കൊച്ചി: നീട്ടി വളർത്തിയ മുടി ബോസ്റ്റൽ സ്കൂളിൽ നിന്ന് പറ്റെവെട്ടി നെടുമ്പാശേരി മിനി കൂപ്പർ അപകടത്തിലെ പ്രതി സുഹൈൽ സജീവ്. ഇന്നലെ കോടതിയിൽ ആണ് രൂപമാറ്റം വരുത്തി സുഹൈലും കൂട്ടാളികളും ഹാജരായത്. മുടിവെട്ടിയത് സാക്ഷികളെ ആശയക്കുഴപ്പത്തിലാക്കാനാണ് എന്നാണ് പൊലീസിൻ്റെ നിഗമനം. സുഹൈലിന് നിയമോപദേശം കിട്ടിയ ശേഷം ആണ് രൂപമാറ്റം എന്നാണ് വിവരം. അതേസമയം സുഹൈൽ സ്വയംമുടി വെട്ടിയതാണെന്നാണ് ബോസ്റ്റൽ സ്കൂൾ അധികൃതരുടെ വിശദീകരണം.
19 കാരനായ പ്രതിക്ക് മദ്യം നൽകിയ കൊച്ചിയിലെ മൂന്ന് ബാറുകളുടെ ലൈസൻസ് കഴിഞ്ഞദിവസം സസ്‌പെൻഡ് ചെയ്തിരുന്നു. എക്സൈസ് കമ്മീഷണർ സാംബശിവ റാവു ആണ് നടപടിക്ക് നിർദേശം നൽകിയത്. കടവന്ത്ര ദയ ബാർ, മൺസൂൺ എംപ്രസ് പാലാരിവട്ടം, മാരിയറ്റ് ഹോട്ടൽ നെടുമ്പാശ്ശേരി എന്നീ ബാറുകൾക്ക് എതിരെയാണ് എക്സൈസ് വകുപ്പിൻ്റെ നടപടി. അബ്കാരി നിയമപ്രകാരം 23 വയസിൽ താഴെ പ്രായമുള്ളവർക്ക് മദ്യം വിൽക്കാൻ പാടില്ല.
അതേസമയം, നെടുമ്പാശേരിയിലെ മിനി കൂപ്പർ അപകടം പൊലീസ് വളരെ ഗൗരവത്തോടെയാണ് കാണുന്നതെന്നും ശക്തമായ നടപടി സ്വീകരിക്കുമെന്നും കേരളത്തിൽ ഇനി മുതൽ മദ്യപിച്ച് വാഹനം ഓടിക്കുന്നത് അനുവദിക്കില്ലെന്ന് ആഭ്യന്തര മന്ത്രി രമേശ് ചെന്നിത്തല ഇന്നലെ വ്യക്തമാക്കിയിരുന്നു.
"കേസിൽ ഒരാളെയും രക്ഷപ്പെടാൻ അനുവദിക്കില്ല. ഇന്നലെ സംസ്ഥാനത്ത് 12 മണിക്കൂർ നീണ്ട പരിശോധനയിൽ മദ്യപിച്ച് വാഹനം ഓടിച്ച ആയിരത്തോളം പേരെ പൊലീസ് അറസ്റ്റ് ചെയ്തു. യുവാവിൻ്റെ ലൈസൻസ് റദ്ദാക്കുന്നതിന് പുറമെ കർശനമായ നിയമനടപടികളും സ്വീകരിക്കും. 21 വയസിന് താഴെയുള്ളവരെ ബോസ്റ്റൽ സ്കൂളിലേക്ക് അയക്കാൻ തീരുമാനിച്ചത് പൊലീസല്ല. ആ തീരുമാനം കോടതിയുടേതാണ്. ഇത് അറിയാത്ത ചില മാധ്യമപ്രവർത്തകർ തെറ്റിദ്ധാരണ പരത്തുന്നുണ്ട്," മന്ത്രി രമേശ് ചെന്നിത്തല വ്യക്തമാക്കി.