കോൺഗ്രസിന് ഇനി ഭാവിയില്ല, പാർട്ടിയിലെ അതൃപ്തരായ മുഴുവൻ ആളുകളെയും ബിജെപി സ്വാഗതം ചെയ്യും: സി. കൃഷ്ണകുമാർ
കോൺഗ്രസിനുള്ളിലെ ജനാധിപത്യമില്ലായ്മയ്ക്കെതിരെയാണ് സരിൻ മുന്നോട്ട് വന്നിരിക്കുന്നത്
പാലക്കാട് ഉപതെരഞ്ഞെടുപ്പിലെ സ്ഥാനാർഥി നിർണയത്തിൽ അതൃപ്തി പ്രകടിപ്പിച്ച പി. സരിന് പിന്തുണയുമായി ബിജെപി നേതാവ് സി. കൃഷ്ണകുമാർ. കോൺഗ്രസിനുള്ളിലെ ജനാധിപത്യമില്ലായ്മയ്ക്കെതിരെയാണ് സരിൻ മുന്നോട്ട് വന്നിരിക്കുന്നത്. സരിന്റെ നിലപാടിനെ ബിജെപി സ്വാഗതം ചെയ്യുന്നതായി സി. കൃഷ്ണകുമാർ പറഞ്ഞു. കോൺഗ്രസിന് ഇനി ഭാവിയില്ല. സരിനെ മാത്രമല്ല കോൺഗ്രസിലെ അതൃപ്തരായ മുഴുവൻ ആളുകളെയും ബിജെപി സ്വാഗതം ചെയ്യുമെന്നും അദ്ദേഹം വ്യക്തമാക്കി.
കോണ്‍ഗ്രസ് ഹരിയാനയില്‍ തകര്‍ന്നടിഞ്ഞു. ആ തകര്‍ച്ച പാലക്കാടും കേരളത്തിലും ആവര്‍ത്തിക്കാതിരിക്കണമെങ്കില്‍ കോണ്‍ഗ്രസ് നയം മാറ്റണം. എന്നാല്‍ ആ നയം കോണ്‍ഗ്രസ് മാറ്റില്ല. അതുകൊണ്ട് തന്നെയാണ് സരിന്റെ നിലപാടിനെ ബിജെപി സ്വാഗതം ചെയ്യുന്നത്. പാലക്കാട് നിയോജക മണ്ഡലത്തില്‍ സിപിഎം തകര്‍ന്നതാണ്. ആ തകര്‍ന്ന കപ്പലിലേക്ക് സരിന് മാറുമെന്ന് പ്രതീക്ഷിക്കുന്നില്ലെന്നും സി. കൃഷ്ണകുമാര്‍ പറഞ്ഞു.
സരിന് സ്ഥാനാര്‍ഥിത്വം വാഗ്ദാനം ചെയ്ത് ബിജെപി ദേശീയ സെക്രട്ടറി അരവിന്ദ് മേനോനും സരിനുമായി ബന്ധപ്പെട്ടിരുന്നു. ഇന്ന് തന്നെ തീരുമാനം എടുക്കണമെന്നാണ് അരവിന്ദ് മേനോന്‍ സരിനോട് ആവശ്യപ്പെട്ടത്.
അതേസമയം സരിന് പിന്തുണ നല്‍കാന്‍ സിപിഎം ജില്ലാ സെക്രട്ടറിയേറ്റും മുന്നോട്ട് വന്നു. സരിന്റെ നീക്കങ്ങള്‍ക്ക് പിന്തുണ നല്‍കാനാണ് പാര്‍ട്ടിയുടെ തീരുമാനം. സരിനെ സ്ഥാനാര്‍ഥിയാക്കുന്നത് ഗുണം ചെയ്യുമെന്നും പാര്‍ട്ടിയില്‍ വിലയിരുത്തലുണ്ട്. സരിന് ഇടത് പിന്തുണ നല്‍കുന്നത് തള്ളാതെയായിരുന്നു മന്ത്രി എം.ബി. രാജേഷിന്റെ പ്രതികരണം. സ്ഥാനാര്‍ഥിത്വത്തെ സംബന്ധിച്ച് ആവശ്യമായ സമയത്ത് ഉചിതമായ തീരുമാനം എടുക്കുമെന്നും ബാക്കി കാര്യങ്ങൾ വഴിയേ പറയാം എന്നുമായിരുന്നു രാജേഷ് പറഞ്ഞത്.
കോണ്‍ഗ്രസിനെയും രാഹുല്‍ മാങ്കൂട്ടത്തിലിന്റെ സ്ഥാനാര്‍ഥിത്വത്തെയും രൂക്ഷമായി വിമര്‍ശിച്ചുകൊണ്ടാണ് കെപിസിസി സോഷ്യല്‍ മീഡിയ സെല്‍ കണ്‍വീനര്‍ കൂടിയായ പി. സരിന് മാധ്യങ്ങള്‍ക്ക് മുന്നിലെത്തിയത്. രാഹുലിനെ സ്ഥാനാര്‍ഥിയാക്കിയ തീരുമാനം പുനഃപരിശോധിക്കണമെന്ന് അദ്ദേഹം ആവശ്യപ്പെട്ടു.
ALSO READ: സരിന് ബിജെപി സീറ്റ് വാഗ്ദാനം; നേരിട്ട് വിളിച്ച് ദേശീയ സെക്രട്ടറി
തന്നെ സ്ഥാനാര്‍ഥിയാക്കാത്തതല്ല പ്രശ്‌നം. ഉള്‍പാര്‍ട്ടി ജനാധിപത്യം തകരാന്‍ പാടില്ല. പാര്‍ട്ടി താത്പര്യങ്ങള്‍ക്ക് മുകളില്‍ കുറച്ചു പേരുടെ വ്യക്തി താത്പര്യങ്ങള്‍ക്ക് വഴങ്ങിയാല്‍ തോല്‍ക്കുന്നത് രാഹുല്‍ മാങ്കൂട്ടത്തിലല്ല, രാഹുല്‍ ഗാന്ധിയായിരിക്കുമെന്നും സരിന് വിമര്‍ശനമുന്നയിച്ചിരുന്നു.
ഹരിയാന ആവര്‍ത്തിക്കുമെന്ന മുന്നറിയിപ്പും നല്‍കിയ സരിന് കുറ്റിച്ചൂലിനെ നിര്‍ത്തിയാലും ജയിക്കുമെന്നാണ് സിപിഎമ്മിനെ പരിഹസിക്കാറുള്ളത്. അത് പക്ഷെ ആ പാര്‍ട്ടിയുടെ കഴിവാണ്. തന്റെ പാര്‍ട്ടി തിരുത്തുമെന്ന് പ്രതീക്ഷിക്കുന്നുവെന്നും സരിന് പറഞ്ഞിരുന്നു.
Popular
