. അച്ഛന്റെ ചികിത്സാർത്ഥം കുടുംബം മേലാറ്റൂർ സഹകരണ ബാങ്കിൽ നിന്ന് അഞ്ച് ലക്ഷം വായ്‌പ എടുത്തിരുന്നു. കുടുംബനാഥൻ മരിച്ചതോടെ തിരിച്ചടവ് മുടങ്ങുകയായിരുന്നു.

ബസില്‍വച്ച് അപമാനിച്ചതായി കെഎസ്ആർടിസി കണ്ടക്ടർക്കെതിരെ പ്ലസ് ടു വിദ്യാർഥിനിയുടെ പരാതി. ശനിയാഴ്ച പറവൂർ സ്റ്റാൻഡിൽ നിന്ന് ഗുരുവായൂർ-എറണാകുളം റൂട്ടിൽ സർവീസ് നടത്തിയ KL15 9635 ലിമിറ്റഡ് സ്റ്റോപ്പ് ബസിലാണ് സംഭവം. നഗരത്തിലെ സ്കൂളിലെ അഞ്ച് പ്ലസ് ടു വിദ്യാർഥിനികൾ വള്ളുവള്ളിയിലേക്ക് പോകാൻ ബസിൽ കയറിയപ്പോൾ നാല് പേർക്ക് പ്രിയദർശിനി പദ്ധതിയിൽ സീറോ ടിക്കറ്റ് നൽകിയെന്നും തന്നോട് പണം ആവശ്യപ്പെട്ടെന്നും പരാതിക്കാരി പറയുന്നു. അടുത്തിടെ ക്ഷേത്രദർശനം കഴിഞ്ഞതിനാൽ മുടി കുറവായിരുന്ന പെൺകുട്ടി കമ്മലും മാലയും ധരിച്ചിരുന്നു. 'നിന്നെ കണ്ടാൽ പെൺകുട്ടിയായി തോന്നുന്നില്ല, സീറോ ടിക്കറ്റ് തരില്ല' എന്ന് കണ്ടക്ടർ യാത്രക്കാരുടെ മുന്നിൽ വെച്ച് ആക്ഷേപിച്ചു. 'നീ പെണ്ണാണോ എന്നറിയാൻ വസ്ത്രങ്ങൾ ഊരി നോക്കേണ്ടി വരും, അല്ലെങ്കിൽ പെണ്ണാണെന്ന് നെറ്റിയിൽ എഴുതി ഒട്ടിക്കണം' എന്നിങ്ങനെ അധിക്ഷേപിച്ചതായും പരാതിയിൽ പറയുന്നു. വള്ളുവള്ളി സ്കൂൾപടി സ്റ്റോപ്പിൽ ഇറങ്ങിയ ശേഷവും ബസ് അപകടകരമായി പിന്നിൽ നിർത്തി അധിക്ഷേപം തുടർന്നെന്നും പെൺകുട്ടി ആരോപിച്ചു. കണ്ടക്ടർക്കെതിരെ ശക്തമായ നിയമനടപടി വേണമെന്നാവശ്യപ്പെട്ട് പറവൂർ എസ്എച്ച്ഒക്കാണ് പരാതി നൽകിയത്.

വടകരയിൽ സ്കൂട്ടറും ലോറിയും കൂട്ടിയിടിച്ച് യുവാവ് മരിച്ചു. ലോകനാർകാവ് സ്വദേശി മാരാത്ത് ആയുഷ് ദേവ് (22) ആണ് മരിച്ചത്. സ്കൂട്ടറിൽ ഉണ്ടായിരുന്ന രണ്ടു പേർക്ക് പരിക്കേറ്റു. ലോകനാർകാവ് സ്വദേശി ആദിത്യൻ (22), നാദാപുരം റോഡ് സ്വദേശി ഘനശ്യാം എന്നിവർക്കാണ് പരിക്കേറ്റത്. കോഴിക്കോട് ഭാഗത്തുനിന്ന് കണ്ണൂരിലേക്ക് ചെങ്കൽ കയറ്റാൻ പോകുകയായിരുന്ന ലോറിയാണ് സ്കൂട്ടറിൽ ഇടിച്ചത്.

തിരുവനന്തപുരത്ത് ലോണ്‍ ആപ്പ് ഭീഷണിയെത്തുടര്‍ന്ന് ജീവനൊടുക്കാന്‍ ശ്രമിച്ച യുവാവ് മരിച്ചു. തിരുവല്ലം സ്വദേശി അഹൂജിത്ത് (22) ആണ് മരിച്ചത്. കഴിഞ്ഞ പതിനെട്ടിന് തൂങ്ങിമരിക്കാന്‍ ശ്രമിച്ചതിനെ തുടര്‍ന്ന് അഹൂജിത്ത് ആശുപത്രിയിൽ ചികിത്സയിലായിരുന്നു. ഇന്ന് വൈകിട്ടോടെ മരണം സംഭവിച്ചു. ഫോണിലേക്ക് വന്ന കോളുകളിൽ നിന്നാണ് ലോൺ ആപ്പ് ഭീഷണി വിവരം കുടുംബാംഗങ്ങൾ അറിയുന്നത്. അസ്വാഭാവിക മരണത്തിന് പൊലീസ് കേസെടുത്തു. ലോൺ ആപ്പിനെതിരെ പൊലീസിൽ പരാതി നൽകുമെന്ന് കുടുംബം അറിയിച്ചു. എൽഎൽബി ഫൈനൽ ഇയർ വിദ്യാർഥിയായിരുന്നു അഹൂജിത്ത്.