എയിംസ്: കോഴിക്കോട് സജീവ പരിഗണനയിലുണ്ടെന്ന് മുഖ്യമന്ത്രിയുടെ ഉറപ്പ്

കണ്ണൂർ ശ്രീകണ്ഠപുരം നഗരസഭയിൽ ഇന്ന് യുഡിഎഫ് ഹർത്താൽ. നഗരസഭ ചെയർമാനെ ഡിവൈഎഫ്ഐ പ്രവർത്തകർ മർദിച്ചു എന്നാരോപിച്ചാണ് ഹർത്താൽ. സ്ഥലത്ത് വൻ പൊലീസ് സന്നാഹം.

ആഡംബര കാർ വിവാദത്തിനിടെ മുസ്ലിം ലീഗിലെ പെരുമാറ്റച്ചട്ടം പഠിക്കാൻ മന്ത്രിമാരും എംഎൽഎമാരും. പ്രത്യേക പരിശീലന പരിപാടി ഇന്ന് മലപ്പുറം വാഴയൂരിൽ നടക്കും. അടൂർ പ്രകാശിൻ്റെ പരസ്യപ്രതികരണത്തിൽ ലീഗിൽ കടുത്ത അതൃപ്തി. ബോർഡ് - കോർപ്പറേഷൻ സ്ഥാനങ്ങളിലും ഇന്ന് പ്രാഥമിക ചർച്ചയ്ക്ക് സാധ്യത.

ഗ്യാനേഷ് കുമാറിൻ്റെ രാജി ആവശ്യപ്പെട്ട് രാജ്യതലസ്ഥാനത്ത് ഇന്നും വൻ പ്രതിഷേധത്തിന് സാധ്യത. ജന്തർ മന്തറിലേക്ക് ഉച്ചയോടെ മാർച്ച് നടത്തുമെന്ന് ഐസ അറിയിച്ചു. കനത്ത സുരക്ഷാക്രമീകമരണങ്ങളാണ് ഡൽഹി പൊലീസ് ഒരുക്കിയിട്ടുള്ളത്. രാജ്യവ്യാപകമായി പ്രതിഷേധ പരിപാടികളുമായി പ്രതിപക്ഷ പാർട്ടികൾ മുന്നോട്ട് പോകുകയാണ്. സിജെപിയുടെ ജന്തർമന്തർ മാർച്ച് ഈമാസം 10ന് നടക്കും.

ഇന്ത്യ-ബ്രസീൽ ചരിത്ര പോരാട്ടം ഇന്ന് കൊൽക്കത്തയിൽ. സാൾട്ട്ലേക്ക് സ്റ്റേഡിയത്തിൽ രാത്രി ഏഴരയ്ക്കാണ് മത്സരം. ലോകകപ്പിലെ തിരിച്ചടി മറക്കാനാണ് കാനറിപ്പട തയ്യാറെടുക്കുന്നത്. ഇന്ത്യൻ ഫുട്ബോളിൻ്റെ കരുത്ത് കാണിക്കാൻ ആവും ഖാലിദ് ജമീലും സംഘവും ഇന്നിറങ്ങുക.

നേഷൻസ് ലീഗിലെ ഫ്രാൻസ്-ഇറ്റലി സൂപ്പർ പോരാട്ടം സമനിലയിൽ കലാശിച്ചു. തുർക്കിയെ മൂന്ന് ഗോളിനാണ് ബെൽജിയം തോൽപ്പിച്ചത്. ഇംഗ്ലണ്ട് ഇന്ന് ക്രൊയേഷ്യയെ നേരിടും. സ്പെയിനും ചെക്ക് റിപ്പബ്ലിക്കും ഇന്ന് ഏറ്റുമുട്ടും.

കൊല്ലത്ത് എംഡിഎംഎ പിടികൂടി. 14.060 ഗ്രാം എംഡിഎംഎയാണ് പിടികൂടിയത്. കുളപ്പാടം സ്വദേശി അലിഫ് കസ്റ്റഡിയിൽ. കണ്ണനെല്ലൂർ പൊലീസ് സ്റ്റേഷൻ പരിധിയിൽ നിന്നാണ് എംഡിഎംഎ പിടികൂടിയത്.

കേരളത്തിൽ യുഡിഎഫ് സംവിധാനം മുഴുവൻ അലങ്കോലപ്പെട്ടുവെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ പറഞ്ഞു. ഒന്നും അറിയുന്നില്ല എന്ന് കൺവീനർ തന്നെ പറയുകയാണ്. അപൂർവം ആളുകളാണ് സതീശനെ അനുകൂലിക്കുന്നത്. കോൺഗ്രസിലും യുഡിഎഫിലും വലിയ വിഭജനം ഉണ്ടായിരിക്കുന്നു. ബിജെപിക്ക് അനുകൂലമായ നിലപാടാണ് സ്വീകരിക്കുന്നത്. മുഖ്യമന്ത്രിയുടെ സ്പോൺസർ ആർഎസ്എസും ബിജെപിയുമാണെന്ന് എം.വി. ഗോവിന്ദൻ ആരോപിച്ചു

സ്കൂൾ കായിക മേളയിലെ വീഴ്ചയിൽ കായിക വകുപ്പിന് നേരിട്ട് ബന്ധമില്ലെന്ന് മന്ത്രി ഒ.ജെ. ജനീഷ്. ഇത് കായിക വകുപ്പിൻ്റെ തലയിൽ വെച്ച് കെട്ടാൻ ശ്രമിക്കുകയാണ്. എന്ത് സംഭവിച്ചാലും ഒരാളെ മാത്രം കുറ്റപ്പെടുത്തുന്നത് ശരിയല്ല. വിദ്യാഭ്യാസ ഉദ്യോഗസ്ഥർക്ക് വീഴ്ച സംഭവിച്ചിട്ടുണ്ടെന്നാണ് പ്രാഥമികമായി മനസിലാക്കിയത്. വിദ്യാഭ്യാസ വകുപ്പ് അന്വേഷണത്തിന് ഉത്തരവിട്ടിട്ടുണ്ടെന്നും മന്ത്രി പറഞ്ഞു.

എസ്എഫ്ഐ നേതാവ് നന്ദനെ ഭീഷണിപ്പെടുത്തിയെന്ന പരാതിയിൽ എസ്ഐ ഗോകുലിനെ വിളിച്ചുവരുത്തി തിരുവനന്തപുരം സിറ്റി പൊലീസ് കമ്മീഷണർ. ഗോകുലിനോട് വിശദീകരണം തേടിയതായാണ് വിവരം. എസ്എഫ്ഐ നേതാവ് നന്ദനോട് സംസാരിക്കുന്നതിൻ്റെ ഓഡിയോ സന്ദേശം പുറത്തുവന്നിരുന്നു.

തൊടുപുഴ നഗരസഭ ഭരണസമിതി ചേരിപ്പോര്. മുസ്ലീം ലീഗ് വനിതാ കൗൺസിലർക്ക് സസ്പെൻഷൻ. നഗരസഭക്കെതിരെ അഴിമതി ആരോപണം ഉന്നയിച്ച സഫിയ ജബ്ബാറിനെ ആണ് സസ്പെൻഡ് ചെയ്തത്. ആരോപണങ്ങൾ അടിസ്ഥാനരഹിതം എന്ന് പാർട്ടി വിലയിരുത്തി. ആറുമാസത്തേക്കാണ് സസ്പെൻഷൻ.

സംസ്ഥാനത്തെ കരിങ്കൊടി പ്രതിഷേധങ്ങളിൽ ഇരട്ട നിലപാടെന്ന് ഡിവൈഎഫ്ഐ സംസ്ഥാന സെക്രട്ടറി വി.കെ. സനോജ് പറഞ്ഞു. കരിങ്കൊടി കാണിച്ചതിന് ഡിവൈഎഫ്ഐ പ്രവർത്തകർക്ക് എതിരെ ജാമ്യമില്ലാ വകുപ്പും, യുവമോർച്ചക്കാർക്ക് ജാമ്യം കിട്ടുന്ന വകുപ്പിലുമാണ് കേസെടുത്തിരിക്കുന്നതെന്നും വി.കെ സനോജ് ആരോപിച്ചു.

കണ്ണൂർ കരുവഞ്ചാലിൽ വാഹനാപകടത്തിൽ ഒരു മരണം. 2 പേർക്ക് ഗുരുതരമായി പരിക്കേറ്റു. ബംഗാൾ സ്വദേശി കലിത്തോത്തെ ആണ് മരിച്ചത്. പിക്കപ്പ് വാൻ നിയന്ത്രണം വിട്ട് മരത്തിലിടിച്ച് മറിയുകയായിരുന്നു. ഇടിയുടെ ആഘാതത്തിൽ വാഹനത്തിൻ്റെ മുൻഭാഗം പൂർണമായും തകർന്നു.

ബിജെപിക്ക് തിരിച്ചടി നൽകികൊണ്ട് ആർ. ശ്രീലേഖ കൗൺസിലർ സ്ഥാനം രാജിവച്ചു. തിരുവനന്തപുരം മേയർ വി.വി. രാജേഷിന് രാജി സന്ദേശം അയച്ചു.

ആർ. ശ്രീലേഖയുടെ രാജി സ്വീകരിച്ചിട്ടില്ലെന്ന് മേയർ വി.വി. രാജേഷ് പറഞ്ഞു. പ്രശ്നം പാർട്ടി പരിഹരിക്കും. ലേഖയുമായി ചർച്ച നടത്താൻ ഒരുങ്ങുകയാണ് ബിജെപി നേതൃത്വം.

കോഴിക്കോട് കൂമ്പാറയിൽ ടൂറിസ്റ്റ് ബസ് മറിഞ്ഞ് അപകടം. നിരവധിപ്പേർക്ക് പരിക്ക്. പരിക്കേറ്റവരെ ആശുപത്രിയിലേക്ക് മാറ്റുന്നു. കാക്കാടംപൊയിലിൽ നിന്നും മടങ്ങുകയായിരുന്ന ബസ് നിയന്ത്രണം നഷ്ടപ്പെട്ട് മറിഞ്ഞതെന്നാണ് പ്രാഥമിക നിഗമനം.

ആർ. ശ്രീലേഖ രാജി വിവരം സംസ്ഥാന പ്രസിഡൻ്റ് രാജീവ് ചന്ദ്രശേഖറുമായി സംസാരിച്ചു. ശ്രീലേഖയെ അനുനയിപ്പിക്കാൻ നേതൃത്വം ചർച്ച തുടങ്ങി കഴിഞ്ഞു.

ശ്രീലഖയുടെ രാജി വാർത്ത അറിഞ്ഞത് മാധ്യമങ്ങളിലൂടെ ആണെന്ന് ബിജെപി നേതാവ് പി.കെ കൃഷ്ണദാസ് പ്രതികരിച്ചു. നയിക്കാൻ നേതൃനിരയിലുണ്ടാകുമെന്നാണ് പ്രതീക്ഷ.എന്തെങ്കിലും സ്ഥാനം പ്രതീക്ഷിച്ചു വന്നയാളല്ലെന്നും കൃഷ്ണദാസ് പറഞ്ഞു.

സ്കൂള്‍ കുട്ടികള്‍ക്കുള്ള ഉച്ച ഭക്ഷണ അരി കരിഞ്ചന്തയിലേക്ക് കടത്തിയ സംഭവത്തില്‍ പോത്തന്‍കോട് ലക്ഷ്മി വിലാസം സ്കൂളിനെതിരെ പൊലീസ് പ്രാഥമിക അന്വേഷണം ‌ആരംഭിച്ചു. പൊതു വിദ്യാഭ്യാസ വകുപ്പിന്റെ പരാതിയിലാണ് നടപടി. സ്കൂള്‍ ജീവനക്കാരുടെ മൊഴി രേഖപ്പെടുത്തി. രക്ഷിതാക്കളുടെ പരാതിയില്‍ സ്കൂളിനെതിരെ കൂടുതല്‍ പരിശോധനയ്ക്കാണ് പൊതുവിദ്യാഭ്യാസ വകുപ്പിന്റെ നീക്കം. ന്യൂസ് മലയാളമാണ് തട്ടിപ്പ് പുറത്തുകൊണ്ടുവന്നത്.

മഴയില്‍ കുളമായി നാദാപുരം ഉപജില്ല ശാസ്ത്രമേള. എൽപി വിഭാഗം വിദ്യാർഥികളുടെ മത്സരമാണ് മഴയിൽ കുതിർന്നത്. വിദ്യാർഥികൾ തയ്യാറാക്കിയ ചാർട്ടുകൾ ഉൾപ്പെടെ പൂർണമായും നനഞ്ഞു. താൽക്കാലിക പന്തലിൽ വെള്ളം കയറി. മഴ മുന്നറിയിപ്പ് അവഗണിച്ച് താൽക്കാലിക പന്തൽ തയ്യാറാക്കിയതാണ് തിരിച്ചടിയായത്. പേരോട് ഹയർ സെക്കന്‍ഡറി സ്കൂളിലാണ് മത്സരം തുടരുന്നത്. ജഡ്ജസ് മൊബൈലിൽ വീഡിയോ ദൃശ്യങ്ങൾ പകർത്തിയാണ് വിധിനിർണയം പൂർത്തിയാക്കിയത്.

ആര്‍. ശ്രീലേഖ രാജിവയ്ക്കില്ല, അതിന്റെ ആവശ്യവുമില്ലെന്ന് ബിജെപി ജില്ലാ പ്രസിഡന്റ് കരമന ജയന്‍. സംഘടനാപരമായി യാതൊരു പ്രശ്നവുമില്ല. രാജിവച്ചു എന്ന് പറയുന്നത് വിശ്വസിക്കാൻ കഴിയുന്നില്ല. ഇന്ന് വിളിച്ച് സംസാരിച്ചിരുന്നു. ഒരു പ്രശ്നവുമില്ല. രാജി ആണെങ്കില്‍ കൊടുക്കേണ്ടത് കോർപ്പറേഷൻ സെക്രട്ടറിക്കാണ്. മേയർക്ക് മെയിൽ വന്നതായി തനിക്ക് അറിയില്ല. പാർട്ടിക്ക് രാജിക്കത്ത് വന്നിട്ടില്ല. ശ്രീലേഖയുമായി നിരന്തരം സംസാരിക്കാറുണ്ട്. ജില്ലയിൽ സംഘടിപ്പിക്കുന്ന എല്ലാ പരിപാടികളിലും അവര്‍ പങ്കെടുക്കാറുണ്ട്. സംസ്ഥാന ശിബിരത്തിലടക്കം പങ്കെടുത്തു. രാജിവച്ച കാര്യം ബിജെപിക്ക് അറിയില്ലെന്നും കരമന ജയന്‍ കൂട്ടിച്ചേര്‍ത്തു.

പാലക്കാട് സിപിഐഎമ്മിൽ വിഭാഗീയത ഉണ്ടെന്ന് തുറന്നുസമ്മതിച്ച് റിപ്പോര്‍ട്ട്. ജില്ലയിലെ വിഭാഗീയത ചില മണ്ഡലങ്ങളിലെ തെരഞ്ഞെടുപ്പ് തോൽവിക്ക് കാരണമായി. വിഭാഗീയത അവസാനിപ്പിക്കണമെന്നും ജില്ലാ സെക്രട്ടറി അവതരിപ്പിച്ച റിപ്പോർട്ടില്‍ പറയുന്നു. റിയൽ എസ്റ്റേറ്റ് മാഫിയയായി പാര്‍ട്ടി മാറി. അട്ടപ്പാടിയിലെ അനധികൃത ഭൂമി ഇടപാടുകളിൽ പാര്‍ട്ടി നേതാക്കൾക്ക് പങ്കുണ്ട്. നേതാക്കളുടെ സ്വത്ത് വിവരം കണക്കുകൾ പുറത്തുവിടണമെന്നും റിപ്പോര്‍ട്ടില്‍ പറയുന്നു. സിപിഐഎം പാലക്കാട് ജില്ലാ വിപുലീകൃത കമ്മിറ്റിയിലാണ് ജില്ലാ സെക്രട്ടറി ഇ.എൻ. സുരേഷ് ബാബു റിപ്പോർട്ട് അവതരിപ്പിച്ചത് സിപിഐഎം ജില്ലാ സെക്രട്ടേറിയറ്റ് വേണ്ടവിധം പ്രവർത്തിക്കുന്നില്ലെന്നു സംസ്ഥാന സെക്രട്ടറി എം.വി. ഗോവിന്ദൻ അഭിപ്രായപ്പെട്ടു. കോങ്ങാട്, തൃത്താല തോൽവികൾക്ക് കാരണം വിഭാഗീയതയാണെന്നും ഗോവിന്ദന്‍ അഭിപ്രായപ്പെട്ടു.

തിരുവനന്തപുരം വഴുതക്കാട്ടെ കാഴ്ച ഇല്ലാത്തവര്‍ക്കായുള്ള സര്‍ക്കാര്‍ വിദ്യാലയത്തിലെ അധ്യാപകനെ മർദിച്ച സംഭവത്തില്‍ മുൻ ടീച്ചർ ഇൻ ചാർജിന് സസ്പെന്‍ഷന്‍. കാഴ്ച പരിമിതിയുള്ള അധ്യാപകനും ടീച്ചർ ഇൻ ചാർജുമായ വിനോദ് ബി.യെ കയ്യേറ്റം ചെയ്ത ലീന സി. ലംബോദരനെയാണ് അന്വേഷണ വിധേയമായി സസ്പെന്‍ഡ് ചെയ്തത്. തിരുവനന്തപുരം വിദ്യാഭ്യാസ ഉപഡയറക്ടറുടെ റിപ്പോർട്ടില്‍ പൊതുവിദ്യാഭ്യാസ ഡയറക്ടറുടേതാണ് നടപടി. ലീനയുടെ നടപടി ഗുരുതര വീഴ്ചയാണെന്നാണ് പൊതു വിദ്യാഭ്യാസ വകുപ്പിന്റെ കണ്ടെത്തൽ. കഴിഞ്ഞ മാസമാണ് വിനോദിനെ ലീന കയ്യേറ്റം ചെയ്തത്. ക്വാർട്ടേഴ്സ് ഒഴിയുന്നതുമായി ബന്ധപ്പെട്ട തർക്കമായിരുന്നു മർദനത്തിനു കാരണം.

പല സ്ഥാനങ്ങളും പ്രതീക്ഷിച്ചാണ് ആര്‍. ശ്രീലേഖ ബിജെപിയിലേക്ക് പോയതെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദന്‍. ആനുകൂല്യങ്ങൾ പ്രതീക്ഷിച്ച് ബിജെപിയിൽ വന്നവരൊക്കെ, രാഷ്ട്രീയമായി മുന്നോട്ട് പോകണമെന്നില്ല. അതിന്റെ ഉദാഹരണമാണ് ശ്രീലേഖ. രാജി നല്‍കിയത് മേയര്‍ക്കാണ്. പൂര്‍ണമായുള്ള രാജിയല്ല എന്നാണ് മനസിലാക്കുന്നത്. ബിജെപിക്കിടയിലുള്ള പ്രശ്നങ്ങളാണ്, മറ്റു രാഷ്ട്രീയ പ്രശ്നങ്ങൾ ഉണ്ടെന്ന് തോന്നുന്നില്ല. ഭരണപ്രതിസന്ധി സ്വഭാവികമായി ഉണ്ടാകും. സിപിഐഎം അതു വേണ്ട വിധം ഉപയോഗിക്കുമെന്നും ഗോവിന്ദന്‍ പ്രതികരിച്ചു.

കൊല്ലം ചടയമംഗലത്ത് സർക്കാർ ജീവനക്കാരൻ പോക്സോ കേസിൽ അറസ്റ്റിൽ. ആയൂരിൽ സ്വകാര്യ ട്യൂഷൻ സെന്റർ നടത്തുന്ന പ്രവീണാണ് അറസ്റ്റിലായത്. സ്ഥാപനത്തിലെത്തിയ പ്ലസ് വൺ വിദ്യാർഥിനിയോട് ലൈംഗികാതിക്രമം നടത്തുകയും കുട്ടിയെ പീഡിപ്പിക്കാൻ ശ്രമിച്ചെന്നുമാണ് കേസ്. വിവരമറിഞ്ഞ പെൺകുട്ടിയുടെ രക്ഷിതാക്കൾ ചൈൽഡ് ലൈനിൽ പരാതി നൽകുകയായിരുന്നു. ചൈൽഡ് ലൈനാണ് പരാതി പൊലീസിനെ അറിയിച്ചത്. കോട്ടയത്ത് റവന്യൂ വകുപ്പിൽ സീനിയർ സർവ്വേയറായി ജോലിചെയ്യുന്ന പ്രതി അവധിയെടുത്താണ് ട്യൂഷൻ സെന്ററിൽ എത്തിയിരുന്നത്. ഇയാൾ അനധികൃതമായി പണം സമ്പാദിച്ചിരുന്നു എന്ന വിവരം പൊലീസ് റവന്യൂ വകുപ്പിന് കൈമാറിയിട്ടുണ്ട്.

കോഴിക്കോട് സിറ്റി പൊലീസ് കമ്മീഷണർക്കെതിരായ ഭീഷണി പ്രസംഗത്തിൽ ഡിവൈഎഫ്ഐ സംസ്ഥാന കമ്മിറ്റി അംഗം എം കെ നികേഷിനെതിരെ കേസ്. കോഴിക്കോട് ടൗൺ പോലീസാണ് കേസെടുത്തത്. ഇന്നലെ രാത്രി കോഴിക്കോട് റെയിൽവേ സ്റ്റേഷനിലേക്ക് ഡിവൈഎഫ്ഐ നടത്തിയ മാർച്ചിനിടെയായിരുന്നു ഭീഷണി പ്രസംഗം. പ്രതിഷേധത്തിന്റെ പേരിൽ നെയിം പ്ലേറ്റ് ഇല്ലാത്ത പൊലീസുകാർ വീട്ടിൽ കയറിയാൽ കണ്ണ് അടിച്ചു പൊട്ടിക്കും, ഡിവൈഎഫ്ഐയുടെ സമര മുഖത്തേക്ക് വന്നാൽ കോഴിക്കോട് സിറ്റി പൊലീസ് കമ്മീഷണർ എ.പി. ഷൗക്കത്തലിയുടെ പൊടി പോലും കാണില്ല എന്നിങ്ങനെയായിരുന്നു പ്രസംഗം. പൊലീസ് ഉദ്യോഗസ്ഥന്റെ ഔദ്യോഗിക കൃത്യ നിർവഹണം തടസപ്പെടുത്തൽ, ഭീഷണി എന്നീ വകുപ്പുകൾ ചുമത്തിയാണ് കേസ്.

വിഴിഞ്ഞത്ത് ആധുനിക സൗകര്യങ്ങളോടെയുള്ള ഫിഷിങ് ഹാർബറിന് ഭരണാനുമതി നല്‍കി സര്‍ക്കാര്‍ ഉത്തരവ്. 235 മീറ്റർ പുലിമുട്ടും 500 മീറ്റർ ബെർത്തും നിർമിക്കും. അദാനി വിഴിഞ്ഞം പോർട്ട് ലിമിറ്റഡ് വഴിയാണ് പദ്ധതി നടപ്പാക്കുക. ആദ്യ ഘട്ടത്തില്‍ 271 കോടി രൂപയാണ് പദ്ധതിക്കായി വകയിരുത്തുക.

കായികമന്ത്രി ഒ.ജെ. ജനീഷിനെതിരെ പ്രതിഷേധിച്ച പയ്യന്നൂരിലെ ആറ് ഡിവൈഎഫ്ഐ പ്രവര്‍ത്തകര്‍ അറസ്റ്റില്‍. ഇരിട്ടി കൂട്ടുപുഴയിൽ നിന്നാണ് പ്രതികൾ അറസ്റ്റിലായത്. ഡിവൈഎഫ്ഐ പയ്യന്നൂർ ബ്ലോക്ക്‌ പ്രസിഡന്റ്‌ സി. ഷിജിൽ, നിതിൻ, അക്ഷയ്, സുബിൻ, ജിഷ്ണു എന്നിവരാണ് അറസ്റ്റിലായത്.

ഡിവൈഎഫ്ഐയുടെ കരിങ്കൊടി പ്രതിഷേധത്തില്‍ പങ്കെടുത്ത താല്‍ക്കാലി ഡോക്ടറെ കാസര്‍ഗോഡ് ജില്ലാ ആശുപത്രിയില്‍നിന്ന് പുറത്താക്കി. എൻഎച്ച്എമ്മിന്റെ കീഴില്‍ കാഞ്ഞങ്ങാട്ടെ കാസർഗോഡ് ജില്ലാ ആശുപത്രിയിൽ ദന്തൽ സർജനായി ജോലി ചെയ്യുന്ന ഡോ. സിദ്ധാര്‍ഥ് രവീന്ദ്രനെയാണ് പുറത്താക്കിയത്. മന്ത്രി ഒ.ജെ. ജനീഷിനെതിരെ കാഞ്ഞങ്ങാട് ഡിവൈഎഫ്ഐ നടത്തിയ പ്രതിഷേധത്തിൽ സിദ്ധാര്‍ഥ് പങ്കെടുത്തിരുന്നു.