കേന്ദ്ര ആഭ്യന്തര മന്ത്രി അമിത് ഷാ രാജിവയ്ക്കണമെന്ന് പ്രതിപക്ഷ നേതാവ് രാഹുൽ ഗാന്ധി. ഡൽഹിയിലെ പൊലീസ് നടപടിയിൽ പ്രസ്താവനയ്ക്കോ, അന്വേഷണത്തിന് ഉത്തരവിടാനോ അമിത് ഷാ തയ്യാറായില്ലെന്നും രാഹുൽ വിമർശിച്ചു. കേന്ദ്ര ആഭ്യന്തര മന്ത്രി പാർലമെൻ്റിലും എത്തിയില്ല. പ്രതിപക്ഷത്തിൻ്റെ അടിയന്തര പ്രമേയത്തിന് അനുമതി നിഷേധിച്ചു. മോദി സർക്കാറിൽ അധികാരം കേന്ദ്രീകരിച്ചിരിക്കുന്നത് രണ്ട് പേരിലേക്കാണ്. മോദിയുടെയും അമിത് ഷായുടെയും അനുമതിയില്ലാതെ ഒന്നും നടക്കില്ല. നിലവിൽ പ്രധാനമന്ത്രിയുടെ പ്രതിച്ഛായ തകർന്നു. അത് ഇനി വീണ്ടെടുക്കാനാകില്ലെന്നും രാഹുൽ ഗാന്ധി വിമർശിച്ചു.
കണ്ണൂർ വിമാനത്താവളത്തിൽ യാത്രക്കാരുടെ പ്രതിഷേധം. തിരുവനന്തപുരത്തേക്കുള്ള എയർ ഇന്ത്യ എക്സ്പ്രസ് വിമാനം വൈകുന്നതിനെ തുടർന്നാണ് യാത്രക്കാർ പ്രതിഷേധിക്കുന്നത്. വിമാനങ്ങൾ വൈകുന്നത് സംബന്ധിച്ച് അറിയിപ്പ് നൽകിയില്ലെന്ന് യാത്രക്കാർ പരാതിപ്പെട്ടു. അതേസമയം, അറിയിപ്പ് നൽകിയിരുന്നുവെന്ന് എയർ ഇന്ത്യ എക്സ്പ്രസ് അധികൃതർ വ്യക്തമാക്കി. രാവിലെ 7.05ന് പുറപ്പെടേണ്ട തിരുവനന്തപുരം വിമാനം പുറപ്പെടുക ഉച്ചക്ക് 1.30ന് ആയിരിക്കും. കണ്ണൂർ-ദുബായ് വിമാനം റദ്ദാക്കിയതിലും യാത്രക്കാർ പ്രതിഷേധിച്ചു.
ആഭ്യന്തര മന്ത്രി രമേശ് ചെന്നിത്തല മുതലപ്പൊഴിയിൽ കാണാതായ ജോണിൻ്റെ വീട്ടിലെത്തി. ജോണിനെ കാണാതായി പതിനൊന്നാം ദിവസമാണ് ആഭ്യന്തര മന്ത്രി ഈ വീട്ടിലെത്തുന്നത്. ജോണിൻ്റെ മക്കൾ പരാതി അറിയിക്കുന്നു.
കാണാതായ മത്സ്യത്തൊഴിലാളി ജോണിൻ്റെ കുടുംബത്തിൻ്റെ വിഷമം ഉൾക്കൊള്ളുന്നുവെന്നും വേദനകളിൽ പങ്ക് ചേരുന്നുവെന്നും ആഭ്യന്തര മന്ത്രി രമേശ് ചെന്നിത്തല. കുടുംബത്തിന് നഷ്ടമായത് ഏറെ പ്രിയപ്പെട്ടതാണ്. പ്രതീക്ഷ നഷ്ടപ്പെടാതെ തിരച്ചിൽ നടക്കുന്നുണ്ട്. കടൽ പരിചയമുള്ള പ്രാദേശിക മത്സ്യത്തൊഴിലാളികളെ ചേർത്ത് തിരച്ചിൽ നടത്തുമെന്നും ചെന്നിത്തല പറഞ്ഞു.
രാജേഷിന്റെ മൃതദേഹത്തോടുള്ള അനാദരവ് കാണിച്ച സംഭവത്തിൽ ചെറുപുഴ പഞ്ചായത്ത് ഓഫീസിലേക്ക് ഡിവൈഎഫ്ഐ മാർച്ച്. ആംബുലൻസിന് പണം ആവശ്യപ്പെട്ട പഞ്ചായത്ത് അംഗം രാജിവയ്ക്കണം എന്ന് ആവശ്യപ്പെട്ടായിരുന്നു പ്രതിഷേധം. പ്രവർത്തകർ പഞ്ചായത്ത് ഓഫീസിലേക്ക് ഓടിക്കയറി.
പ്രതിപക്ഷ ഉപനേതാവിന്റെ മുറിയുമായി ബന്ധപ്പെട്ട വിവാദത്തിൽ സ്പീക്കർക്കെതിരെ സിപിഐഎം നേതാവ് കെ.എൻ.ബാലഗോപാൽ. സ്പീക്കറുടെ പരാമർശം അനുചിതമെന്ന് ബാലഗോപാൽ പറഞ്ഞു. മുറി ആവശ്യപ്പെട്ട് സ്പീക്കർക്ക് കത്തോ അഭ്യർത്ഥനയോ നടത്തിയിട്ടില്ല. അടിസ്ഥാനരഹിതമായ വിവാദങ്ങൾ സൃഷ്ടിക്കുന്നത് ആ പദവിയുടെ അന്തസിന് നിരക്കുന്നതല്ലെന്നും ബാലഗോപാൽ കുറ്റപ്പെടുത്തി.