പൃഥ്വിരാജ് സുകുമാരന്‍ സംവിധാനം ചെയ്ത മോഹന്‍ലാല്‍ കേന്ദ്ര കഥാപാത്രമായി എത്തിയ സൂപ്പര്‍ ഹിറ്റ് ചിത്രമാണ് എമ്പുരാന്‍. ലൂസിഫറിന്റെ രണ്ടാം ഭാഗമായി എത്തിയ ചിത്രം നിര്‍മിച്ചിരിക്കുന്നത് ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ്. മാര്‍ച്ച് 27ന് തിയേറ്ററില്‍ എത്തിയ ചിത്രം വലിയ വിവാദങ്ങള്‍ക്ക് വഴിയൊരുക്കിയിരുന്നു. റിലീസിന് മുന്‍പും ചിത്രം പ്രതിസന്ധികള്‍ നേരിട്ടിരുന്നു. അതെല്ലാം തന്നെ വലിയ വെല്ലുവിളികളായിരുന്നുവെന്ന് നിര്‍മാതാവ് ആന്റണി പെരുമ്പാവൂര്‍ വ്യക്തമാക്കിയിരിക്കുകയാണ്. മാതൃഭൂമി വാരാന്തപതിപ്പിന് നല്‍കിയ അഭിമുഖത്തിലാണ് ആന്റണി പെരുമ്പാവൂര്‍ ഇതേ കുറിച്ച് തുറന്ന് സംസാരിച്ചത്.

"ഞങ്ങള്‍ക്ക് അദ്ഭുതകരമായ വിജയം സമ്മാനിച്ച ചിത്രമാണ് എമ്പുരാന്‍. അതുകൊണ്ടു തന്നെ എമ്പുരാന് തീര്‍ച്ചയായും തുടര്‍ച്ചയുണ്ടാകും. കഥ അങ്ങനെയാണ് പറഞ്ഞുനിര്‍ത്തിയത്. നിലവില്‍ക്കണ്ട കാഴ്ചകള്‍ പലതും പൂര്‍ത്തിയാക്കാന്‍ മൂന്നാംഭാഗം വന്നേ മതിയാകൂ. പ്രേക്ഷകരും അത് പ്രതീക്ഷിക്കുന്നുണ്ടെന്നാണ് ഞങ്ങള്‍ മനസിലാക്കുന്നത്", ആന്റണി പറഞ്ഞു.

"എമ്പുരാന്റെ റിലീസ് തീയതി പ്രഖ്യാപിക്കപ്പെട്ടതിനു ശേഷമാണ് അതുവരെ ചേര്‍ന്നു പ്രവര്‍ത്തിച്ചവരുമായി ചില ബുദ്ധിമുട്ടുകളുണ്ടാകുന്നത്. സിനിമാജീവിതത്തില്‍ ഏറ്റവുമധികം മാനസികസമ്മര്‍ദത്തിലൂടെ കടന്നു പോയ ദിവസങ്ങളാണ് അത്. സമാനതകളില്ലാത്ത വരവേല്‍പ്പാണ് പലയിടങ്ങളിലും സിനിമയ്ക്കായി ഒരുക്കിയിരുന്നത്. റിലീസ് ഡേറ്റ് മാറ്റി അവരെയെല്ലാം നിരാശപ്പെടുത്താന്‍ പറ്റില്ലായിരുന്നു. മുന്‍കൂട്ടി നിശ്ചയിച്ച ആ ദിവസം മാറിപ്പോയാല്‍ പിന്നീട് അത്തരത്തിലൊരവസരം ലഭിക്കണമെന്നുമില്ല", എന്നും ആന്റണി പെരുമ്പാവൂര്‍.

ALSO READ : മുത്തുവേല്‍ പാണ്ഡ്യന്‍ ഇനി കോഴിക്കോട് എത്തും; 'ജയിലര്‍ 2' ചിത്രീകരണം പുരോഗമിക്കുന്നു

"പ്രശ്‌നങ്ങളുണ്ടായിരുന്നെന്നും നേരിട്ടത് വലിയ വെല്ലുവിളികളായിരുന്നെന്നുമുള്ള സത്യം മറച്ചുവെക്കുന്നില്ല. എന്നാല്‍, ഞങ്ങള്‍ ഒറ്റക്കെട്ടായി പ്രതിസന്ധികളെ മറികടന്നു. ഗോകുലം ഗോപാലന്‍ സാറി നെപ്പോലുള്ളവര്‍ ഈ സിനിമയുടെ വിശേഷങ്ങള്‍ ആദ്യം മുതല്‍ തന്നെ അന്വേഷിച്ചറിഞ്ഞവരാണ്. ലാല്‍സാറുമായി അദ്ദേഹത്തിനെല്ലാം വലിയ അടുപ്പമുണ്ട്. മുന്നോട്ടുള്ള യാത്രയുമായി അവര്‍ സഹക രിക്കാന്‍ തയ്യാറായി. കൃഷ്ണമൂര്‍ത്തിയെപ്പോലുള്ളവര്‍ ഒപ്പം ചേര്‍ന്ന് പ്രവര്‍ത്തിച്ചു", ആന്റണി പെരുമ്പാവൂര്‍ കൂട്ടിച്ചേര്‍ത്തു.


രണ്ട് മാസത്തിനുള്ളില്‍ മോഹന്‍ലാലിന്റെ രണ്ട് സിനിമകള്‍ തിയേറ്ററില്‍ വന്‍ വിജയമായതിനെ കുറിച്ചും ആന്റണി പെരുമ്പാവൂര്‍ സംസാരിച്ചു. എമ്പുരാന് ശേഷം തിയേറ്ററില്‍ എത്തിയ തരുണ്‍ മൂര്‍ത്തി - മോഹന്‍ലാല്‍ ചിത്രവും ബോക്‌സ് ഓഫീസില്‍ വലിയ വിജയമായിരുന്നു. രണ്ട് സിനിമകളുടെയും റിലീസിങ് സ്ട്രാറ്റജി രണ്ട് രീതിയിലായിരുന്നുവെന്നാണ് ആന്റണി പെരുമ്പാവരൂര്‍ പറഞ്ഞത്. "ഒരുമാസംകൊണ്ട് കേരളത്തിലെ തിയേറ്ററുകളില്‍നിന്ന് ലഭിക്കുന്ന കളക്ഷന്‍ പത്തുദിവസംകൊണ്ട് നേടിയെടുക്കാനാണ് എമ്പുരാനിലൂടെ ശ്രമിച്ചത്. എന്നാല്‍ തുടരും സിനിമയുടേത് മറ്റൊരു രീതിയായിരുന്നു. അത് തീര്‍ത്തും ഒരു കുടുംബ ചിത്രമാണ്", എന്നാണ് ആന്റണി പറഞ്ഞത്.

തുടരുവും എമ്പുരാനും രണ്ട് രീതിയിലാണ് പ്രേക്ഷകരിലേക്ക് എത്തിയതെന്നും ആന്റണി പെരുമ്പാവൂര്‍ വ്യക്തമാക്കി. തുടരും കാണാന്‍ പ്രേക്ഷകര്‍ അവരുടെ സൗകര്യത്തിന് വീട്ടില്‍ നിന്നും എത്തുകയായിരുന്നു. എമ്പുരാന്‍ എന്ന സിനിമ എത്രയും പെട്ടന്ന് കണ്ടേ മതിയാകൂ എന്നൊരു പ്രതീതിയാണ് പ്രേക്ഷകരില്‍ ഉണ്ടായിരുന്നത്. അതിനുള്ള അവസരം തങ്ങള്‍ സൃഷ്ടിക്കുകയായിരുന്നുവെന്നും ആന്റണി പെരുമ്പാവൂര്‍ അഭിപ്രായപ്പെട്ടു.