സംസ്ഥാനത്തെ മഴ സാഹചര്യം മണിക്കൂറടിസ്ഥാനത്തിൽ വിലയിരുത്താൻ മുഖ്യമന്ത്രിയുടെ നിർദേശം

സംസ്ഥാനത്ത് മഴ കണക്കുന്ന സാഹചര്യത്തിൽ സ്ഥിതിഗതികൾ മണിക്കൂർ അടിസ്ഥാനത്തിൽ വിലയിരുത്താൻ മുഖ്യമന്ത്രി വി.ഡി സതീശൻ നിർദ്ദേശം നൽകി. ഇതിൻ്റെ അടിസ്ഥാനത്തിൽ ദുരന്തനിവാരണ അതോറിറ്റി കമ്മീഷണർ വിഗ്നേശ്വരി ഐ.എ.എസ് ഇടുക്കി, കോട്ടയം ജില്ലാ കളക്ടർമാരുടെ യോഗം വിളിച്ചുചേർത്ത് സ്ഥിതിഗതികൾ വിലയിരുത്തി.

കാലാവസ്ഥ സംബന്ധിച്ച് ഇടുക്കി, കോട്ടയം ജില്ലകളിൽ എസ്.എം.എസ് അലർട്ടുകൾ നൽകിയിട്ടുണ്ട്. ജില്ലകളിലെ സ്ഥിതിഗതികൾ വിലയിരുത്തി ഒഴിപ്പിക്കൽ നടപടി അടക്കം സ്വീകരിക്കാൻ കളക്ടർമാരോട് നിർദ്ദേശിച്ചിട്ടുണ്ട്.

നിലമ്പൂർ അമരമ്പലം ടി.കെ കോളനിയിൽ അഞ്ചുപേർ ഒഴുക്കിൽപ്പെട്ടതായി വിവരം ലഭിച്ചിട്ടുണ്ട്. ദുരന്തനിവാരണ സേനയുടെ പ്രത്യേക സംഘത്തെ ഈ മേഖലയിൽ വിന്യസിക്കാൻ മുഖ്യമന്ത്രി അടിയന്തര നിർദേശം നൽകി.

ആഡംബര കാർ വിവാദത്തിൽ മറുപടിയുമായി മന്ത്രി കെ.എം ഷാജി. വിവാദത്തിലായ റേഞ്ച് റോവർ വർഷങ്ങളായി ഉപയോഗിക്കുന്നത്. ആവശ്യമായ അനുമതി വാങ്ങിയാണ് കാർ ഉപയോഗിച്ചത്. ആവശ്യമെങ്കിൽ ഇനിയും ഉപയോഗിക്കുമെന്ന സൂചനയും ഷാജി നൽകുന്നുണ്ട്. തടയും എന്ന ഭീഷണി വേണ്ടെന്ന് ഡിവൈഎഫ്ഐക്കും മറുപടി. നാടിനെ ബാധിക്കുന്ന പ്രധാന വിഷയങ്ങൾക്കിടയിൽ മാധ്യമങ്ങൾ റേഞ്ച് റോവർ വിഷയത്തിന് പിന്നാലെ പോകേണ്ടതുണ്ടോ എന്നും എഫ്.ബി പോസ്റ്റിൽ കെ.എം. ഷാജി ചോദിച്ചു. രാവിലെ 11.30-ന് പ്രധാനപ്പെട്ട കാര്യം പറയാനുണ്ടെന്നും ഷാജി.

പശ്ചിമേഷ്യൻ സംഘർഷം അവസാനിപ്പിക്കുന്നതിനുള്ള ഉപാധികൾ യുഎസിനെ അറിയിച്ചെന്ന് ഇറാൻ. എല്ലാ മേഖലകളിലേയും യുദ്ധം അവസാനിപ്പിക്കണം എന്നും ഇറാൻ്റെ മരവിപ്പിച്ച മുഴുവൻ സ്വത്തുക്കളും വിട്ടുനൽകണം എന്നും വ്യവസ്ഥ. ഖത്തർ വഴിയാണ് പാധികൾ വൈറ്റ് ഹൗസിനെ അറിയിച്ചത്.

രണ്ട് ദിവസത്തെ ഇടവേളയ്ക്ക് ശേഷം സംസ്ഥാനത്ത് വീണ്ടും വൈദ്യുതി മുടക്കം. ഇന്നലെ അർദ്ധരാത്രി വരെ പല തവണ വൈദ്യുതി മുടങ്ങി. ഇന്നലെ ഉപഭോഗം രേഖപ്പെടുത്തിയത് 90 ദശലക്ഷത്തിന് മുകളിൽ. അധിക വൈദ്യുതി എത്തിക്കാൻ കെഎസ്ഇബിയുടെ തിരക്കിട്ട നീക്കം.

സംസ്ഥാന സർക്കാരിന് ഇന്ന് മുതൽ ഹെലികോപ്ടർ സേവനം ഇല്ല. കരാർ കാലാവധി ഇന്നലെ വൈകീട്ട് അവസാനിച്ചു. കരാർ പുതുക്കുന്നതിൽ അന്തിമ തീരുമാനം അടുത്തയാഴ്ച എന്ന് മുഖ്യമന്ത്രിയുടെ ഓഫീസ്. കരാർ ഒഴിവാക്കി അടിയന്തര ഘട്ടങ്ങളിൽ മാത്രം വാടകയ്ക്ക് എടുക്കുന്നതിലും ആലോചന.

കഴിഞ്ഞ സർക്കാരിൻ്റെ കാലത്ത് മന്ത്രി ഗണേഷ് കുമാർ സുഹൃത്തുക്കളുടെ കാർ ഔദ്യോഗിക വാഹനമാക്കാൻ നല്കിയ അപേക്ഷ തള്ളിയിരുന്നതായി രേഖകൾ. സർക്കാർ അനുവദിച്ച സർക്കാർ വാഹനത്തിന് പുറമെ രണ്ട് സ്വകാര്യ കാറുകളിൽ ബോർഡ് വച്ച് യാത്ര ചെയ്യാനുള്ള അപേക്ഷയാണ് സംസ്ഥാന പ്രോട്ടോക്കോൾ ഓഫീസർ അന്നത്തെ മുഖ്യമന്ത്രി പിണറായി വിജയൻ്റെ നിർദേശപ്രകാരം തള്ളിയത്.

തിരുവിതാംകൂർ ദേവസ്വം ബോർഡിൽ മുൻ ഭരണസമിതിയുടെ കാലത്ത് നടന്നത് വ്യാപക താത്കാലിക നിയമനങ്ങൾ. വിവാദമായ സ്വർണപ്പാളി കേസ് കൈകാര്യം ചെയ്തിരുന്ന ദേവസ്വം വിജിലൻസ് ഓഫീസിൽ വരെ ഇത്തരത്തിൽ നിയമനങ്ങൾ നടന്നതിൻ്റെ രേഖകൾ ന്യൂസ് മലയാളത്തിന് ലഭിച്ചു. ദിവസവേതന അടിസ്ഥാനത്തിൽ ജോലി ചെയ്തിരുന്ന മൂന്ന് പേർക്ക് സ്ഥിരനിയമനം നടത്തിയതായും രേഖകൾ വ്യക്തമാക്കുന്നു. താൽക്കാലിക ജീവനക്കാരെ എംപ്ലോയ്മെൻ്റ് എക്സ്ചേഞ്ച് വഴി മാത്രമേ നിയമനം നടത്താൻ കഴിയൂ എന്ന ഹൈക്കോടതി ഉത്തരവ് പാലിക്കാതെയാണ് ബോർഡിലെ ഈ ചട്ടലംഘനം.

കോന്നി മെഡിക്കൽ കോളേജിൽ എക്സ്-റേ മാറി നൽകിയതിൽ നടപടി. റേഡിയോളജി വിഭാഗത്തിലെ താൽക്കാലിക ജീവനക്കാരനെ സസ്പെൻഡ് ചെയ്തു. സൂപ്രണ്ട് നടത്തിയ അന്വേഷണത്തിൽ വീഴ്ച കണ്ടെത്തിയതിനെ തുടർന്നാണ് നടപടി. എക്സ്-റേ മാറി നൽകിയിട്ടും അത് മനസിലാകാതെ 16കാരിയെ ചികിത്സിച്ച പൾമനോളജി വിഭാഗം ഡോക്ടർക്ക് താക്കീതും നൽകിയിട്ടുണ്ട്.

മെസ്സി വിവാദത്തിൽ മത്സരത്തിനായി ദുരന്തനിവാരണ ഫണ്ടും വിനിയോഗിക്കാൻ തീരുമാനിച്ചതിൻ്റെ രേഖകൾ കണ്ടെടുത്ത് എസ്ഐടി. 2025 ഒക്ടോബർ 17ന് ചേർന്ന യോഗത്തിലാണ് ഇത് സംബന്ധിച്ച തീരുമാനം എടുത്തത്. എറണാകുളം ജില്ലാ കളക്ടറാണ് ഫണ്ട് ലഭ്യമെന്ന് യോഗത്തെ അറിയിച്ചത്. സിഎസ്ആർ, സ്പോൺസർഷിപ്പ് എന്നിവക്കൊപ്പമാണ് ഈ ഫണ്ടിന്റെ കാര്യവും അറിയിച്ചത്. യോഗത്തിൻ്റെ മിനുട്സിൽ കായിക വകുപ്പ് സെക്രട്ടറി ഇക്കാര്യം രേഖപ്പെടുത്തിയിട്ടുണ്ട്. മത്സര നടത്തിപ്പിന് ഖജനാവിൽ നിന്ന് ഒരു പൈസ പോലും ചിലവാക്കില്ലെന്നായിരുന്നു സർക്കാരിൻ്റെ അവകാശവാദം.

കൊച്ചി മെട്രോ റെയിൽ ലിമിറ്റഡിലെ ഉദ്യോഗസ്ഥരുടെ വിദേശ യാത്രകളിൽ ചോദ്യങ്ങളുമായി സംസ്ഥാന ഗതാഗത വകുപ്പ്. കഴിഞ്ഞ അഞ്ച് വർഷം മെട്രോ എംഡിയും ജീവനക്കാരും നടത്തിയ വിദേശ യാത്രാചെലവിൻ്റെ കണക്കുകൾ വകുപ്പ് ആവശ്യപ്പെട്ടു. സർക്കാർ അനുമതി ഇല്ലാതെ മുൻ എംഡി ലോക്നാഥ് ബെഹ്റ നടത്തിയ വിദേശയാത്രയുടെ പശ്ചാത്തലത്തിലാണ് ഗതാഗത വകുപ്പ് റിപ്പോർട്ട് തേടിയത്.

അടൂരിലെ ദളിത്‌ യുവാവിൻ്റെ മർദന പരാതിയിൽ പൊലീസുകാർ കുറ്റക്കാരെന്ന് വകുപ്പുതല അന്വേഷണ റിപ്പോർട്ട്. നടപടിക്ക് ശുപാർശ ചെയ്ത് പത്തനംതിട്ട എസ്പി. ഐജിക്ക് റിപ്പോർട്ട്‌ കൈമാറി. പോക്സോ കേസിൽ പ്രതിയായ സഹോദരനെ അന്വേഷിച്ച് എത്തിയ പൊലീസുകാർ, കാറിൽ കയറ്റി കൊണ്ടുപോയി മർദിച്ചു എന്നായിരുന്നു 23കാരൻ്റെ പരാതി.

സന്നിധാനത്ത് അരവണ പ്രതിസന്ധി തുടരുന്നു. ഒരാൾക്ക് ഒരു അരവണ മാത്രം നൽകുന്നതിൽ പ്രതിഷേധത്തിലാണ് ഭക്തർ. അരവണ പ്ലാന്റിൻ്റെ നിർമാണം നടക്കുന്നതിനാൽ അരവണ ഉത്പാദനം നടക്കുന്നില്ല. ദേവസ്വം ബോർഡിൻ്റെ വീഴ്ചയെന്നാണ് ആക്ഷേപം.

അബ്കാരി കേസിൽ റിപ്പോർട്ടർ ടിവി എം.ഡി ആൻ്റോ അഗസ്റ്റിനെ എക്സൈസ് ചോദ്യം ചെയ്യുന്നു. ചോദ്യം ചെയ്യലിനോട് ആൻ്റോ അഗസ്റ്റിൻ സഹകരിക്കുന്നുണ്ടെന്ന് എക്സൈസ് സംഘം അറിയിച്ചു. മദ്യവുമായി ബന്ധപ്പെട്ട ചോദ്യത്തോട് അറിയില്ലെന്നാണ് ആൻ്റോയുടെ മറുപടി. വീട് ആന്റോയുടെ പേരിൽ ആണെന്ന് തെളിയിക്കാനാണ് അന്വേഷണ ഉദ്യോഗസ്ഥരുടെ ശ്രമം. ആൻ്റോയുടെ കസ്റ്റഡി കാലാവസ്ഥി ഇന്ന് ഉച്ചക്ക് പന്ത്രണ്ട് മണിക്ക് അവസാനിക്കും.

മന്ത്രി കെ.എം. ഷാജിയുടെ ആഡംബര വാഹന ഉപയോഗത്തിൽ മുസ്ലീം ലീഗിൽ അതൃപ്തി. വാഹനം തിരിച്ചേൽപ്പിച്ചിട്ടും മന്ത്രി വെല്ലുവിളി നടത്തുന്നത് ശരിയല്ലെന്നും അഭിപ്രായം. ഷാജി നിരന്തരം പാർട്ടിയെ പ്രതിസന്ധിയിലാക്കുന്നതായും വിമർശനം. സുഹൃത്തുക്കളുടെ വാഹനം ഇനിയും ഉപയോഗിക്കുമെന്ന വെല്ലുവിളി ശരിയല്ലെന്നും നേതാക്കൾ.

മലബാർ മിൽമ യൂണിയൻ പിരിച്ചു വിട്ടതിൽ ദുരൂഹതയെന്ന ആരോപണവുമായി മുൻ ചെയർമാൻ കെ.എസ്. മണി. മലബാർ മേഖലാ യൂണിയൻ പിരിച്ചുവിട്ടത് 29 വർഷം ഭരിച്ച കോൺഗ്രസ് ഭരണസമിതിക്കെതിരെ അന്വേഷണം ആവശ്യപ്പെട്ട് കത്തയച്ചപ്പോഴെന്ന് മുൻ ചെയർമാൻ. ചെയർമാൻ നൽകിയ കത്ത് ന്യൂസ് മലയാളത്തിന്. ഭരണസമിതി പിരിച്ചുവിട്ടതോടെ ക്രമക്കേടുകൾ പുറത്തുവരുന്നതിലും ആശങ്ക.

പശ്ചിമ ബംഗാളിൽ വീണ്ടും നാടകീയ രംഗങ്ങൾ. റെജിനഗറിലെ സ്ഥാനാർഥിയും അറസ്റ്റിൽ. കഴിഞ്ഞ നിയമസഭ തെരെഞ്ഞെടുപ്പു കാലത്തെ സംഘർഷവുമായി ബന്ധപ്പെട്ടാണ് സ്വതന്ത്ര സ്ഥാനാർഥി സൈഫുൽ ഇസ്ലാം മൊണ്ടൽ അറസ്റ്റിലായത്.

മെസി വിവാദത്തിൽ ആൻ്റോ അഗസ്റ്റിൻ ജിഎസ്‍ടി എസ്ഐടിക്ക് നൽകിയ മൊഴി പുറത്ത്. മെസിയെ കൊണ്ടുവരാൻ എല്ലാ തീരുമാനങ്ങളും എടുത്തത് മുൻ സംസ്ഥാന സർക്കാരെന്ന് ആൻ്റോ. കേരളത്തിൽ വരാൻ അർജൻ്റീന സമ്മതിച്ചെന്ന് പറഞ്ഞതും സ്പോൺസറാകാൻ താല്പര്യമുണ്ടോ എന്ന് ചോദിച്ചതും സർക്കാരാണ്. അന്നത്തെ കായിക മന്ത്രി സ്പെയിനിൽ പോയി എഎഫ്എ പ്രതിനിധികളെ കണ്ട് എല്ലാം തീരുമാനിച്ചിരുന്നു. സർക്കാരിന് വേണ്ടി പണം ചെലവാക്കാൻ തീരുമാനിച്ചത് സൽപ്പേരിന് വേണ്ടിയെന്നും ആൻ്റോയുടെ മൊഴി.

ദേശീയപാത 66ൽ വീണ്ടും ഗുരുതര നിയമലംഘനം. കെഎസ്ആർടിസി ബസ് 100 മീറ്ററിലധികം പുറകോട്ടെടുത്തു. എക്സിറ്റ് മിസ് ആയതിനെ തുടർന്ന് സർവീസ് റോഡിലേക്ക് പ്രവേശിക്കാനാണ് പുറകോട്ട് എടുത്തത്. മലപ്പുറം കക്കാട് വച്ചാണ് സംഭവം.

എം പരിവാഹൻ സൈറ്റ് തകരാറിലായതോടെ അതിർത്തി ചെക്ക് പോസ്റ്റുകളിൽ നിരവധി വാഹനങ്ങൾ കുടുങ്ങിക്കിടക്കുന്നു. വിനോദയാത്രയ്ക്കായി പോയ ആയിരക്കണക്കിന് സഞ്ചാരികളാണ് കുടുങ്ങിക്കിടക്കുന്നത്. സ്പെഷ്യൽ പെർമിറ്റ് സൈറ്റിൽ നിന്ന് ലഭിക്കാത്തതാണ് പ്രതിസന്ധിക്ക് കാരണം.

ഏഷ്യൻ ഗെയിംസിൽ ചരിത്രമെഴുതി കോഴിക്കോട് സ്വദേശി വിദർശ കെ വിനോദ്. ഷൂട്ടിങ്ങിൽ മെഡൽ നേടുന്ന ആദ്യ മലയാളിയെന്ന നേട്ടത്തോടെയാണ് വിദർശ വെള്ളി മെഡൽ സ്വന്തമാക്കിയത്. 10 മീറ്റർ എയർ റൈഫിൾ ടീം ഇനത്തിലാണ് നേട്ടം. മെഡൽ നേട്ടത്തിൽ സന്തോഷമെന്നും അഭിമാനമെന്നും വിദർശ.

വിദർശയ്ക്ക് മെഡൽ നേടാൻ കഴിഞ്ഞതിൽ സന്തോഷം എന്ന് കുടുംബം. കോഴിക്കോട് സ്വദേശികളായ വിനോദ്-അനിത ദമ്പതികളുടെ മകളാണ് വിദർശ.

മുസ്ലീം ലീഗിനേയും സർക്കാരിനേയും കടന്നാക്രമിച്ച് പി. ജയരാജൻ. മുസ്ലീം ലീഗ്, മുസ്ലീം ബിജെപിയായി മാറുന്നു. ആർഎസ്എസിന് വെടിമരുന്ന് ഉണ്ടാക്കാനുള്ള സമയമാണ് സതീശൻ- കുഞ്ഞാലിക്കുട്ടി ഭരണകാലമെന്നും വിമർശനം. മാധ്യമങ്ങൾ ഇപ്പോൾ തന്നെ പൊക്കിപ്പിടിച്ച് നടക്കുന്നുവെങ്കിലും പിന്നീട് താഴ്ത്തിക്കെട്ടുമെന്ന് അറിയാം. സെക്രട്ടേറിയറ്റിൽ എത്താൻ വൈകിയെന്ന തോന്നൽ തനിക്ക് ഇല്ലെന്നും പി. ജയരാജൻ.

കാസർഗോഡ് ഉപ്പള ബേക്കൂർ ഹയർ സെക്കൻ്ററി സ്കൂളിൽ വീണ്ടും ക്രൂരമായ റാഗിംഗ്. 14 സീനിയർ വിദ്യാർഥികൾക്കെതിരെ കേസ്. സീനിയർ വിദ്യാർഥികളായ നാല് പേരെ സ്കൂളിൽ നിന്ന് സസ്പെൻഡ് ചെയ്തു. ഷൂ ധരിച്ച് വന്നതിനും ഷർട്ടിൻ്റെ മുകളിലെ ബട്ടൺസ് അഴിച്ചിട്ടതിനുമായിരുന്നു മർദനം.

സെൽഫി എടുക്കുന്നതിനിടെ കാൽവഴുതി വീണ് യുവാവിന് ദാരുണാന്ത്യം. ഇടുക്കി ചേലച്ചുവട് പാൽക്കുളംമെട്ടിലാണ് അപകടം. ആൽബിൻ ദേവസ്യ എന്ന യുവാവാണ് മരിച്ചത്. സുഹൃത്തുക്കൾക്കൊപ്പം പാറക്കെട്ടിൽ നിന്ന് സെൽഫി എടുക്കുന്നതിനിടയിലാണ് അപകടം.

ഇന്ന് പതിനൊന്നരയ്ക്ക് ഗൗരവമുള്ള കാര്യം പറയുമെന്ന് പ്രഖ്യാപിച്ച തദ്ദേശ മന്ത്രി കെ.എം. ഷാജി എഫ്ബിയിൽ ഇട്ടത് മാലിന്യത്തെ കുറിച്ചുള്ള പോസ്റ്റ്. മാലിന്യപ്രശ്നം അതീവ ഗുരുതരമാണെന്നും വിവിധ വകുപ്പുകളെ ഏകോപിപ്പിച്ച് സമഗ്ര പദ്ധതി ആലോചിക്കുന്നുണ്ടെന്നും ഷാജി കുറിച്ചു. റേഞ്ച് റോവർ കാർ ഉപയോഗത്തെ കുറിച്ചുള്ള വിവാദം കത്തി നിൽക്കെ, അതുമായി ബന്ധപ്പെട്ട പ്രതികരണം വരും എന്നാണ് പ്രതീക്ഷിച്ചത്. എന്നാൽ ശുചിത്വ മിഷൻ്റെ പരിപാടിക്ക് ലോഗോ ക്ഷണിച്ച് മത്സരം സംഘടിപ്പിക്കും എന്നാണ് പോസ്റ്റിൽ പറയുന്നത്.

ശബരിമലയിലെ അരവണ പ്രതിസന്ധിയിൽ ദേവസ്വം ബോർഡിനെ കുറ്റപ്പെടുത്തി മന്ത്രി കെ. മുരളീധരൻ. ഇക്കാര്യത്തിൽ ബോർഡിന് വീഴ്ച സംഭവിച്ചു. തീർഥാടന കാലത്ത് പ്ലാന്റിൻ്റെ അറ്റക്കുറ്റപ്പണി നടത്താറില്ലെന്നും മന്ത്രി.

മിൽമ മലബാർ യൂണിയനിലെ ക്രമക്കേടിൽ സമഗ്ര അന്വേഷണത്തിന് ക്ഷീര വികസന വകുപ്പ്. അന്വേഷണത്തിന് നാലംഗ പ്രത്യേക സംഘത്തെ ഉടൻ പ്രഖ്യാപിക്കും. ഡെപ്യൂട്ടി ഡയറക്ടറോ അഡീഷണൽ ഡയറക്ടറോ ആയിരിക്കും സംഘത്തെ നയിക്കുക. അന്വേഷണ റിപ്പോർട്ട് വിജിലൻസിന് കൈമാറിയേക്കും. മുൻ ചെയർമാൻ രാഷ്ട്രീയ ആരോപണങ്ങൾ ഉന്നയിച്ചതിന് പിന്നാലെയാണ് സർക്കാർ നീക്കം.

കോൺഗ്രസ് സർക്കാറിന് വേണമെങ്കിൽ ഉപദേശം നൽകാൻ തയ്യാറെന്ന് മുതിർന്ന നേതാവ് കെ.വി. തോമസ്. താൻ ഇപ്പോഴും കോൺഗ്രസുകാരനാണ്. സോണിയ ഗാന്ധി പേഴ്സണലായി വിളിച്ചെങ്കിലും പാർട്ടിയിലേക്ക് തിരികെ വരണമെന്ന് ആവശ്യപ്പെട്ടിട്ടില്ല. പക്ഷെ ഇപ്പോൾ ഇടതുപക്ഷ പ്രസ്ഥാനങ്ങളോടൊപ്പം നിൽക്കാനാണ് തീരുമാനിച്ചിരിക്കുന്നതെന്നും കെ.വി. തോമസ് ന്യൂസ് മലയാളത്തോട് പറഞ്ഞു.

കേരളത്തിലെ വിവിധ പിഎസ്സി റാങ്ക് ലിസ്റ്റുകളിൽ ഉൾപ്പെട്ടവരെയും പരീക്ഷകൾക്ക് തയ്യാറെടുക്കുന്നവരെയും ഉൾപ്പെടുത്തി 'ഓൾ കേരള പിഎസ്സി അസോസിയേഷൻ' രൂപീകരിച്ചു. തിരുവനന്തപുരം കനകക്കുന്നിൽ ചേർന്ന അസോസിയേഷൻ്റെ ആദ്യ യോഗത്തിൽ പതിനഞ്ചോളം വിവിധ റാങ്ക് ലിസ്റ്റുകളിലെ ഉദ്യോഗാർഥികൾ പങ്കെടുത്തു. റാങ്ക് ലിസ്റ്റുകളിൽ നിന്ന് കുറഞ്ഞത് 70 ശതമാനം ആളുകളുടെയെങ്കിലും നിയമനം നടത്താൻ സർക്കാർ തയ്യാറാകണമെന്നും വകുപ്പുകളിലെ ഒഴിവുകൾ പിടിച്ചുവെക്കാതെ 24 മണിക്കൂറിനുള്ളിൽ തന്നെ റിപ്പോർട്ട് ചെയ്യാൻ നടപടിയെടുക്കണമെന്നും അസോസിയേഷൻ' സർക്കാരിനോട് ആവശ്യപ്പെട്ടു.

സംസ്ഥാനത്ത് ഇന്ന് വ്യാപക മഴയ്ക്ക് സാധ്യത. ഇന്ന് ഏഴ് ജില്ലകളിൽ യെല്ലോ അലേർട്ട് പ്രഖ്യാപിച്ചു. ഉച്ചയോടെ നാല് ജില്ലകളിൽ കൂടി യെല്ലോ അലേർട്ട് പ്രഖ്യാപിച്ചു. നാളെ മുതൽ 23 വരെ മഴ മുന്നറിയിപ്പ് ഇല്ല.

കേരള സർവകലാശാലയിൽ വിദ്യാർഥി രാഷ്ട്രീയം നിരോധിക്കാനുള്ള നീക്കം സർക്കാർ അംഗീകരിക്കില്ലെന്ന് യുവജനകാര്യ മന്ത്രി ഒ.ജെ. ജനീഷ്. സിൻഡിക്കേറ്റ് അംഗങ്ങൾ പോലും അറിയാതെയാണ് സർവകലാശാലയുടെ തീരുമാനം. സിൻഡിക്കേറ്റിൻ്റെ തീരുമാനത്തിന് വിരുദ്ധമായാണ് കരട് രേഖ. വിദ്യാർഥി രാഷ്ട്രീയം തെറ്റായ കാര്യമാണ് എന്ന് വിശ്വസിക്കുന്നില്ലെന്നും മന്ത്രി പറഞ്ഞു.

അബ്കാരി കേസിൽ റിപ്പോർട്ടർ ടിവി എംഡി ആൻ്റോ അഗസ്റ്റിൻ വീണ്ടും റിമാൻഡിൽ. കസ്റ്റഡി കാലാവധി അവസാനിച്ചതോടെയാണ് വീണ്ടും മാനന്തവാടി ജില്ലാ ജയിലിലേക്ക് അയച്ചത്. വീട്ടിൽ അടക്കം തെളിവെടുപ്പ് പൂർത്തിയാക്കയതിന് ശേഷം ആണ് ആൻ്റോയെ ഇന്ന് സുൽത്താൻ ബത്തേരി മജിസ്ട്രേറ്റിന്റെ വീട്ടിൽ ഹാജരാക്കിയത്. ചൊവ്വാഴ്ച ഹൈക്കോടതി ആന്റോ ആഗസ്റ്റിന്റെ ജാമ്യാപേക്ഷ പരിഗണിക്കും. നടപടികൾ നടക്കട്ടെ എന്നും തനിക്ക് കാര്യങ്ങൾ പറയാൻ ഉണ്ടെന്നും ആന്റോ പറഞ്ഞു.

തിരുവനന്തപുരം ബാലരാമപുരത്ത് അഞ്ച് വയസുകാരൻ കിണറ്റിൽ വീണ് മരിച്ചതിൽ ദുരൂഹത നീങ്ങുന്നു. കുട്ടി കിണറിൻ്റെ ആൾമറയിൽ നിൽക്കുന്ന സിസിടിവി ദൃശ്യങ്ങൾ പുറത്ത് വന്നു. കോട്ടുകാൽകോണം സ്വദേശി ദിലീപ് - ശ്രുതി ദമ്പതികളുടെ മകൻ ദീപക് ആണ് മരിച്ചത്. മാതാപിതാക്കളുടെയും നാട്ടുകാരുടെയും മൊഴി പൊലീസ് രേഖപ്പെടുത്തും.

കെഎസ്‌യു ജില്ലാ പ്രസിഡൻ്റിനെതിരായ പൊലീസ് നടപടിക്കെതിരെ ആഭ്യന്തര മന്ത്രിക്ക് പരാതി നൽകി കോൺഗ്രസ്. സുഹൃത്തിനെ സഹായിക്കാനാണ് കുന്നംകുളം പൊലീസ് സ്റ്റേഷനിൽ ഗോകുൽ എത്തിയത്. ചില പൊലീസുകാർ സ്ഥാപിത താല്പര്യങ്ങൾക്ക് വേണ്ടി ഗോകുലിനെ മനഃപൂർവം കയ്യേറ്റം ചെയ്തെന്നും കേസ് രജിസ്റ്റർ ചെയ്തെന്നും പരാതിയിൽ. ആഭ്യന്തരമന്ത്രി വിഷയത്തിൽ ഇടപെട്ട് അന്വേഷണം നടത്തുമെന്ന് ഉറപ്പു നൽകിയിട്ടുണ്ടെന്ന് ഡിസിസി പ്രസിഡൻ്റ് അഡ്വ. ജോസഫ് ടാജറ്റ് പറഞ്ഞു.

കേരള സർവകലാശാലയിൽ വിദ്യാർഥി രാഷ്ട്രീയം നിരോധിക്കാനുള്ള നീക്കം അംഗീകരിക്കല്ലെന്ന് ഇടത് സിൻഡിക്കേറ്റ് അംഗങ്ങൾ. വിദ്യാർഥികൾക്ക് രാഷ്ട്രീയം പാടില്ലെന്ന് പറയുന്നവർക്ക് സങ്കുചിത താത്പര്യം. രാഷ്ട്രീയക്കാർ യൂണിവേഴ്സിറ്റിയിലേക്ക് വരരുത് എന്ന് പറയുന്നവർ പോലും രാഷ്ട്രീയ നിയമനമാണ് നേടിയതെന്നും ഇടത് സിൻഡിക്കേറ്റ് അംഗങ്ങൾ ചൂണ്ടിക്കാട്ടി.

വയനാട് അമ്പലവയലിൽ പുലിയെ ചത്ത നിലയിൽ കണ്ടെത്തി. വികാസ് നഗറിന് സമീപം സ്വകാര്യ പറമ്പിലാണ്. കുരുക്കിൽ കുടുങ്ങി ചത്ത നിലയിലാണ് പുലിയെ കണ്ടെത്തിയത്.

ഇടുക്കി ജില്ലയിലെ കൃഷിയിടങ്ങളെയും തോട്ടം മേഖലയെയും ജനവാസമേഖലയെയും ഇഎസ്എ പരിധിയിൽ നിന്ന് ഒഴിവാക്കണമെന്ന പ്രമേയം പാസാക്കി. ഗ്രാമസഭ അസോസിയേഷൻ ചേർന്നാണ് പ്രമേയം പാസാക്കിയത്. ഈ മാസം അവസാനം അന്തിമ വിജ്ഞാപനം വന്നേക്കും.

സബ്ജക്ട് മിനിമം ഒഴിവാക്കിയത് പൊതുവിദ്യാഭ്യാസത്തെ പിന്നോട്ട് അടിക്കുന്ന തീരുമാനമെന്ന് മുൻ വിദ്യാഭ്യാസമന്ത്രി വി. ശിവൻകുട്ടി. സർക്കാർ ചെയ്തത് അക്കാദമിക് പഠനവും ചർച്ചയും ഇല്ലാതെ നടപ്പിലാക്കിയ തീരുമാനം. വിദ്യാർഥികളുടെ ഭാവി വച്ച് സർക്കാർ പന്താടുകയാണ്. നടപടി അടിയന്തരമായി സർക്കാർ പുനഃപരിശോധിക്കണമെന്നും വി. ശിവൻകുട്ടി ആവശ്യപ്പെട്ടു.

പ്രമുഖ ഹൃദ്രോഗ വിദഗ്ധൻ ഡോക്ടർ ജി. വിജയരാഘവൻ അന്തരിച്ചു. തിരുവനന്തപുരത്ത് കിംസ് ആശുപത്രിയിൽ ആയിരുന്നു അന്ത്യം. കിംസ് ആശുപത്രി വൈസ് ചെയർമാൻ ആയിരുന്നു. രാജ്യം പത്മശ്രീ നൽകി ആദരിച്ചിട്ടുണ്ട്.

ക്യാൻസർ ബാധിച്ച് ചികിത്സയിലായിരുന്ന രേണു സുധിയുടെ നില ഗുരുതരം. അഞ്ച് കീമോതെറാപ്പികൾക്ക് ശേഷം ആരോ​ഗ്യ നില വഷളായതിനാൽ ഇനിയൊരു കീമോ ചെയ്യാനാകില്ലെന്ന് ഡോക്ടർമാർ വ്യക്തമാക്കി. രേണുവിൻ്റെ സുഹൃത്ത് ശാരികയാണ് സോഷ്യൽ മീഡിയയിലൂടെ ഇക്കാര്യം വ്യക്തമാക്കിയത്. രേണുവിൻ്റെ അവസ്ഥ വളരെ മോശമാണെന്ന് സഹോദരി വിളിച്ചറിയിച്ചു. യാഥാർഥ്യം മിക്കപ്പോഴും ഇത്തിരി കയ്പ്പുള്ളതായിരിക്കും. കയ്പ്പുള്ള യാഥാർഥ്യം നിങ്ങളോട് പറയേണ്ടി വരികയാണ് എന്നും ശാരിക സോഷ്യൽ മീഡിയയിൽ പങ്കുവച്ച വീഡിയോയിൽ പറയുന്നു.

മലപ്പുറം കാടാമ്പുഴയിൽ 100 കിലോയോളം ചന്ദനത്തടി പിടികൂടി. കമ്പിവളപ്പിലെ സ്വകാര്യവ്യക്തിയുടെ പറമ്പിൽ നിന്ന് മുറിച്ചു കടത്താൻ ശ്രമിച്ച ചന്ദനത്തടിയാണ് പിടികൂടിയത്. മുജീബ് റഹ്മാൻ, അബ്ദുൽസലാം എന്നിവരെ വനം വകുപ്പ് ഉദ്യോഗസ്ഥർ പിടികൂടി.

ആൻ്റോ അഗസ്റ്റിൻ ജിഎസ്ടി വകുപ്പിന് നൽകിയ വിലാസം വയനാട് വാഴവറ്റയിലെ വീടിന്റേത്. മെസി വിവാദവുമായി ബന്ധപ്പെട്ട് കഴിഞ്ഞ മാസം മൂന്നിന് കാഞ്ഞങ്ങാട് ജിഎസ്ടി ഓഫീസിൽ നൽകിയ മൊഴിയിലാണ് വാഴവറ്റയിലെ വിലാസം രേഖപ്പെടുത്തിയിട്ടുള്ളത്. അനധികൃത മദ്യശേഖരം കണ്ടെത്തിയ വാഴവറ്റയിലെ വീട് തന്റേതല്ല എന്നാണ് ആൻ്റോ എക്സൈസ് കേസിൽ കോടതിയിൽ വാദിച്ചത്.

സംസ്ഥാനത്ത് മഴ കനക്കുന്നു. അടുത്ത മൂന്ന് മണിക്കൂർ നേരത്തേക്ക് ഇടുക്കി കോട്ടയം ജില്ലകളിൽ ഇന്ന് ഓറഞ്ച് അലേർട്ട് പ്രഖ്യാപിച്ചു. ഇവിടെ തീവ്ര മഴയ്ക്ക് സാധ്യതയുണ്ട്.മണിക്കൂറിൽ നാൽപ്പത് കിലോമീറ്റർ വേഗത്തിൽ ശക്തമായ കാറ്റ് വീശാനും സാധ്യതയുണ്ട്. 5 ജില്ലകളിലാണ് കാലാവസ്ഥാ കേന്ദ്രം ഇന്ന് മഞ്ഞ അലേർട്ട് പ്രഖ്യാപിച്ചത്. തിരുവനന്തപുരം, പത്തനംതിട്ട, എറണാകുളം, വയനാട്, കണ്ണൂർ ജില്ലകളിലാണ് മഴ മുന്നറിയിപ്പ്.ബംഗാൾ ഉൾക്കടലിലെ ന്യൂനമർദത്തിന്‍റെ സ്വാധീനഫലമായി സംസ്ഥാനത്ത് ഒറ്റപ്പെട്ട ശക്തമായ മഴ തുടരും.ഇടിമിന്നലിനും സാധ്യതയുണ്ട്.