വിജയവാഡ: ശ്രീ കാകുകളത്തെ ശ്രീ വെങ്കിടേശ്വര സ്വാമി ക്ഷേത്രത്തില് തിരക്കിനിടെ കുഴഞ്ഞു വീണ ആളുകളെ സഹായിക്കാന് മറ്റു വിശ്വാസികളും ഓടിയെത്തുന്നതിന്റെ വീഡിയോ പുറത്ത്. തിക്കിലും തിരക്കിലും പെട്ടുണ്ടായ ആള്ക്കൂട്ട ദുരന്തത്തില് 12 പേരാണ് മരിച്ചത്. നിരവധി പേര്ക്ക് പരിക്കേല്ക്കുകയും ചെയ്തിട്ടുണ്ട്.
പുറത്തുവന്ന അപകടത്തിന്റെ വീഡിയോയില് കുഴഞ്ഞു വീണവര്ക്ക് സിപിആര് നല്കുന്നതിനായി ആളുകള് ഓടിക്കൂടുന്നതും ശ്വാസം എടുക്കാന് ബുദ്ധിമുട്ടനുഭവിക്കുന്നവരെ ആള്ക്കൂട്ടത്തിനിടയില് നിന്ന് പുറത്തെടുക്കാന് ശ്രമിക്കുന്നതും കാണാം.
ഗാസിബുഗ്ഗയില് രാവിലെ 11.30 ഓടെയാണ് അപകടനം സംഭവിച്ചത്. അപകടത്തില് പരിക്കേറ്റവര്ക്ക് മികച്ച ചികിത്സ നല്കുന്നതിനായുള്ള എല്ലാ നിര്ദേശവും നല്കിയിട്ടുണ്ടെന്ന് മുഖ്യമന്ത്രി ചന്ദ്രബാബു നായിഡു പറഞ്ഞു.
ഏകാദശിയുമായി ബന്ധപ്പെട്ട് ക്ഷേത്രത്തില് നടത്തിയ പരിപാടിയിലേക്കാണ് ആളുകളെത്തിയത്. ആളുകള് തിങ്ങി നിറഞ്ഞതോടെ വലിയ അപകടം സംഭവിക്കുകയായിരുന്നു. പരിക്കേറ്റവരെ ഉടന് തന്നെ ആശുപത്രിയിലേക്ക് മാറ്റിയെന്ന് കസിബുഗ്ഗ പൊലീസ് പറഞ്ഞു. അപകടം നടന്ന ഉടന് തന്നെ പൊലീസ് സ്ഥലത്തെത്തി.
മുഖ്യമന്ത്രി ചന്ദ്രബാബു നായിഡു അപകടത്തില് നടുക്കം രേഖപ്പെടുത്തി. മരണങ്ങള് ഹൃദയ ഭേദകമാണെന്നും അദ്ദേഹം പറഞ്ഞു.
'ശ്രീകാകുളം ജില്ലയിലെ വെങ്കടേശ്വര ക്ഷേത്രത്തിലുണ്ടായ അപകടം വലിയ ഞെട്ടലുണ്ടാക്കി. വിശ്വാസികളുടെ മരണം ഹൃദയഭേദകമാണ്. മരിച്ചവരുടെ കുടുംബത്തോട് ദുഃഖം രേഖപ്പെടുത്തുന്നു. പരിക്കേറ്റവര്ക്ക് ചികിത്സ നല്കാന് നിര്ദേശിച്ചിട്ടുണ്ട്,' അദ്ദേഹം പറഞ്ഞു.